Yeremi 24 - ALA KA KUMA

Toro sinsin fila

¹ Masaba ye sinsin fila yira ne la, toro be minw kɔnɔ, u bilanin be a ka soo daa la. O y'a sɔrɔ, Babilɔni masacɛ Nabukodonozɔri tun ye Zuda mara masacɛ Yekoniya, Yoyakimu dencɛ minɛ ka bɔ Zeruzalɛmu, ka taga n'a ye Babilɔni, ni Zuda mara ɲamɔgɔw, ani bololabaarakɛlaw ni numuw.

² Sinsin kelen kɔnɔ, torow tun ka ɲi kosɔbɛ, i n'a fɔ toro deen fɔlɔw. Tɔɔ kelen nin kɔnɔ, torow tun ma ɲi fewu. U cɛnkojugu fɛ, u tun te se ka dumu yɛrɛ.

³ O tuma na, Masaba y'a fɔ ne ye ko: «Zeremi, i be mun le yera?» Ne y'a jaabi ko: «Ne ɲaa be torow la, dɔw ka ɲi kosɔbɛ. Minw ma ɲi, olu cɛnna fɔɔ u te se ka dumu.»

⁴ O tuma na, Masaba y'a fɔ ne ye ko:

⁵ «Ne Masaba, Isirayɛli ka Ala ko: Toro nunu ka ɲi cogo min na, ne bena Zuda mara mɔgɔw jati ten, ka hɛrɛ kɛ u ye. Ne tun ye minw gwɛn ka bɔ yan yɔrɔ la ka taga n'u ye Babilɔnikaw ka jamana la.

⁶ Ne bena janto u la k'a kɛ u be segi jamana nin kɔnɔ. Ne bena sigicogo bɛrɛbɛrɛ d'u ma, n te na na u halaki. U bena sigi ka ɲa i n'a fɔ yiri, n te na na u bɔ yen tugu.

⁷ Ne bena hakili di u ma min ben'a to u k'a lɔn ko ne le ye Masaba ye. Ne be kɛ u ka Ala ye, u be kɛ ne ka mɔgɔw ye. Bari u bena sɔn ne ma n'u dusu bɛɛ ye.

⁸ «Nga n bena Zuda mara masacɛ Sedesiyasi n'a ka mara ɲamɔgɔw, ni Zeruzalɛmuka tɔw minw tora jamana nin kɔnɔ, ani minw tagara sigi Ezipiti jamana la kɛ i ko toro min cɛnna fɔɔ a te se ka dumu. Ne Masaba le ko ten!

⁹ Ne mana u gwɛn ka taga jamana o jamana la, ne bena u kɛ siranyafɛnw ye, maloyafɛnw, yɛlɛbɔfɛnw, lɔgɔbɔfɛnw ani dangafɛnw ye.

¹⁰ Ne bena murujan bila ka na u kama, ni kɔngɔ ani fɔɲɔbana fɔɔ k'u sii tunu ka bɔ dugukolo nin kan. Ne tun ye min di olu ni u faaw ma.»