Yeremi 20 - ALA KA KUMA

¹ Imɛri dencɛ Pasewuri, min ye sarakalasebaga ye, ni Masaba ka soo ɲamɔgɔ, ale ye Zeremi ka kirayakuma nunu mɛn,

² a ye kira Zeremi bugɔ k'a minɛ ka ta'a siri Masaba ka soo donda la min be sanfɛ, u be min wele ko Bɛnzamɛn ka daa.

³ A dugusagwɛ, a y'a to u ye Zeremi foni. O tuma na, Zeremi y'a fɔ a ye ko: «Masaba te e tɔgɔ wele Pasewuri tugu, a ye tɔgɔ min la i kan, o ye: ‹Jatigɛ be faan bɛɛ.›

⁴ Bari a b'a fɔra ko: ‹A ye, ne ben'a to e n'i teriw bɛɛ jaa be tigɛ. Olu juguw bena u faga ni murujanjanw ye i ɲana. Ne bena Zuda mara mɔgɔw bɛɛ fana don Babilɔni masacɛ bolo. A bena dɔw faga ni murujan ye, ka dɔw minɛ ka taga n'u ye Babilɔni.

⁵ Dugu nin nafolo bɛɛ, a ka sɔrɔ bɛɛ, fɛɛn minw bɛɛ koo ka gwɛlɛ a ma, ani Zuda mara masacɛw ka nafolow bɛɛ, ne bena olu bɛɛ don u juguw bolo, u be ben u kan k'u bɛɛ cɛ ka taga n'u ye Babilɔni.

⁶ Ele Pasewuri n'i ka somɔgɔw bɛɛ bena minɛ ka taga, i bena se Babilɔni, ka sa yen, i suu bena don yen, e n'i teriw bɛɛ, i ye galonkiraya kɛ minw ye.› »

Kira b'a ka dusudimi fɔ Masaba ye

⁷ Masaba, i ye ne sɔrɔ, ne y'a to i ye ne sɔrɔ. I ye ne minɛ, i ye see sɔrɔ. Tile mumɛ, bɛɛ u be ne kɛ yɛlɛfɛn ye, bɛɛ be yɛlɛ ne ma.

⁸ Bari ni ne be kuma, fɔɔ ne ka kule, ka benkanni ni halakili koo wango la. Masaba ka kuma kɛra ne lɔgɔbɔ sababu ni ne kɔrɔfɔkun ye tile mumɛ kɔnɔ.

⁹ Ni ne ko: «Ne ten'a koo fɔ tugu, ne tena kuma a tɔgɔ la tugu,» ne kɔnɔ be gwan papa i ko tasuma. A be i ko tasuma be ne kɔnɔ, n'a te se ka bɔ. Ne b'a muɲu ka dɛsɛ, ne te se.

¹⁰ Mɔgɔ caaman be ŋunuŋununa, ne b'o mɛnna. U ko: «Jatigɛ be yɔrɔ bɛɛ! Aw y'a koo fɔ, an ben'a koo fɔ!» Ne ni mɔgɔ minw tun bɛnnin lo, olu bɛɛ be ne dɛndɛna k'a filɛ ni ne bena fili. U ko: «N'a sɔrɔ, a ben'a to an b'a sɔrɔ cɔ! An bena s'a kɔrɔ k'an dimi bɔ a la!»

¹¹ Nga Masaba be ni ne ye i ko kɛlɛmasaŋana! Ne tɔɔrɔbagaw bena talon, u te na see sɔrɔ. U bena dɛsɛ, o maloya bena to u kunna fɔɔ tuma bɛɛ, mɔgɔw tena ɲinɛ a kɔ ka ye.

¹² Masaba, Setigi, ele min be mɔgɔtilenninw ka koo sɛgɛsɛgɛ, ele min be mɔgɔw kɔnɔnako n'u ka miiriyaw lɔn, i k'i mɔnɛ bɔ n juguw la, ne k'o ye. Bari ne ye n ka koo to i bolo.

¹³ Aw ka dɔnkili la Masaba ye, aw k'a tanu! Bari a ye dɛsɛbagatɔ nii kisi mɔgɔjuguw bolo ma.

¹⁴ Ne wololon ka bɔ jatili la! Ne bamuso ye ne wolo loon min na, o loon kana kɛ duba loon ye!

¹⁵ Mɔgɔ min tagara ne woloko fɔ ne facɛ ye k'a nisɔndiya ko: «I ye dencɛ sɔrɔ,» o tigi ka danga!

¹⁶ O tigi ka kɛ i ko Masaba ye dugu minw halaki pewu. Sɔgɔma, a k'a kulekanw mɛn, tilegwanfɛ, a ka kɛlɛdenw pɛrɛnkan mɛn.

¹⁷ Bari a m'a to ne ka sa n baa kɔnɔ. Ne bamuso tun bena kɛ ne kaburu ye, a kɔnɔ nin tun tena mɔ abada.

¹⁸ Mun na ne wolola, waasa ka tɔɔrɔ ni dusukasi sɔrɔ, ani ka maloya fɔɔ n sii laban na wa?