Yeremi 25 - ALA KA KUMA

Zeremi be kiraya kɛ

¹ Kuma min fɔra Zeremi ye Zuda mara mɔgɔw bɛɛ kosɔn, Zoziyasi dencɛ Yoyakimu ka masaya saan naaninan na Zuda kunna, min tun kɛra Babilɔni masacɛ Nabukodonozɔri ka masaya saan fɔlɔ ye, o filɛ.

² Kira Zeremi y'o kuma fɔ Zeruzalɛmukaw bɛɛ ye ani Zuda mara mɔgɔw bɛɛ ye. Ko:

³ «Kabini Amɔn deen Zoziyasi saan tan ni sabanan na Zuda mara kunna, fɔɔ ka na se bii ma, a saan mugan ni saba ye, Masaba kumana ne fɛ. Ne fana ma o fɔko dabila aw ye, nga aw ma mɛnni kɛ.

⁴ «Masaba tora k'a ka baarakɛlaw, kiraw bɛɛ ci aw ma, nga aw ma mɛnni kɛ, aw m'aw tulo malɔ.

⁵ O tun y'a fɔ aw ye ko: ‹Aw kelen kelen bɛɛ k'aw ka sirajugu taama n'aw ka kɛwalijuguw dabila, o la, Masaba tun ye dugukolo min di aw n'aw faaw ma. Kabini tumajan, aw bena to o kan tuma bɛɛ.

⁶ Aw kana tugu batofɛn wɛrɛw kɔ k'u sɔn. Aw kana ale dusu dimi n'aw ka bolola dilanfɛnw ye. O la, a tena kojugu si kɛ aw la.›

⁷ «O bɛɛ n'a ta, aw ma mɛnni kɛ ale fɛ. Bari aw y'a dusu dimi n'aw bolola dilanfɛnw ye, minw kɛra aw ka bɔnɛ sababu ye.» Masaba le ko ten.

⁸ O kama, Masaba, Setigi ko: «Aw ma mɛnni kɛ ne fɛ minkɛ,

⁹ ne ben'a to kɔgɔdugu ɲafan siyaw bɛɛ k'u lajɛn Babilɔni masacɛ Nabukodonozɔri, ne ka baarakɛla kɔ, ka wili jamana nin, n'a kɔnɔ mɔgɔw ani a gɛrɛfɛsiyaw bɛɛ kama. Ne bena u halaki pepewu ka yɔrɔ nin kɛ dusukasi ni kaba ani lɔgɔbɔyɔrɔ ye. A bena kɛ tomo ye tuma bɛɛ. Ne Masaba le ko ten!

¹⁰ Ne ben'a to dusudiya ni nisɔndiya yɛlɛkan, ani kɔɲɔya mankan, wugu kaan ani fitinɛ yeelen kana sɔrɔ u fɛ tugu.

¹¹ Jamana nin bɛɛ bena kɛ tomo ni dusukasiyɔrɔ ye. Siya nunu bena baara kɛ Babilɔni masacɛ ye fɔɔ saan bi wolonwula.

¹² «Nga ni saan bi wolonwula nunu dafara, ne bena wili Babilɔni masacɛ n'a ka jamana mɔgɔw kama u ka kojuguw kosɔn k'u ka yɔrɔ kɛ dusukasiyɔrɔ ye tuma bɛɛ. Ne Masaba le ko ten!

¹³ Ne ye kuma minw bɛɛ fɔ siya nin kosɔn, min bɛɛ sɛbɛnnin be kitabu nin kɔnɔ. Zeremi ye kirayakuma minw fɔ siyaw bɛɛ kosɔn, ne ben'a to o bɛɛ ka kɛ.

¹⁴ Siya caaman ni masacɛbaw bena u kɛ jɔɔnw ye. Ne bena u sara ka kɛɲɛ n'u ka kɛwaliw an'u bolola dilanfɛnw ye.»

Masaba ka fariya be i n'a fɔ dɔrɔ

¹⁵ Masaba, Isirayɛli ka Ala y'a fɔ ne ye ko: «Dɔrɔfiyɛ nin minɛ n bolo, dɔrɔ min b'a kɔnɔ, o ye n ka dimi le ye. Ne bena i ci siya minw bɛɛ fɛ, i k'a di u ma u k'a min.

¹⁶ U ben'a min ka talontalon, ka fatɔya murujan yeli kosɔn, ne bena min wili u cɛma.»

¹⁷ Ne ye dɔrɔ nin minɛ Masaba bolo k'a di siya nunu bɛɛ ma. A ye ne ci minw fɛ, u y'a min:

¹⁸ Zeruzalɛmukaw, ni Zuda mara duguw mɔgɔw, u ka masaw n'u ɲamɔgɔw, waasa k'u ka yɔrɔ kɛ tomo ni dusukasi ni kaba ani lɔgɔbɔyɔrɔ ye, i n'a fɔ a be cogo min na bii.

¹⁹ Ezipiti masacɛ n'a ka dakɔrɔsigiw, n'a ka jamana ɲamɔgɔw ani jamanadenw bɛɛ,

²⁰ ni siya ɲagamininw bɛɛ, ni Usi jamana masaw bɛɛ, ni Filisi jamana taw bɛɛ: minw be Asikalɔn, ni Gaza, ani Ekurɔn, ni mɔgɔ tɔɔ min tora Asidɔdi kɔnɔ,

²¹ edɔmuw, ni mowabuw, ani amoniw,

²² Tiri ni Sidɔn masaw bɛɛ, ani masacɛ minw bɛɛ be dugukolo kan kɔgɔji cɛma,

²³ dedanw, Tema mara mɔgɔw, Buzi mara mɔgɔw, ani minw be to ka bonbosili landa kɛ,

²⁴ ni arabuw ka masaw bɛɛ, ni siya ɲagamininw ka masaw bɛɛ, minw siginin be kongololon kɔnɔ.

²⁵ Zimuri mara ni Elamu jamana masaw bɛɛ, ani Mɛdi jamana masaw bɛɛ,

²⁶ ni kɔgɔdugu ɲafan masaw bɛɛ, minw yɔrɔ ka surun, ani minw yɔrɔ ka jan. Jamana kelen kelen bɛɛ minw be dugukolo kan, olu bɛɛ mɔgɔw ye minni kɛ ka tugu ɲɔgɔn kɔ. Sesaki masacɛ le y'a min u bɛɛ kɔ.

²⁷ A fɔ u ye ko ne Masaba, Setigi, Isirayɛli ka Ala ko: «Aw k'a min ka fa, ka fɔɔnɔ, ka ben ka wili ka dɛsɛ murujan yeli fɛ, ne bena min wili aw cɛma.»

²⁸ N'u banna ka dɔrɔ nin minɛ i bolo k'a min, i k'a fɔ u ye ko: «Masaba, Setigi ko aw bena na a min cɔ!

²⁹ Bari, ne tɔgɔ lara dugu min kan, ne bena kɔn ka tɔɔrɔ la ale lo kan. Aw be miiri ko aw bena kisi o ma wa? Ayi! Aw tena kisi. Bari ne yɛrɛ le ben'a kɛ murujan be wili diɲɛ mɔgɔw bɛɛ kama. Ne Masaba, Setigi le ko ten!

³⁰ «Ele Zeremi, i bena o kirayakuma nin bɛɛ fɔ u ye ani k'a fɔ fana ko: ‹Masaba sɔngɔkan be bɔra sanfɛ i ko jara, a tor'a sigiyɔrɔ saniyanin na k'a kaan bɔ. A be sɔngɔra i ko jara, a be sɔngɔra kosɔbɛ a ka mɔgɔw kunna. A be pɛrɛnna i ko *ɛrɛzɛnji bɔbagaw. O be kɛra diɲɛ mɔgɔw bɛɛ kama.

³¹ A mankan sera fɔɔ diɲɛ daan na, bari Masaba be siyaw kitiko daminɛna. Adamadenw bɛɛ bena kiti. Minw jalakinin lo, a ben'a to murujan be se olu ma.› Masaba le ko ten.»

³² Masaba, Setigi ko: «Bɔnɛ nin be jɛnsɛnna siyaw cɛma ka to ka taga. Sanfɔɲɔba dɔ be wilila diɲɛ daan na.»

³³ Masaba bena mɔgɔ minw halaki o loon, u suuw lalanin bena to yɔrɔ bɛɛ dugukolo kan, u sanga tena kɛ, u suuw tena ta, u suuw tena don, u bena kɛ dugukolo ka nɔgɔ ye.

³⁴ Aw ye kasi, jama marabagaw, aw ye kule! Aw ye kolonkolon duguma, jama ɲamɔgɔw. Bari aw fagatuma sera, aw bena faga i ko sagajigi kɔgɔninw.

³⁵ Kalifayɔrɔ te jama marabagaw fɛ tugu, dogoyɔrɔ te jama ɲamɔgɔw fɛ tugu.

³⁶ Aw ka jama marabagaw kasikan mɛn, jama ɲamɔgɔw be kulera, bari Masaba b'u ka mara halakira.

³⁷ Masaba dimikojugu be yɔrɔ ɲanaman nunu sumaya tɔntɔntɔn!

³⁸ A be bɔra i ko jara be bɔ a layɔrɔ la cogo min. U ka jamana be kɛra dusukasiyɔrɔ ye, murujan fariya kosɔn, Masaba dimikojugu fɛ.