Yeremi 35 - ALA KA KUMA

Erekabu kɔmɔgɔw ni Zeremi ka koo

¹ Masaba ye kuma min fɔ Zeremi ye, o y'a sɔrɔ Zoziyasi deen Yoyakimu be masaya la Zuda mara la, o filɛ:

² «Taga Erekabu ka fadenyabolo fɛ, ka kuma u fɛ, ka na n'u ye ne ka soo bondennin dɔ kɔnɔ, ka duvɛn d'u ma u k'a min.»

³ Ne tagara Abasiniya deen Yirimeyawu dencɛ Yaazaniya minɛ, ale n'a balimaw, n'a deenw bɛɛ, Erekabu ka fadenyabolo bɛɛ,

⁴ ka na n'u ye Masaba ka soo kɔnɔ, ka don n'u ye Yigidaliyawu, Ala ka mɔgɔ, deen Anan ka deenw ka boon kɔnɔ, ɲamɔgɔw ta gɛrɛfɛ, min tun be daa kɔlɔsibaga Salumu deen Maazeyawu ta sanfɛ.

⁵ Baraw ni fiyɛ minw tun fafanin lo duvɛn na, ne y'olu bila Erekabu ka fadenyabolo mɔgɔw ɲakɔrɔ, k'a fɔ u ye ko: «Aw ka duvɛn min!»

⁶ U ye ne jaabi ko: «An te duvɛn min. An bɛmacɛ Yonadabu, min ye Erekabu deen ye, ale tun y'a fɔ ko an kana duvɛn min fewu, an n'an kɔmɔgɔw.

⁷ A ko an kana soo lɔ, an kana danni kɛ, an kana *ɛrɛzɛnforo bɔ, u sii kana sɔrɔ an fɛ fana, nga, ko an ka to fanibugu kɔnɔ an sii bɛɛ la, waasa an sii ka jaɲa dugukolo kan, an bena sigi yɔrɔ min na lonanya la.

⁸ An bɛmacɛ Yonadabu, Erekabu deen y'o kuma minw fɔ an ye, an y'o bɛɛ bato. An ma deli ka duvɛn min ka ye, an, n'an musow, an'an deen cɛmanw ni musomanw.

⁹ An ma soo lɔ ka ye ka don a kɔnɔ, an ma ɛrɛzɛnforo, walima foro wɛrɛ bɔ, an ma danni kɛ.

¹⁰ An be si buguw le kɔnɔ. An bɛmacɛ Yonadabu ye kuma minw fɔ an ye, an y'o bato kosɔbɛ.

¹¹ Nga Babilɔni masacɛ Nabukodonozɔri wilila ka na don jamana nin na tuma min na, an y'a fɔ ko: ‹Fɔɔ an ka boli Babilɔnikaw ni Sirikaw ka kɛlɛdenw ɲa ka taga Zeruzalɛmu.› O lo an nana sigi Zeruzalɛmu.»

¹² O tuma na, Masaba kumana Zeremi fɛ ko:

¹³ «Ne Masaba, Setigi, Isirayɛli ka Ala ko: Tag'a fɔ Zeruzalɛmukaw ni Zuda mara mɔgɔ tɔw ye ko ne ko u te sɔn ladili ma ka ne ka kuma bato wa? Ne Masaba le ko ten.

¹⁴ Erekabu deen Yonadabu y'a deenw bali dɔrɔmin ma, a deenw y'a ka kuma bato. U ma duvɛn min ka ye fɔɔ ka na se bii ma. U y'u bɛmacɛ ka fɔta bato. Ne kɔni tora ka kuma aw fɛ, nga aw ma mɛnni kɛ n fɛ.

¹⁵ Ne tora ka n ka baarakɛlaw, kiraw ci aw ma. U y'a fɔ aw ye ko: Aw kelen kelen bɛɛ ka faran aw ka sirajuguw la, k'aw ka kɛtaw yɛlɛma. Aw kana boli batofɛn wɛrɛw kɔ k'u bato. O la, ne ye dugukolo min di aw n'aw faaw ma, aw bena sigi o kan. Nga aw ma mɛnni kɛ ne fɛ, aw ma n ka kuma bato.

¹⁶ Erekabu deen Yonadabu kɔmɔgɔw b'u bɛmacɛ ka kuma bato, nga mɔgɔ nunu te mɛnni kɛ ne fɛ.

¹⁷ «O la, ne Masaba, Setigi Ala, Isirayɛli ka Ala ko: ‹Ne y'u ka bɔnɛ minw koo latigɛ ne ben'a kɛ o bɛɛ be se Zeruzalɛmukaw bɛɛ ni Zuda mara mɔgɔw ma. Bari, ne kumana u fɛ, u ma mɛnni kɛ, ne y'u wele, u ma n laminɛ.› »

¹⁸ Zeremi y'a fɔ Erekabu kɔmɔgɔw ye o tuma na ko: «Masaba, Setigi, Isirayɛli ka Ala ko: Aw y'aw bɛmacɛ Yonadabu ka fɔta bato, a ye kuma minw fɔ aw ye, aw y'o bɛɛ bato kosɔbɛ minkɛ,

¹⁹ ale Masaba, Setigi, Isirayɛli ka Ala ko: Erekabu dencɛ Yonadabu tena dɛsɛ kɔmɔgɔw la fewu minw bena to ka baara kɛ ne ye.»