Yeremi 48 - ALA KA KUMA

Mowabu halakiko

¹ Masaba, Setigi, Isirayɛli ka Ala b'a fɔ Mowabu kosɔn ko: «Bɔnɛ ye Nebokaw ta ye, bari u ka dugu halakira. Kiriyatayimu dugu bena minɛ, ka maloya. A ka yɔrɔ barikaman bena ci, ka maloya sɔrɔ.

² Mowabu ka nɔɔrɔ banna, bɔnɛ be labɛnn'a kama Ɛsibɔn. U ko: ‹An ka taga, k'a halaki ka bɔ siyaw cɛma.› Ele Mademɛn fana, i bena suma tenten, murujan bena tugu i kɔ.

³ Kasikan be bɔra Oronayimu, u ko: ‹Cɛnni o cɛnni! Cɛnniba lo.›

⁴ Mowabu halakira. A deenw kulekan be bɔra,

⁵ u be kasira kosɔbɛ sira kan, u yɛlɛtɔ Luwiti. Sira min be jigi ka taga Oronayimu, kulekan be mɛnna ale kan cɛnni kosɔn.

⁶ Aw ye boli, k'aw nii kisi! Aw ka kɛ i ko yiridennin, kongokolon kɔnɔ.

⁷ Mowabu, i jigi b'i ka kɛwaliw n'i ka nafolo kan minkɛ, e fana bena minɛ. I ka joo *Kemɔsi bena ta ka taga jamana wɛrɛ la, ale n'a ka murutigiw, n'a ka ɲamɔgɔw.

⁸ Cɛnnikɛla bena don duguw bɛɛ kɔnɔ, hali dugu kelen tena to. Kɔkɛnɛ bena tunu, a sanfɛla bena halaki. Masaba le ko ten.

⁹ Aw ye kaburu labɛn mowabuw ye. A ka duguw bena kɛ makari yɔrɔw ye, mɔgɔ tena sɔrɔ yen tugu.

¹⁰ Mɔgɔ min be Masaba ka baara kɛ ni farifaga ye, o tigi danganin lo. Mɔgɔ min te fagali kɛra ni murujan ye, o tigi danganin lo.

¹¹ Mowabuw tora ɲasuma na kabini u be yen, u ma minɛ ka taga ka ye. U be i ko dɔrɔ, min buru b'a jukɔrɔ yen, a ma yɛlɛma ka ye minan wɛrɛ la. O la, a diya b'a cogo la, a kasa fana ma yɛlɛma.

¹² «Ayiwa, loonw be na, ne bena yɛlɛmabagaw bila ka n'a yɛlɛma ka bɔ a dagaw kɔnɔ k'u ci. Ne Masaba le ko ten.

¹³ Mowabu bena maloya, a ka joo Kemɔsi kosɔn, i ko Isirayɛlidenw maloyara u ka Betɛli kosɔn cogo min na. U tun y'u jigi la min kan.

¹⁴ Aw be se k'a fɔ cogo di ko aw ye cɛfariw ye, ko aw be se kɛlɛ la?

¹⁵ Mowabu n'a duguw halakira. A ka kanbelenŋanaw be tagara fagayɔrɔ la. Masacɛ min tɔgɔ ko Masaba, Setigi a le lo ko ten.

¹⁶ Mowabu halakiwaati tɔɔ man ca, bɔnɛ ben'a sɔrɔ sisansisan.

¹⁷ A laminimɔgɔw n'a lɔnbagaw bɛɛ ka kasi a kosɔn, Aw k'a fɔ ko: ‹Ee! Masabere nin karila! Fangaba nin cɛnna!›

¹⁸ Aw ka jigi ka bɔ aw lɔyɔrɔba la, ka na sigi dugukolo janin na, Dibɔnkaw. Mowabu halakibaga be nana aw kama, a bena aw ka yɔrɔ barikamanw halaki.

¹⁹ Aw ka dɛn sirada la ka filɛli kɛ, Arowɛrikaw. Ni bolibaga, min sera ka kisi, aw ka ale ɲininga ko: ‹Mun le kɛra?›

²⁰ Mowabu maloyara, a jigi tigɛra. Aw ka kule ka kasi! Aw ka wango la Arinɔn kɔɔ daa la ko Mowabu halakira!

²¹ «Jalaki sera kɛnɛba yɔrɔ la: Olɔn, ni Yasa, ani Mefaati,

²² ni Dibɔn, ani Nebo, ni Bɛtidibilatayimu,

²³ ani Kiriyatayimu, ni Bɛtigamuli, ani Bɛtimeŋɔn,

²⁴ ni Keriyɔti, ni Bɔsira, o kɔrɔ, mowabuw ka duguw bɛɛ, minw yɔrɔ ka jan, ani minw yɔrɔ ka surun.

²⁵ Mowabu ka fanga nagasira, a bolo karila.» Masaba le ko ten.

²⁶ «Aw k'a kɛ a be min ka su, bari a y'a yɛrɛ fisaya ni Masaba ye. Fɔɔ Mowabu ka ben ka kolonkolon a ka fɔɔnɔw kɔnɔ, a ka kɛ yɛlɛbɔyɔrɔ ye.

²⁷ Yala, e tun te yɛlɛ Isirayɛlidenw ma wa? N'i b'u koo fɔ tuma o tuma, e b'i kuun firinfirin i n'a fɔ u minɛna ka ye soɲali la.

²⁸ Mowabukaw, aw k'aw ka duguw bila ka taga to kuluyɔrɔ la. Aw ye tuganin cogo ladege, min b'a ka ɲaga la kuluwo daa la.

²⁹ An ye mowabuw ka yɛrɛboɲa koo mɛn. U tun b'u yɛrɛ boɲa kojugu, ka yada, k'olu ka fisa ni tɔw ye.

³⁰ Ne b'u ka yɛrɛboɲa kala ma. U ka kuma n'u ka kɛwaliw bɛɛ ye fuu ye. Masaba le ko ten.

³¹ O la, ne be kasira Mowabu kosɔn. Ne be kulera Mowabu yɔrɔ bɛɛ kosɔn. Ne be ŋunanna Kiriyɛrɛsikaw kosɔn.

³² Sibima *ɛrɛzɛnforo, ne be kasi i kosɔn ka tɛmɛ Yazɛri koo kan. I bolow tun jaɲana fɔɔ ka taga kɔgɔji kɔfɛ, u tun sera Yazɛri. Halakilikɛla benna i ka suman n'i ka ɛrɛzɛnw kan.

³³ Ɲanagwɛ ni nisɔndiya te yen tugu Mowabu yiriforow n'a foro wɛrɛw la. Ne y'a kɛ duvɛn jara dagaw kɔnɔ. Ɛrɛzɛnnɔɔni nisɔndiyakan te bɔra tugu. Kaan dɔ be bɔra, nga nisɔndiyakan tɛ.

³⁴ Kulekan be bɔ Ɛsibɔn ni Eleyale, a be mɛn fɔɔ Yasa, k'a daminɛ Sowari fɔɔ Oronayimu, ani Ɛgilatiselisiya, bari hali Nimurimu jii jara.

³⁵ Minw be to k'u ka joow sɔn sɔnnikɛyɔrɔw la, ne bena olu sii tunu Mowabu kɔnɔ. Ne Masaba le ko ten.

³⁶ Ne dusu kasinin be Mowabu, ani Kiriyɛrɛsikaw kama i ko filenfiyɛbaga, sangayɔrɔ la. Bari u tun ye nafolo min cɛ, o tununa.

³⁷ Bɛɛ y'u kuun n'u bonbosi li, k'u bolow tigɛtigɛ. Bɛɛ ye dusukasifani don.

³⁸ Mowabuw ka soow bɛɛ kunna ani forobayɔrɔw la, kasikan dama le be yen. Bari ne ye mowabuw halaki i ko daga, mɔgɔ mako te min na. Ne Masaba le ko ten.

³⁹ A halakira dɛ! Aw ye kasi! Mowabu y'a kɔɔ di maloya kosɔn, Mowabuw kɛra yɛlɛbɔfɛn ni siranyafɛn ye u laminimɔgɔw bɛɛ fɛ.»

⁴⁰ Masaba ko: «A be i ko sɛgɛn min be lerula Mowabu kunna.

⁴¹ Keriyɔti ni yɔrɔ barikamanw minɛna. Mowabu cɛfariw kɔnɔ bena gwan o loon na i ko muso tintɔ.

⁴² Mowabu halakira, siya nin ka koo banna. Bari u tun y'u yɛrɛ fisaya ni Masaba ye.

⁴³ Siranya, ni dingɛ, ani jɔɔ le y'aw ta ye, Mowabukaw. Ne Masaba le ko ten.

⁴⁴ Ni min sera k'a yɛrɛ bɔsi siranya bolo, ale bena ben dingɛ kɔnɔ. N'a sera ka bɔ dingɛ kɔnɔ, a bena minɛ jɔɔ kɔnɔ. Ne bena wili Mowabu kama saan dɔ la. Ne Masaba le ko ten.

⁴⁵ Bolibaga dɔw dɛsɛnin ye lafiɲɛyɔrɔ ɲini Ɛsibɔn dugu kɔnɔ. Nga tasuma bɔra Ɛsibɔn, masacɛ Siŋɔn ka soo kɔnɔ. A bena mɔgɔ fariman nunu ka jamana jɛni k'a ta a dafɛla la fɔɔ ka taga se a cɛmancɛ la.

⁴⁶ Ee! Mowabuw, bɔnɛ ye aw ta ye! Kemɔsi sɔnbagaw ta cɛnna. Aw dencɛw n'aw denmusow minɛna ka taga.

⁴⁷ Nga, waati dɔ bena se, ne bena Mowabu kɛ a cogo kɔrɔman na.» Masaba le ko ten. Mowabuw ka jamana jalakiko danna yan.