Yeremi 26 - ALA KA KUMA

Zeremi ni Alabatoso ɲamɔgɔw be bila ɲɔgɔn na

¹ Zoziyasi dencɛ Yoyakimu ka masaya daminɛwaati la Zuda mara la, Masaba kumana Zeremi fɛ k'a fɔ a ye ko:

² Masaba ko: «Taga lɔ ne Masaba ka soo luu kɔnɔ, ne bena kuma min bɛɛ fɔ i ye olu kosɔn, i k'o fɔ Zuda mara dugu mɔgɔw bɛɛ ye, minw be na yen ka ne bato. Hali dakuru ɲaa kelen, i kan'a tigɛ a la.

³ N'a sɔrɔ, u bena u tulo malɔ, u bɛɛ bena u ka kɛwalijuguw dabila. O la, ne tun ko n bena bɔnɛ min lase u ma u ka kɛwalijuguw kosɔn, ne bena o dabila.

⁴ I ben'a fɔ u ye ko ne Masaba ko: ‹N'aw te mɛnni kɛ ne fɛ ka ne ka sariya bato ne ye min di aw ma,

⁵ ni aw te mɛnni kɛ ne ka baarakɛlaw, kiraw fɛ, ne tora ka minw ci aw fɛ, k'a sɔrɔ aw tun te mɛnni kɛra u fɛ,

⁶ ne bena soo nin kɛ i n'a fɔ n ye Silo kɛ cogo min na, ani k'a kɛ dangafɛn ye dugukolo kan siyaw bɛɛ fɛ.› »

⁷ Sarakalasebagaw ni kiraw, ani jama bɛɛ y'u tulo malɔ Zeremi fɛ tuma min na a tun be kuma nunu fɔra Masaba ka soo kɔnɔ.

⁸ Tuma min na Zeremi ye Masaba ka cii nin bɛɛ fɔ ka ban jama bɛɛ ye, sarakalasebagaw ni kiraw, ani jama bɛɛ wilila k'a minɛ, ka to k'a fɔ ko: «I bena sa!

⁹ Mun na i be kiraya kɛ Masaba tɔgɔ la k'a fɔ ko soo nin bena kɛ i ko Silo, ani ko dugu nin bena halaki a lakolon be to?» Jama bɛɛ girinna ka Zeremi lamini Masaba ka soo kɔnɔ.

¹⁰ Zuda mara ɲamɔgɔw y'o koo nunu kibaru mɛn minkɛ, u bɔra masalu la ka taga Masaba ka soo kɔnɔ, ka sigi Masaba ka soo Dakura la.

¹¹ O tuma na, sarakalasebagaw ni kiraw y'a fɔ jamana ɲamɔgɔw ni jama bɛɛ ye ko: «Cɛɛ nin ka kan ni fagali le ye! Bari, a ye kirayakuma fɔ dugu nin kama, i n'a fɔ aw yɛrɛ y'a mɛn cogo min na.»

¹² Zeremi y'a fɔ ɲamɔgɔ nunu ni jama bɛɛ ye ko: «Aw ye min bɛɛ mɛn soo nin ani dugu nin kosɔn, Masaba le ye ne ci ka n'o kiraya kɛ.

¹³ Nga sisan, aw ka yɛlɛmani don aw taamacogo n'aw ka kɛwaliw la, ka mɛnni kɛ Masaba aw ka Ala fɛ. O la, Masaba ye bɔnɛ min latigɛ aw kama, a bena o dabila.

¹⁴ Ne kɔni, ne be aw bolo, min ka di aw ye, aw ka miiri la ko min ka kan, aw k'o kɛ ne la.

¹⁵ Nga aw k'a lɔn ko n'aw ye ne faga, mɔgɔ jalakibali joli b'aw kan, ani dugu nin mɔgɔw. Bari, Masaba le ye ne ci tiɲɛ na, ka na kuma nunu bɛɛ fɔ aw ye.»

¹⁶ O tuma na, ɲamɔgɔ nunu ni jama bɛɛ y'a fɔ sarakalasebagaw ni kiraw ye ko: «Cɛɛ nin man kan ka faga, bari a kumana an fɛ Masaba an ka Ala le tɔgɔ la.»

¹⁷ Jamana cɛkɔrɔbaw mɔgɔ damani wilila k'a fɔ jama bɛɛ lajɛnnin ye ko:

¹⁸ «Mise ka bɔ Moresɛti tun be kiraya kɛ Zuda mara masacɛ Ezekiyasi ka tile la k'a fɔ Zuda mara mɔgɔw bɛɛ ye ko Masaba, Setigi ko: ‹*Siyɔn bena sɛnɛ i ko foro, Zeruzalɛmu bena kɛ tomo ye, Alabatoso kulu bena kɛ tufin ye.›

¹⁹ Yala, Zuda mara masacɛ Ezekiyasi n'a ka jama bɛɛ y'a faga wa? U siranna Masaba ɲa k'a daali. O la, Masaba tun ye bɔnɛ min latigɛ u kama, a y'o dabila. Anw fana do? Anw bena bɔnɛba lase an yɛrɛ ma wa?»

Kira dɔ be faga

²⁰ Cɛɛ dɔ fana tun ye kiraya kɛ Masaba tɔgɔ la. Semayawu dencɛ Uriyawu tun lo ka bɔ Kiriyati Yoyarimu. Zeremi tun ye kirayakuma min fɔ dugu nin, ani jamana nin halakiko la, ale fana y'o koo kelen fɔ.

²¹ Masacɛ Yoyakimu n'a ka kɛlɛdenw, n'a ka jamana ɲamɔgɔw bɛɛ y'a mɛn minkɛ, masacɛ ko a b'a faga. Uriyawu y'o kibaru mɛn, a siranna ka boli ka taga Ezipiti jamana na.

²² Nga masacɛ Yoyakimu ye Akubɔri dencɛ Ɛlinatan ni mɔgɔ damani ci Ezipiti.

²³ U ye Uriyawu minɛ yen ka n'a di masacɛ Yoyakimu ma, a y'a faga k'a suu fili foroba kaburu kɔnɔ.

²⁴ Nga Zeremi tun be Safan dencɛ Ayikamu ka sutara la, o la, a ma se ka don jama bolo ka faga.