Yeremi 27 - ALA KA KUMA

Zeremi be jama tɔɔrɔko fɔ

¹ Zoziyasi dencɛ Sedesiyasi ka masaya daminɛ na Zuda mara la, Masaba ye kuma min fɔ Zeremi ye, o filɛ.

² Masaba y'a fɔ a ye ko: «Taga jurukisɛ ni misiw ka zuu lalaga k'o bila i yɛrɛ kaan na.

³ O ci Edɔmu masacɛ ma, ni Mowabu masacɛ, ni amoniw ka masacɛ, ni Tiri masacɛ, ani Sidɔn masacɛ ma. I b'o cii don u ka cidenw bolo, minw nana Zeruzalɛmu, Zuda mara masacɛ Sedesiyasi fɛ.

⁴ I be kuma nin fɔ u ye, u ka taga o fɔ u kuntigiw ye. I ben'a fɔ ko: ‹Masaba, Setigi, Isirayɛli ka Ala ko: Aw bena min fɔ aw kuntigiw ye, o filɛ nin ye:

⁵ Ne le ye dugukolo, ni mɔgɔw, ani begɛnw dan ni n ka fanga ni n ka setigiya ye. Ni ne b'a fɛ ka dugukolo di mɔgɔ min ma, n b'a di o tigi ma.

⁶ Sisan, ne be jamana nunu bɛɛ don n ka baarakɛla, Babilɔni masacɛ Nabukodonozɔri bolo. Ne be kongosogow fana d'a ma janko u k'a mako ɲa.

⁷ Siyaw bɛɛ bena baara kɛ a ye, an'a deen n'a mamaden ye, fɔɔ ka taga se a ka masaya waati bɛɛ ma. O waati la, siya caaman ni masacɛ barikamanw bena kolo a ye.

⁸ « ‹Ni siya min, walima ni jamana min banna ka Babilɔni masacɛ Nabukodonozɔri ka zuu ta, o kɔrɔ ko ka ban ka baara kɛ a ye, ne bena olu ɲaa gwan ni murujan ni kɔngɔ ani fɔɲɔbana ye, fɔɔ ne ka tɛmɛ ale fɛ k'u sii tunu. Ne Masaba le ko ten.

⁹ Aw do, aw kana mɛnni kɛ aw ka kiraw n'aw ka lagwɛlikɛlaw, ni sikow kɔrɔ fɔbagaw, n'aw ka kirisitigiw ni filɛlikɛlaw ka kuma na, minw b'a fɔra aw ye ko Babilɔni masacɛ tena aw wajibiya ka baara kɛ a ye.

¹⁰ U be galonkiraya le kɛra aw ye min bena kɛ sababu ye k'aw yɔrɔ jaɲa aw ka dugukolo la. Ne bena aw gwɛn ka taga, aw bena sa.

¹¹ Nga ni siya min sɔnna ka baara kɛ Babilɔni masacɛ ye, ne bena olu to ɲasuma na u ka dugukolo kan, u bena sigi yen, k'a sɛnɛ. Ne Masaba le ko ten.› »

¹² Ne y'o kuma kelen nin fɔ Zuda mara masacɛ Sedesiyasi ye ko: «Aw ka sɔn Babilɔni masacɛ ka zuu ma, aw ka baara kɛ a n'a ka jamanadenw ye, o la, aw bena to niin la.

¹³ Mun na e n'i ka jama b'a fɛ ka sa murujan ni kɔngɔ ani fɔɲɔbana bolo i ko Masaba y'a fɔ cogo min na siya o siya koo la min ma sɔn ka baara kɛ Babilɔni masacɛ ye?

¹⁴ Aw kana mɛnni kɛ kiraw fɛ minw b'a fɔra aw ye ko aw tena baara kɛ Babilɔni masacɛ ye. U be galonkiraya le kɛra aw ye.

¹⁵ Ne m'u ci. U be galonkiraya kɛra ne tɔgɔ la. Ne ben'aw gwɛn ka taga, aw bena sa, aw ni kira minw b'o kirayakuma nunu fɔ aw ye. Ne Masaba le ko ten.»

¹⁶ O kɔ, ne Zeremi y'a fɔ sarakalasebagaw, ni jama nin bɛɛ ye ko: «Masaba ko aw ka kiraw be min fɔra ko yanni dɔɔni, ko a tena mɛn, u bena segi ka na ni Masaba ka soo kɔnɔ minanw ye ka bɔ Babilɔni, aw kana u ka kuma lamɛn. U be galonkiraya le kɛra aw ye.

¹⁷ Aw kana mɛnni kɛ u fɛ. Aw ka baara kɛ Babilɔni masacɛ ye, o la, aw bena to nii na. Mun na aw b'a fɛ dugu nin ka kɛ tomo ye?

¹⁸ N'u ye kiraw ye, ni Masaba y'a ka kuma don u bolo, u ka jija ka Masaba, Setigi daali waasa minan tɔɔ min b'a ka soo kɔnɔ, ni Zuda mara masacɛ ka soo kɔnɔ ani Zeruzalɛmu kɔnɔ, o fana kana cɛ ka taga Babilɔni.

¹⁹ Bari Masaba, Setigi b'a fɔra tutunan nunu kama, ni tasaba, ni wotorow, ani minan tɔɔ minw tora dugu nin kɔnɔ koo la,

²⁰ Babilɔni masacɛ Nabukodonozɔri tun ma sɔrɔ k'o minw ta Yoyakimu ka dencɛ, Zuda mara masacɛ Yekoniya minɛtuma na, ani Zeruzalɛmu faamaw bɛɛ, ni Zuda mara taw minɛtuma na ka bɔ Zeruzalɛmu ka taga Babilɔni.

²¹ Minan tɔɔ minw tora Masaba ka soo kɔnɔ, ni Zuda mara masacɛ ka soo kɔnɔ ani Zeruzalɛmu, Masaba, Setigi, Isirayɛli ka Ala y'a fɔ olu koo la ko:

²² ‹U bena taga Babilɔni. U bena to yen fɔɔ ni ne nana n janto u la loon min na. O loon na, ne ben'a kɛ u be segi ka na yan yɔrɔ la. Ne Masaba le ko ten.› »