Yeremi 23 - ALA KA KUMA

Masacɛba nata

¹ «Ɲamɔgɔ minw be ne ka mɔgɔw jɛnsɛn k'u tunu i ko begɛnw, n ka dumuni kɛyɔrɔ la, bɔnɛ ye u ta ye. Ne Masaba le ko ten!

² O le kosɔn, ne Masaba, Isirayɛli ka Ala be kumana ɲamɔgɔw kosɔn, minw ye ne ka mɔgɔw marabagaw ye, ko: Aw ye ne ka mɔgɔw jɛnsɛn k'u gwɛn, aw m'aw janto u la. O kama, ne yɛrɛ bena wili aw kama aw ka kɛwalijuguw kosɔn.

³ Ne ka mɔgɔw tɔɔ min tora, ne yɛrɛ bena na olu lajɛn ka bɔ jamanaw bɛɛ la, ne tun y'u gwɛn ka taga yɔrɔ minw na. Ne bena segi n'u ye u ka yɔrɔ la. U bena wolo ka caya.

⁴ Ne bena ɲamɔgɔw sigi u kunna minw bena u mara. Siranya tena u minɛ tugu, u tena yɛrɛyɛrɛ, u si tena tunu. Ne Masaba le ko ten.»

⁵ Masaba ko: «Loonw be na, ne bena mɔgɔtilennin bɔ Dawuda kɔmɔgɔw la min bena sigi masaya la, ka jamana mara ni hakilitigiya ye. A bena tilenninya ni hɔrɔnya kɛ jamana kɔnɔ.

⁶ Ale ka tile la, Zuda mara mɔgɔw bena kisi, Isirayɛli mara mɔgɔw bena sigi lafiya la. A bena wele ko: Masaba ye an ka koɲanabɔla ye.»

⁷ Masaba ko: «Loonw be na, a tena fɔ tugu ko: ‹Masaba kosɔn, min ye Isirayɛlidenw bɔ Ezipiti jamana la.›

⁸ Nga a bena fɔ ko: ‹Masaba kosɔn, min ye Isirayɛlidenw bɔ kɔgɔdugu ɲafan fɛ ani a tun y'o gwɛn ka taga jamana minw bɛɛ la ka na don n'u ye,› waasa u ka sigi u yɛrɛw ka dugukolo kan.»

Bɔnɛ be se galonkiraw ma

⁹ Kuma min fɔra kiraw kosɔn, o ye: Ne dusu kasinin lo, ne fari bɛɛ be yɛrɛyɛrɛla. Ne kɛra i ko dɔrɔtɔ, dɔrɔ ye min minɛ ka ban, Masaba n'a ka kuma senuman kosɔn.

¹⁰ Bari jamana fanin be kakalaw la. Jamana be dusukasi la danga kosɔn, kongokolon kɔnɔ biinw jara. Mɔgɔw be boli kojugu le nɔɔ fɛ, u b'u jija tilenbaliyakow la.

¹¹ «Alaɲasiran te kiraw ni sarakalasebagaw la! Ne b'u ka juguya yera hali n ka soo kɔnɔ. Ne Masaba le ko ten!

¹² O kama, o ka sira bena nɔgɔnɔgɔ ani ka dibi, u bena ben. Bari, ne bena bɔnɛ dɔ lase u ma, saan min na ne bena wili u kama. Ne Masaba le ko ten!

¹³ «Ne ye konɔgɔnin ye Samari mara kiraw fɛ. U tun be kirayakuma fɔra *Baali tɔgɔ la. U tun be ne ka jama Isirayɛli lafili ten.

¹⁴ Nin ye kojugu yɛrɛ yɛrɛ le ye Zeruzalɛmu kiraw fɛ. U be kakalaya kɛ, ka galon tigɛ tuma bɛɛ, ka barika don kojugukɛlaw la janko mɔgɔ si kan'a ka kojugukɛ dabila. U bɛɛ kɛra i ko Sodɔmukaw, ne fɛ. Zeruzalɛmukaw be i ko Gɔmɔrikaw.»

¹⁵ O kama, Masaba, Setigi b'a fɔ kiraw kosɔn ko: «Ne bena fɛɛn kunaman d'u ma ka dumu, ne ben'a kɛ u be bagaji min. Bari, Alaɲasiranbaliya bɔra Zeruzalɛmu kiraw le fɛ ka fanga sɔrɔ jamana yɔrɔ bɛɛ la.»

Kira galontigɛlaw

¹⁶ Masaba, Setigi ko: «Aw kana mɛnni kɛ kiraw ka kuma la, u b'aw namarara le. U be kirayakuma minw fɔra, o ye u yɛrɛw ka miiriya le ye. O kuma nunu ma bɔ ne Masaba fɛ.

¹⁷ Mɔgɔ minw be ban ka ne ka kuma bato, u be sɔn k'a fɔ olu ye ko: ‹Masaba ko: Aw bena hɛrɛ sɔrɔ.› Mɔgɔ minw bɛɛ b'u kuun gwɛlɛya k'u yɛrɛ sago kɛ, u b'a fɔ olu ye ko: ‹Kojugu si tena aw sɔrɔ.›

¹⁸ Jɔn le sigira ni Masaba ye n'a y'a ka kuma fɔ a ɲana? Jɔn le y'a ye k'a lamɛn kosɔbɛ k'a faamu?

Masaba ka dimi

¹⁹ «Sanfɔɲɔba dɔ wilila! Masaba ka dimi lo. A fariyara ka kɛ fununfunun ye mɔgɔjuguw kunna.

²⁰ Masaba ka dimi nin tena ban n'a m'a sago kɛ k'a dafa. Loon dɔ, aw ben'a faamu ka gwɛ.

²¹ Ne ma kira nunu ci dɛ! U do b'a la ka boliboli. Ne ma kuma u fɛ, u do b'a la ka kiraya kɛ.

²² N'u tun sigira ni ne ye ka n ka kuma mɛn, u tun bena o fɔ n ka mɔgɔw ye. O la, olu tun bena u ka sirajuguw bila, ani k'u ka kɛwalijuguw dabila.»

Masaba be yɔrɔ bɛɛ

²³ Masaba ko: «Ne ye Ala ye min be yeli kɛ yɔrɔsurun na dama wa? Ayi, ne ye Ala ye min be yeli kɛ yɔrɔjan na fana.

²⁴ Adamaden mana dogo yɔrɔ o yɔrɔ, ne ɲaa b'a la. Ne Masaba le ko ten! Ne be sankolo ni dugukolo yɔrɔ bɛɛ la! Ne Masaba le ko ten!

Sumankisɛ n'a ɲaga

²⁵ «Kira minw be galon tigɛra ne tɔgɔ la, ne b'u ka fɔta mɛnna. U ko: ‹Ne sikora, ne sikora!›

²⁶ Miiriya nin ben'a to kira nunu kɔnɔ fɔɔ tuma jumɛn, olu minw be galonkiraya kɛ k'u ka miiriyakolon fɔ?

²⁷ U b'o siko minw lakalila ɲɔgɔnw ye, u b'a fɛ k'a kɛ n ka mɔgɔw ka ɲinɛ ne kɔ, i ko u faaw tun ɲinɛna ne kɔ cogo min na *Baali kosɔn.

²⁸ Ni kira min sikora, o k'a ka siko lakali. Ni mɔgɔ min ye ne ka kuma mɛn, o k'o fɔ ka tilen. Sumankisɛ n'a ɲaga be se ka jati kelen ye wa? Ne Masaba le ko ten!

²⁹ Ne ka kuma te i ko tasuma wa? A te i ko marito min be kabakuru ci wa? Ne Masaba le ko ten!»

³⁰ Masaba ko: «O le y'a to ne be wili kiraw kama. Olu minw be ne ka kuma namara u ni ɲɔgɔnw cɛ.

³¹ Ne bena wili kiraw kama. Olu minw b'u daa diya gwansan k'u ka kuma ye ne ta ye. Ne Masaba le ko ten!

³² Kira minw b'u ka sikokolonw kiraya kɛ, ne bena wili olu kama. Ne Masaba le ko ten! Olu minw be siko nunu lakali ka ne ka mɔgɔw lafili n'u ka galonw n'u ka yɛrɛboɲa ye. Ne m'u ci dɛ! Ne ma sira fana di u ma. U te foyi ɲa mɔgɔ nunu ye. Masaba le ko ten!

Masaba ka doni

³³ «Ni mɔgɔ nunu, walima kira dɔ, walima sarakalasebaga dɔ y'i ɲininga ko: ‹Masaba ka doni ye mun le ye?›, i ka u jaabi ko: Masaba ko: ‹Aw le ye ne Masaba ka doni ye. O la, ne bena aw fili!›

³⁴ Ni kira min, walima sarakalasebaga, walima mɔgɔ wɛrɛ man'a fɔ ko: ‹Masaba ka doni ye mun ye?› N bena o tigi n'a ka soo ɲaa gwan.

³⁵ Aw ka ɲi ka to k'a fɔ aw ni ɲɔgɔn cɛ ko: ‹Masaba ka jaabi ye jumɛn ye?› Walima: ‹Masaba ye mun le fɔ?›

³⁶ Nga, aw man kan k'a fɔ tugu ko Masaba ka doni. Aw kelen kelen bɛɛ ka kuma le ye aw ka doni ye, bari aw be Ala ka kuma kɔrɔ yɛlɛma, Masaba, Setigi, an ka Ala.

³⁷ Kira ka kan ka ɲininga ni min ye, o filɛ: ‹Masaba y'i jaabi ko di?› Walima: ‹Masaba ye mun fɔ?›

³⁸ Nga n'aw tora k'a fɔ: ‹Masaba ka doni›, k'a sɔrɔ ne y'aw lasɔmi ko aw kan'o fɔ,

³⁹ ne bena aw ɲun i n'a fɔ doni, k'aw fili fɔɔ yɔrɔjan ka bɔ n ɲakɔrɔ! Aw ni dugu nin bɛɛ, ne tun ye min di aw n'aw faaw ma.

⁴⁰ Ne bena maloya bila aw kunna min tena ban ka ye. Aw kuun surunnin na to tuma bɛɛ. Mɔgɔw tena ɲinɛ min kɔ.»