Yeremi 15 - ALA KA KUMA

Manase ka kojugu nɔɔ

¹ Masaba y'a fɔ ne ye ko: «Hali ni Musa ni Samuyɛli ye ne daali mɔgɔ nunu kosɔn, u makari tena ne minɛ! U gwɛn ka bɔ ne ɲakɔrɔ! U ka taga!

² N'u y'i ɲininga ko: ‹An ka kan ka taga min?›, i k'u jaabi ko: ‹Masaba ko: Mɔgɔ min ka kan ka faga, o ka faga. Min ka kan ka faga ni murujan ye, o ka kɛ. Min ka kan ni kɔngɔ ye, kɔngɔ k'o tɔɔrɔ. Min ka kan ka minɛ ka taga, o ka taga.›

³ «Ne be bɔnɛ naani le ci u ma. Ne Masaba le ko ten. U bena faga ni murujan ye, wuluw b'u kooro, kɔnɔw ni kongosogow b'u dumu, k'u ban.

⁴ Ne bena u kɛ siranyafɛnw ye jamanaw bɛɛ mɔgɔw fɛ. Zuda mara masacɛ Manase, Ezekiyasi deen ye min kɛ Zeruzalɛmu, o bena kɛ o le kosɔn.

Makari t'a la tugu

⁵ «Jɔn le be makari e la sa, Zeruzalɛmu? Jɔn le b'i dusu saalo? Jɔn le b'a yɛrɛ sɛgɛn ka taga i koo kibaruya ɲininga?

⁶ Ele lo banna ne la. E y'i kɔɔ sin ne ma. O la, ne wilila janko k'i halaki, n sigɛnna i fɛ, n te makari tugu. Ne Masaba le ko ten.

⁷ Ne bena n ka mɔgɔw fiyɛ i ko suman, jamana kɔnɔ. Ne ben'a kɛ u be bɔnɔ u deenw la, ne bena u halaki. Bari u ma u taamacogo yɛlɛma.

⁸ Ne bena u ka firiyamusow caya ka tɛmɛ kɔgɔji daa la cɛncɛn kan. Ne bena cɛnnikɛla bila ka na tilegwangwan fɛ ka na kanbelen bamuso kama. Dusukasi ni jatigɛko bena cun a kan.

⁹ Deen cɛman wolonwula tun be muso min fɛ, ale bena nagasi, a ninakili bena degun. Suu bena ko ale fɛ k'a sɔrɔ tilefɛ lo. A bena maloya, a kuun bena surun. Mɔgɔ tɔɔ minw tora, ne bena u juguw bila u la ni murujan ye.» Masaba le ko ten.

Zeremi be tɔɔrɔla Masaba kosɔn

¹⁰ Bɔnɛ ye ne ta ye! Mun na ne wolola? Ne le kɛra sɔsɔlikɛla ni kɛlɛtigɛla ye jamanadenw bɛɛ fɛ. N ma juru don, n ma juru ta, bɛɛ do be n dangara.

¹¹ Masaba ko: «Tiɲɛ na, i ka koo tɔɔ laban ye hɛrɛ le ye, ne ben'a kɛ i jugu b'i daali ɲagwantuma ni waatigwɛlɛn na.

¹² «Nigɛ min ɲagaminin lo ni zira ye, mɔgɔ te se k'o kari. Aw fana tena se aw juguw kɔrɔ minw bena bɔ kɔgɔdugu ɲafan fɛ.

¹³ Ne ben'a to u b'i ka nafolo bɛɛ cɛ. O bena kɛ i ka kojugu bɛɛ sara ye, i ye minw kɛ jamana kɔnɔ.

¹⁴ Ne bena i kɛ i juguw ka jɔɔn ye jamana kɔnɔ, i te min lɔn. Bari, ne dusu gwanna aw kɔrɔ, a do be jɛnina i ko tasuma aw kama.»

¹⁵ I b'a lɔn sa, Masaba! I hakili to n na ka n dɛmɛ. Ne mɔnɛ bɔ n tɔɔrɔbagaw la. Kana to ka muɲu u kɔrɔ fɔɔ u ka ne faga. I k'a lɔn ko ne be nɛnili muɲuna e le kosɔn.

¹⁶ I ka kuma mana se ne ma, ne b'a minɛ kosɔbɛ. A be nisɔndiya di ne ma, ka ne dagamu. Bari, ne y'i ta ye, Masaba, Setigi Ala.

¹⁷ Ne ma sigi ka nisɔndiya ka ye jagabɔlaw fɛ. I ka sebagaya kosɔn, ne be to n danna, i y'a kɛ ne dusu tun diminin lo.

¹⁸ Mun na ne ka tɔɔrɔ te banna ka ye? Mun na ne ka joli te banna? Mun na a be ban furaw bɛɛ ma? O tuma na, e kɛra ne fɛ i ko kɔjugu le wa, mɔgɔ te la min jii la?

¹⁹ O la, Masaba ko: «N'i segira ne ma, ne bena sɔn i ma, e bena n ka baara kɛ. N'i ye kuma fuw dabila ka to ka kumasɔbɛ fɔ, i bena kɛ ne ka dalaminɛ ye. Ne ka jama bena segi ka ele yɔrɔ ɲini, nga ele kɔni tena olu yɔrɔ ɲini.

²⁰ Ne bena i kɛ nigɛkogo cibali ye mɔgɔ nunu ɲa. U bena i kɛlɛ, nga u tena se i kɔrɔ. Bari ne be n'i ye, waasa k'i kisi. Ne Masaba le ko ten.

²¹ Ne bena i kisi mɔgɔjuguw ma, ne bena i bɔsi mɔgɔ farimanw bolo.»