Yeremi 50 - ALA KA KUMA

Babilɔni halakiko

¹ Masaba kumana Babilɔni dugu, ani Babilɔni jamana kama. A y'o kuma lase kira Zeremi sababu la ko.

² «Aw k'a wango la k'a fɔ siyaw cɛma, aw k'a yira ni taamasiɲɛ ye. Aw k'a fɔ, aw kan'a si dogo. Aw k'a fɔ ko: ‹Babilɔni minɛna, u ka joo Bɛli maloyara, u ka joo Maraduki hakili ɲagamina. U ka joow maloyara, u ka joow hakili ɲagamina.›

³ Siya dɔ be bɔra kɔgɔdugu ɲafan fɛ ka na aw kama. A bena aw ka yɔrɔ kɛ dusukasiyɔrɔ ye fɔɔ mɔgɔ tena to yen. Adamadenw ni begɛnw bolila ka tunu.»

⁴ Masaba ko: «O waati la, o loon yɛrɛ la, Isirayɛli ni Zuda mara mɔgɔw bena na ɲɔgɔn fɛ. U kasitɔ le bena na ne Masaba u ka Ala ɲini.

⁵ U bena *Siyɔn sira koo ɲininga, k'u ɲaa sin yen. U bena na ka bɛɛn cɛnbali kɛ ni ne Masaba ye, u tena ɲinɛ min kɔ ka ye.

⁶ Ne ka mɔgɔw tun ye saga tununinw ye, u marabagaw y'a to u tununa, ka taga kuluw kan. U tora ka taama u kunfɛ kuluw kan, u hakili te u ka wɛɛrɛ la tugu.

⁷ Mɔgɔ o mɔgɔ y'u sɔrɔ, o tigi tun b'u halaki. U juguw tun b'a fɔ ko: ‹An ma kojugu kɛ, bari u ye Masaba hakɛ ta, ale min ye tilenninya bɔyɔrɔ, ani u faaw ka jigilayɔrɔ ye.›

Babilɔnikaw boliko

⁸ «Aw ye boli ka bɔ Babilɔni kɔnɔ, aw ye bɔ Babilɔnikaw ka jamana la. Aw ye sira karaba i ko bakɔrɔninw, baaw ɲafɛ.

⁹ Ne bena siyaba dɔw wili k'u fara ɲɔgɔn kan, ka bɔ kɔgɔdugu ɲafan fɛ ka na Babilɔni kɛlɛ. U bena na u yɛrɛ labɛn a kama, k'a minɛ. U ka biɲɛw be i ko kɛlɛŋana ta, ale min bololakolon te kɔsegi.

¹⁰ U bena Babilɔni jamana ka nafolo cɛ ka taga n'a ye, u bɛɛ bena fɛɛn cɛ fɔɔ ka wasa. Ne Masaba le ko ten.

¹¹ Ayiwa, aw ye nisɔndiya, aw ye nisɔndiya kosɔbɛ! Aw minw ye ne soɲa. Aw ye panpan i ko misidenw, binkɛnɛ yɔrɔ la. Aw ka mankan kɛ i ko soo kasikan.

¹² Aw bamuso maloyara kosɔbɛ, aw woloba ye maloya sɔrɔ. Aw ka jamana tora bɛɛ kɔfɛ, a kɛra yɔrɔlakolon ye, dugukolo janin kankan!

¹³ Ne Masaba ka dimi kosɔn, mɔgɔ si tena sigi yen, a bɛɛ bena kɛ yɔrɔlakolon le ye. Mɔgɔ o mɔgɔ mana tɛmɛ Babilɔni gɛrɛfɛ, o tigi bena kabakoya, ka filen fɔ o cɛnniba kosɔn.

¹⁴ Aw minw bɛɛ be se kalabon la, aw ye na aw yɛrɛ labɛn ka Babilɔni lamini. Aw y'a bon, aw kana tulon kɛ n'aw ka biɲɛw bonko ye dɛ! Bari u ye ne Masaba hakɛ ta.

¹⁵ Aw ka kɛlɛ pɛrɛnkan bɔ a kama a lamini bɛɛ la. A bena n'a yɛrɛ di! A ka sangasow n'a ka laminikogo be cira. Masaba b'a ka mɔnɛ bɔra, aw ye mɔnɛ bɔ Babilɔni dugu la. A tun ye min kɛ, aw k'o ɲɔgɔn kɛ a la.

¹⁶ Aw ka dannikɛlaw ni sumantigɛlaw bɔ Babilɔni. Bɛɛ ka boli aw tɔɲɔbagaw ka murujan ɲa ka taga u ka mɔgɔw fɛ. Bɛɛ ka boli ka taga u ka jamana la.

¹⁷ Isirayɛlidenw be i ko saga tununinw, jaraw y'u gwɛn. Asiri masacɛ le kɔnna k'u minɛ, o kɔ, Babilɔni masacɛ Nabukodonozɔri y'u halaki fɔɔ k'u kolo ci.»

¹⁸ Ayiwa, Masaba, Setigi, Isirayɛli ka Ala ko: «Ne bena Babilɔni masacɛ n'a ka jamana tɔɔrɔ, i ko ne ye Asiri masacɛ tɔɔrɔ cogo min na.

¹⁹ Ne bena kɔsegi ni Isirayɛlidenw ye u ka baloyɔrɔ la, u bena u ka balo sɔrɔ Karimɛli kulu kan ni *Basan mara la. U bena dumuni kɛ kosɔbɛ fɔɔ ka fa Efarayimu ni Galaadi mara kuluw kunna.

²⁰ O loonw na, o waati la, u bena Isirayɛli mara mɔgɔw ka filiyɔrɔ ɲini, u tena foyi ye. U bena Zuda mara mɔgɔw ka kojuguw ɲini, o tena ye tugu, bari ne bena minw to nii la, ne bena yafa olu ma. Ne Masaba le ko ten.

²¹ Aw ka taga Maratimu jamana ni Pekɔdikaw kama, k'u kɛlɛ. Aw k'u faga! Aw k'u bɛɛ halaki! Ne ye min bɛɛ fɔ aw ye, aw k'o bɛɛ kɛ. Ne Masaba le ko ten.

²² Kɛlɛ mankan be jamana kɔnɔ, cɛnniba lo!

²³ Ee! Marito min tun be diɲɛ bɛɛ halakira, a karila fɔɔ ka yɛrɛkɛ! Ee! Babilɔni kɛra dusukasiyɔrɔ ye siyaw cɛma dɛ!

²⁴ Babilɔnikaw, ne ye jaan la aw ɲa, aw minɛn'a kɔnɔ, nga aw ma bɔ a kala ma. Aw sɔrɔla, aw minɛna, Bari aw wilila ne Masaba kama.»

²⁵ Masaba y'a ka kɛlɛkɛminanw bilayɔrɔ dayɛlɛ, minan minw b'a dimi bɔ, a y'o ta. Bari, baara kɛta be Matigi, Masaba, Setigi fɛ Babilɔni jamana la.

²⁶ Aw ye na ka bɔ faan bɛɛ la k'a ka bondow dayɛlɛ! Aw k'a ka nafolo fara ɲɔgɔn kan! K'a halaki pewu, a tɔɔ kana to!

²⁷ Aw k'a ka cɛfariw bɛɛ faga, aw k'a to u be taga u fagayɔrɔ la. Bɔnɛ ye u ta ye! Bari u ka loon sera, u sarawaati sera.

²⁸ Mɔgɔ minw kisira ka boli ka bɔ Babilɔni, aw ye mɛnni kɛ olu ka kuma na! Masaba an ka Ala y'a mɔnɛ bɔ cogo min na, a y'a ka soo mɔnɛ bɔ cogo min na, u b'o le fɔra *Siyɔn dugu kɔnɔ.

²⁹ Mɔgɔ o mɔgɔ be se kalabon la, aw ka olu bɛɛ wele Babilɔni kama. Aw ka sigi k'a lamini, mɔgɔ si kana se ka bɔ. Aw k'a sara ka kɛɲɛ n'a ka kɛwaliw ye. A ye min kɛ, aw k'o ɲɔgɔn kɛ a la. Bari a tun wilila Masaba kama, Isirayɛli ka Ala kama.

³⁰ «O la, a ka kanbelenw bena ben forobayɔrɔw la, a ka kɛlɛdenw bɛɛ bena sa o loon na. Ne Masaba le ko ten.

³¹ Ne wilila ele kama, yɛrɛboɲala! I ka loon sera, i sarawaati le sera. Ne Matigi, Masaba, Setigi le ko ten.

³² Yɛrɛboɲala bena talon ka ben, mɔgɔ si ten'a wili. Ne bena tasuma mana a ka duguw la, a lamini bɛɛ bena jɛni.»

Masaba bena Isirayɛli kisi

³³ Masaba, Setigi ko: «Isirayɛli ni Zuda mara mɔgɔw tɔɔrɔnin be ɲɔgɔn fɛ. U minɛbagaw bɛɛ b'u kɔlɔsira ka ɲa, u t'a fɛ k'u bila.

³⁴ Nga, barika b'u kunmabɔbaga la. Ne min tɔgɔ ko Masaba, Setigi. N bena lɔ n'u ka koo ye, waasa ka lafiya don jamana nin la, ani ka sɛgɛn la Babilɔnikaw kan.

Masaba bena min kɛ Babilɔni la

³⁵ «Murujan ka taga Babilɔnikaw kama! A ka taga Babilɔnikaw n'a ɲamɔgɔw, ani a ka lɔnnikɛlaw kama! Ne Masaba le ko ten.

³⁶ Murujan ka ta'a lagwɛlikɛlaw kama, u ka kɛ i ko fatɔw! Murujan ka ta'a cɛfariw kama, u ka kɛ siranbagatɔw ye!

³⁷ Murujan ka ta'a ka soow, n'a ka kɛlɛkɛwotorow kama! Murujan ka taga siyaw kama, minw be Babilɔni kɔnɔ! U ka kɛ i ko musow. Murujan ka ta'a ka nafolow kama, u k'u cɛ.

³⁸ Jaa ka se a ka jiyɔrɔw ma, u jii ka ban! Bari joo jamana lo, u fatɔyara joo o la.

³⁹ O kama, waraninkala ni surukuw bena to yen, o yɔrɔ nin bena kɛ kɔnɔsogolon layɔrɔ ye. Mɔgɔ tena sigi yen tugu fewu, a bena to mɔgɔtanya la tuma bɛɛ.

⁴⁰ Ne Ala ye bɔnɛ lase Sodɔmu ni Gɔmɔri n'u gɛrɛfɛduguw ma cogo min na, o cogo kelen na, mɔgɔ si tena to yen, adamaden si tena sigi yen. Ne Masaba le ko ten.

⁴¹ Siya dɔ natɔ filɛ ka bɔ kɔgɔdugu ɲafan fɛ! Siyaba lo, ani masa caaman. U wilila ka bɔ fɔɔ diɲɛ daan na.

⁴² Kala ni taman b'u bolo. U ka jugu! U te hinɛ! U ka mankan bɔnin be baji woyokan fɛ, u yɛlɛla soow kan. U labɛnnin lo ka kɛ kelen ye ka na e Babilɔni kama.

⁴³ Babilɔni masacɛ y'o kibaruya mɛn, a fari fagara. A hakili ɲagamina, a tɔɔrɔla i ko tintɔ.

⁴⁴ Ɲatugu n'a yɛlɛ cɛ, ne bena Babilɔnikaw gwɛn ka bɔ yen i ko jara bɔtɔ Zurudɛn tuba kɔnɔ ka taga yɔrɔ dɔ, fɛɛnw be min la tuma bɛɛ. O kɔ, ne ye min woloma, ne bena ale sigi o yɔrɔ kunna. Jɔn ni ne ka kan? Jɔn be se ka ne ɲininga? Marabaga jumɛn be se ka lɔ ne ɲa?»

⁴⁵ Masaba ye koo min latigɛ Babilɔni kama, aw y'aw tulo malɔ o la, a ye fɛɛn min latigɛ Babilɔnikaw kama. Siga t'a la, u bena u sama ka taga i ko begɛndenw. Siga t'a la, u bena u ka ɲiminikɛyɔrɔ halaki pewu u kosɔn.

⁴⁶ Babilɔni minɛko mɛnnin, dugukolo yɛrɛyɛrɛla. U kasikan bena mɛn siyaw cɛma.