Yeremi 47 - ALA KA KUMA

Filisiw halakiko

¹ Masaba ye kuma min fɔ kira Zeremi ye filisiw kosɔn sanni Ezipiti masacɛ ka na Gaza dugu kɛlɛ, o filɛ.

² Masaba ko: «Jii dɔ funutɔ filɛ kɔgɔdugu ɲafan fɛ. A be boɲana ka bɔ a daaw la, a be jamana minɛna, an'a kɔnɔnafɛnw, duguw ani u kɔnɔ mɔgɔw. Mɔgɔw be kulera, jamanadenw bɛɛ be kasira.

³ Soow seen mankan be mɛnna, u ka wotorow n'u seen mankan be mɛnna. Denfaw te janto u deenw la tugu, u fari faganin lo

⁴ bari filisiw bɛɛ halakilon le sera. Minw tun bena se ka Tiri ni Sidɔn dugu dɛmɛ, olu bɛɛ fagalon sera. Masaba be filisiw halakira, o tɔɔ minw bɔra Kafitɔri.

⁵ Gazakaw kuun lira sanga kosɔn, Asikalɔn sumana tenten. Aw tɔɔ min tora kɛnɛba la, aw bena to k'aw yɛrɛ tigɛtigɛ fɔɔ tuma jumɛn dusukasi bolo?

⁶ ‹Ee! Masaba ka murujan! I bena lafiɲɛ tuma jumɛn? Don i foroko la! I lɔ! To yɔrɔ kelen!›

⁷ A bena se ka lafiɲɛ cogo di? K'a sɔrɔ Masaba y'a ci ka taga Asikalɔn ni kɔgɔjida la mara kama.»