Yeremi 42 - ALA KA KUMA

Zeremi taako Ezipiti jamana la

¹ Kɛlɛkuntigiw bɛɛ, Kareya deen Yowanan ni Osaya deen Azariya, ani jama bɛɛ, denmisɛn fara mɔgɔkɔrɔba kan, u bɛɛ tagara

² kira Zeremi fɛ k'a fɔ a ye ko: «I tulo malɔ an ka daalili la. An tɔɔ min bɛɛ tora, Masaba e ka Ala daali an ye. Bari an tun ka ca nga an tora fitini. Ele yɛrɛ ɲaa b'a la.

³ An ka kan ka sira min ta, ani ka min kɛ, Masaba e ka Ala k'o yira an na.»

⁴ Kira Zeremi y'u jaabi ko: «N y'a mɛn. Aw y'a ɲini ne fɛ cogo min na, ne bena na Masaba aw ka Ala daali. A mana kuma o kuma fɔ aw ka koo la, ne bena o bɛɛ fɔ aw ye. Ne ten'a si dogo aw la.»

⁵ U y'a fɔ Zeremi ye ko: «Masaba e ka Ala bena min fɔ i ye an ka koo la, an bena o le kɛ. Masaba ka kɛ an seere ye o la.

⁶ A ka nɔgɔ, walima a ka gwɛlɛ wa, an bena Masaba an ka Ala ka fɔta le kɛ, an ko i ka ale min ɲininga. O la, an bena hɛrɛ sɔrɔ bari an ye mɛnni kɛ a fɛ.»

⁷ Tile tan tɛmɛnin kɔ, Masaba kumana Zeremi fɛ.

⁸ Zeremi ye Kareya dencɛ Yowanan ni kɛlɛkuntigi minw bɛɛ tun be n'a ye, ni jama bɛɛ wele, denmisɛn fara mɔgɔkɔrɔba kan,

⁹ k'a fɔ u ye ko: «Masaba, Isirayɛli ka Ala, aw ko ne ka min ɲininga k'a daali aw ye, ko:

¹⁰ ‹N'aw tora jamana nin kɔnɔ, ne bena fanga don aw la, ne tena aw halaki tugu, ne bena aw sigicogo ɲa, n tena aw wili tugu. Bari, ne ye bɔnɛ min lase aw ma, ne be nimisa o la.

¹¹ Aw be siran Babilɔni masacɛ min ɲa, aw kana siran ale ɲa tugu. Ne Masaba le ko ten. Aw kana siran a ɲa tugu, bari, ne be ni aw ye janko k'aw kisi, k'aw bɔ a bolo.

¹² Ne bena makari aw la, o kama, ale fana bena makari aw la k'a to aw ka segi ka na aw ka dugukolo kan.›

¹³ «Nga n'aw y'a fɔ ko: ‹An tena to jamana nin kɔnɔ›, n'aw ma sɔn ka mɛnni kɛ ne Masaba aw ka Ala fɛ,

¹⁴ n'aw y'a fɔ ko: ‹Ayi, an bena taga sigi Ezipiti jamana na, an tena kɛlɛ sɔrɔ yen, an tena buru fiyɛkan mɛn, an tena tɔɔrɔ kɔngɔ bolo yen.›

¹⁵ Ayiwa, aw ye ne Masaba ka kuma lamɛn, aw Zuda mara mɔgɔ tɔw. Ne Masaba, Setigi, Isirayɛli ka Ala ko n'aw y'a latigɛ ka taga Ezipiti, n'aw tagara sigi yen,

¹⁶ aw be siran murujan min ɲa, a bena aw sɔrɔ o yɔrɔ la, Ezipiti jamana la. Aw be jɔɔrɔ kɔngɔko min na, o bena aw tɔɔrɔ yen. Aw bena sa o yɔrɔ le la.

¹⁷ Mɔgɔ minw bɛɛ ben'a latigɛ ka taga sigi Ezipiti, murujan ni kɔngo ani fɔɲɔbana bena olu bɛɛ faga. Ne bena bɔnɛ min lase u ma, u si tena bɔ o la, u si tena to nii la.

¹⁸ Bari ne Masaba, Setigi, Isirayɛli ka Ala ko ne bena n ka dimi ni n ka fariya yira aw la i ko Zeruzalɛmukaw ta, n'aw tagara Ezipiti jamana la. Aw bena kɛ dusukasifɛnw, ni dangafɛnw, ani nɛnifɛnw ye. Aw ɲaa tena la yan yɔrɔ kan tugu.

¹⁹ «Aw Zuda mara mɔgɔ tɔw minw tora, Masaba b'a fɔra aw ye ko: ‹Aw kana taga Ezipiti jamana la!› Ne b'a fɔ k'a gwɛlɛya aw ye bii.

²⁰ Aw b'aw yɛrɛ le nigɛra, bari aw le tun ko ne ka Masaba aw ka Ala ɲininga, ko a mana fɛɛn o fɛɛn fɔ, ko n k'o fɔ aw ye, ko aw ben'a kɛ.

²¹ Ne do y'o le fɔ aw ye bii, nga aw te mɛnni kɛra Masaba aw ka Ala ka kuma na. A ye min fɔ ne ye ko n k'a fɔ aw ye, aw ma mɛnni kɛ a si la.

²² Ayiwa, aw k'a lɔn sisan ko aw be tagara sigi yɔrɔ min na, murujan, ni kɔngɔ, ani fɔɲɔbana le bena aw faga yen.»