Yeremi 49 - ALA KA KUMA

Amoniw ka koo

¹ Masaba b'a fɔra amoniw kosɔn ko: «O tuma na, deen te Isirayɛli fɛ wa? Cɛntabaga t'a fɛ wa? Mun na *Milikɔmu ye Gadi mara minɛ? Mun na a sɔnbagaw sigir'a duguw kɔnɔ?

² Ayiwa, loonw be na, ne ben'a to kɛlɛ pɛrɛnkan be mɛn amoniw ka masadugu Araba kɔnɔ. A bena kɛ tomo ye, dusukasiyɔrɔ. A ka dugudenninw bena jɛni. O tuma na, minw tun ye Isirayɛlidenw gwɛn ka bɔ u faso la, u bena olu gwɛn ka bɔ yen. Ne Masaba le ko ten.

³ Ɛsibɔnkaw, aw ka kasi, bari Ayi cira! Araba dugudenninw mɔgɔw, aw ka kasi! Aw ye dusukasifaniw don ka kasi ka munumunu kogow kɔrɔ! Bari Milikɔmu be tagara jamana wɛrɛ la, ale n'a ka murutigiw, n'a ka ɲamɔgɔw.

⁴ Mun na aw b'aw yɛrɛ boɲana aw ka kɔkɛnɛw kosɔn? Ne bena aw ka kɔkɛnɛɲumanw cɛn, murutibaga nunu, aw minw jigi b'aw ka nafolo kan, n'aw b'a fɔra ko: ‹Jɔn bena an kɛlɛ?›

⁵ Ayiwa, ne bena siranya bila aw la, ka bɔ aw lamini na faan bɛɛ la. Aw bɛɛ bena gwɛn ka taga n'aw ka siraw ye! Mɔgɔ tena sɔrɔ min bena bolibagaw kafo. Ne Matigi, Masaba, Setigi le ko ten.

⁶ O kɔ, minw minɛna ka taga amoniw la, ne ben'a kɛ olu be segi ka na tugu. Ne Masaba le ko ten.»

Edɔmu ka koo

⁷ Masaba, Setigi y'a fɔ Edɔmu kosɔn ko: «Lɔnnikɛla te sɔrɔ Teman tugu wa? Hakilitigiw ka hakilitigiya banna wa? U ka lɔnniya nagasira wa?

⁸ Dedankaw, aw k'aw kɔɔ di ka boli ka taga dogo ka ɲa! Bari ne be nana Ezawu kɔmɔgɔw halaki, u saratuma sera ne fɛ.

⁹ Ni sumantigɛlaw nana i ka foro la, u tena suman foyi to yen. Ni soonw nana sufɛ, u be se min na, u b'o kɛ. U te suman dɔɔni to yen wa?

¹⁰ Ne bena Ezawu kɔmɔgɔw lakolonya, k'u dogoyɔrɔw bɔ kɛnɛ kan. U tena se ka dogo tugu. U deenw n'u balimaw, n'u sigiɲɔgɔnw halakira, u si ma to.

¹¹ Aw kana jɔɔrɔ n'u ka falatɔw ka koo ye, ne le bena u balo. Aw ka firiyamusow be se k'u jigi la ne kan.»

¹² Masaba ko: «Minw tun man kan ka ne ka fariya nɛnɛ, olu y'a nɛnɛ. Nga aw edɔmuw, aw b'a fɛ ka to sarabali ye kɛ? O te se ka kɛ, aw ben'a nɛnɛ le!

¹³ Tiɲɛ na, ne b'a fɔ ko: Bɔsira dugu bena kɛ tomo ni dusukasiyɔrɔ ye, ani maloyafɛn, ni dangafɛn. A dugudenninw bɛɛ bena kɛ tomow ye ka to ten tuma bɛɛ.» Masaba le ko ten.

¹⁴ Masaba ye kuma nin fɔ ne ye, ciden tagar'a fɔ fana siyaw ye, ko: «Aw ye lajɛn ka taga edɔmuw kama! Aw ka wili kɛlɛ kama!»

¹⁵ «Ne bena aw kɛ siyaw la dɔgɔmaninw ye, k'a to mɔgɔw t'aw jati fewu.

¹⁶ Aw ka fariya, n'aw ka yɛrɛboɲa y'aw nigɛ, aw minw siginin be farawow la, aw minw tonin be kulujanw kan. Hali n'aw y'aw ka ɲaga la yɔrɔjan i ko sɛgɛn ta, ne bena aw porokoto ka bɔ yen.» Masaba le ko ten.

¹⁷ «Edɔmu bena kɛ dusukasiyɔrɔ ye, tɛmɛbagaw bɛɛ bena kabakoya fɔɔ ka filen fɔ cɛnni nin bɛɛ kosɔn.

¹⁸ Sodɔmu ni Gɔmɔri n'u gɛrɛfɛduguw kɛra cogo min na u halakituma na, Edɔmu fana bena kɛ ten. Mɔgɔ si tena sigi yen tugu. Adamaden si tena to yen. Ne Masaba le ko ten.

¹⁹ Ɲatugu n'a yɛlɛ cɛ, ne bena edɔmuw gwɛn ka bɔ yen i ko jara bɔtɔ Zurudɛn tuba kɔnɔ ka taga yɔrɔ dɔ, a be fɛɛnw sɔrɔ yɔrɔ min na tuma bɛɛ. O kɔ, ne ye min woloma, ne bena ale sigi o yɔrɔ kunna. Jɔn ni ne ka kan? Jɔn be se ka ne ɲininga? Ɲamɔgɔ jumɛn be se ka lɔ ne ɲa?»

²⁰ Masaba ye koo min latigɛ edɔmuw kama, aw ye tulo malɔ o la, a ye fɛɛn min latigɛ Temankaw kama. Siga t'a la, u bena u sama ka taga i ko begɛndenw. Siga t'a la, u bena u ka ɲiminikɛyɔrɔ halaki pewu u kosɔn.

²¹ U bena ben ni barika ye fɔɔ ka dugukolo yɛrɛyɛrɛ. U kasikan bena mɛn fɔɔ Buruku kɔgɔji kɔrɔ.

²² A be i ko sɛgɛn dɔ min be lɛrula Bɔsira kunna. O loon na, Edɔmu cɛfariw kɔnɔ bena gwan i ko tintɔ.

Damasikaw ka koo

²³ Min fɔra Damasi kama, o filɛ: «Amati, ani Arapadi duguw maloyara. Bari u ye kibaru goman mɛn. U hakili siginin tɛ i ko kɔgɔji min te mala ka ye.

²⁴ Damasikaw fari fagara, u y'u kɔɔ di ko u be boli. Hakiliɲagami y'u sɔrɔ, dusukasi ni tɔɔrɔ sera u ma i ko tintɔ.

²⁵ A kɛra di u bolila ka dugu nɔɔrɔman to yen? Nisɔndiya dugu nin!

²⁶ O loon na, a ka kanbelenw bena ben a ka forobayɔrɔw la, a ka kɛlɛdenw bɛɛ bena sa. Ne Masaba, Setigi le ko ten.

²⁷ Ne bena tasuma mana Damasi dugu laminikogo la, a bena masacɛ Bɛnadadi ka soow jɛni.»

Arabuw ka koo

²⁸ Babilɔni masacɛ Nabukodonozɔri tun ye Asɔri mara minw kɛlɛ ka se u kɔrɔ, kuma min fɔra olu ni kedariw kama. Masaba ko: «Aw ye wili ka taga kedariw kama! Ka kɔrɔn ɲafan mɔgɔw faga!

²⁹ Aw k'u ka fanisow ta, k'u ka begɛnw minɛ, u ka buguw faniw, u ka minanw bɛɛ, n'u ka ɲɔgɔmɛw fana. Aw ka woo ci u la k'a fɔ ko: ‹Jatigɛ be yɔrɔ bɛɛ!›

³⁰ Asɔri mara mɔgɔw, aw ye boli! Aw ye teliya! Aw ye taga dogo ka ɲa! Bari, Babilɔni masacɛ Nabukodonozɔri ye ŋaniya dɔ ta aw kama. A ye koo dɔ latigɛ aw kama. Ne Masaba le ko ten.

³¹ Siya min be lafiya la, min hakili siginin lo, koon te min ka duguw donda la, sɔgɔlan te yen, n'u siginin be u danna, aw ye wili ka taga ale kɛlɛ! Ne Masaba le ko ten.

³² U juguw bena u ka ɲɔgɔmɛw cɛ ka taga n'u ye, u ka begɛn caaman bena kɛ u ka kɛlɛ tɔnɔ ye. Minw be to ka bonbosili landa kɛ, ne bena olu yɛrɛkɛ faan bɛɛ. Ne bena bɔnɛ lase u ma ka bɔ faan bɛɛ. Ne Masaba le ko ten.

³³ Asɔri mara bena kɛ kongowuluw layɔrɔ ye, a bena kɛ dusukasiyɔrɔ ye tuma bɛɛ. Mɔgɔ si tena sigi yen, adamaden si tena to yen.»

Elamukaw ka koo

³⁴ Masaba ye kuma min fɔ kira Zeremi ye Elamu jamana kosɔn, masacɛ Sedesiyasi ka masaya daminɛtuma na Zuda mara kunna, o filɛ.

³⁵ Masaba, Setigi ko: «Ne bena Elamukaw ka kala bonta kari, ale min y'u fanga ye.

³⁶ Ne ben'a kɛ fɔɲɔ be bɔ diɲɛ faan naani la ka na Elamukaw kama k'u jɛnsɛn diɲɛ faan bɛɛ la. A siya te yen, u tena jɛnsɛn ka se min ma.

³⁷ Ne ben'a kɛ u be yɛrɛyɛrɛ u juguw ɲafɛ, minw b'a fɛ k'u faga. Ne bena bɔnɛ lase u ma, min ye ne ka dimikojugu ye. Ne bena u kɔgwɛn ni murujan ye fɔɔ ka taga u ban. Ne Masaba le ko ten.

³⁸ Ne bena n ka masaya sigi Elamu jamana la, k'a masacɛ n'a ka dakɔrɔsigiw bɔ yen. Ne Masaba le ko ten.

³⁹ Nga a laban na, Elamuka minw tun minɛna ka taga, ne ben'a kɛ olu be segi ka na.» Masaba le ko ten.