Yeremi 16 - ALA KA KUMA

Zeremi be sigi a kelen na

¹ Masaba kumana ne fɛ ko:

² «Kana muso furu, kana deen cɛman walima musoman sɔrɔ yɔrɔ nin na.»

³ Bari deen cɛman ni musoman minw wolola yɔrɔ nin na, Masaba ye min fɔ olu kosɔn, n'u faaw, ani u baaw kosɔn, o filɛ:

⁴ «Banajuguw le bena u faga. U sanga tena kɛ, u suu yɛrɛ tena don, u bena kɛ i n'a fɔ nɔgɔ dugukolo kan. Murujan ni kɔngɔ bena u halaki. U suuw be kɛ kɔnɔw ni kongosogow ka dumuni ye.»

⁵ Masaba y'a fɔ tugu ko: «Kana don sangabon kɔnɔ, kana taga sangayɔrɔw la kana sangafoli kɛ. Bari, ne ye n ka hɛrɛ ni n ka ɲumanya, ani n ka makari bɔ nin siya nin kan. Ne Masaba le ko ten.

⁶ Waritigiw ni fantanw bena sa jamana nin kɔnɔ. U suu tena don, sanga tena kɛ u ye. Fari tigɛtigɛ ani kunli landaw tena kɛ u ye.

⁷ Mɔgɔ si tena dumuni bɔ ka taga di sangatigi ma waasa k'a dusu saalo, mɔgɔ si tena taga dusu saalo jifilen d'a ma k'a ka hami nɔgɔya a faa kosɔn, walima a baa kosɔn.

⁸ «Kana don dumuniba kɛbon kɔnɔ, ka sigi n'u ye ka dumuni kɛ ka minni kɛ.

⁹ Bari ne Masaba, Setigi, Isirayɛli ka Ala ko: Nisɔndiya ni ɲanagwɛ kaanw, kɔɲɔcɛ ni kɔɲɔmuso ka dɔnkiliw kaanw, ne ben'a to o be je aw ɲakɔrɔ, aw ka tile la.

¹⁰ «N'i y'o bɛɛ fɔ u ye, n'u y'a fɔ i ye ko: ‹Mun na Masaba y'o balawuba bɛɛ latigɛ anw kama? An ye mun le cɛn? An ye kojugu jumɛn le kɛ ka Masaba an ka Ala hakɛ ta?›

¹¹ O tuma na, i bena u jaabi ko bari u faaw ye ne labila ka boli batofɛn wɛrɛw kɔ, k'u sɔn ka to ka biri u ɲafɛ. U ye ne labila, u ma ne ka sariya bato. Ne Masaba le ko ten.

¹² Aw ka kɛwaliw juguyara n'aw faaw ta ye. Aw kelen kelen bɛɛ be taga ɲa a ka juguya la, ka tulogwɛlɛya kɛ, aw te mɛnni kɛra ne fɛ.

¹³ O la, ne bena aw gwɛn ka bɔ jamana nin kɔnɔ k'aw bila ka taga yɔrɔ la aw te min lɔn, aw faaw ma min lɔn fana. Aw bena batofɛn wɛrɛw sɔn o yɔrɔ la suu ni tile. Bari ne tena makari aw la tugu.»

Isirayɛlidenw kɔsegiko

¹⁴ Masaba ko: «Loonw be na, a tena fɔ tugu ko: ‹Masaba kosɔn, ale min ye Isirayɛlidenw bɔ Ezipiti jamana na!›

¹⁵ Nga a bena fɔ ko: ‹Masaba kosɔn, ale min ye Isirayɛlidenw bɔ kɔgɔdugu ɲafan jamana na, ani a tun y'u gwɛn ka taga jamana tɔ minw bɛɛ la!› Ne bena segi n'u ye u ka jamana kɔnɔ ne tun ye min di u faaw ma.

Kojugukɛlaw bɛɛ bena minɛ

¹⁶ «Ne bena mɔnikɛla caaman ci. Ne Masaba le ko ten. U bena u minɛ. O kɔ, n bena donso caaman ci, minw bena u yaala kuluw ni tintinw bɛɛ kan, ani farawow la.

¹⁷ Ne ɲaa be u ka kɛwaliw bɛɛ la. U ma dogo n la. U ka kojugu nunu dogonin tɛ ne la.

¹⁸ Ne bena kɔn k'u ka hakɛw n'u ka kojuguw juru sara bɔ u la fɔɔ siɲɛ fila. Bari u ye ne ka jamana nɔgɔ n'u ka joow ye minw be i n'a fɔ suuw, ka ne ka yɔrɔ fa n'u ye.»

Masaba tɔgɔ lɔnko

¹⁹ Masaba, e min be fanga di ne ma, ani ka ne tanga, e min ye ne dogoyɔrɔ ye waatigwɛlɛn na, siyaw bena bɔ diɲɛ daan na ka na ele fɛ k'a fɔ ko: «Foyi tun te an faaw fɛ fɔɔ batofɛnkolon dɔrɔn, joo kuntan minw tun te foyi ɲa.

²⁰ Mɔgɔ te se ka batofɛn dilan a yɛrɛ ye. A be min dilan, batofɛn halala tɛ.»

²¹ Masaba ko: «Ayiwa, ne bena lɔnniya d'u ma. Sisan, ne bena n seko ni n ka sebagaya yira u la. O la, u ben'a lɔn ko ne tɔgɔ le ko Masaba.