Yeremi 14 - ALA KA KUMA

Zeremi be Ala daalila jaa waati la

¹ Masaba ye min fɔ Zeremi ye jaa kosɔn, o ye:

² «Zuda mara be dusukasi la, a duguw be nagasira, u ɲaa sisinin lo, u siginin be duguma. Zeruzalɛmukaw kasikan be bɔra.

³ Ɲamɔgɔw b'u ka baarakɛlaw ci ka taga jii ta. Olu be se jimarayɔrɔ la k'a ye ko jii te yen. U be segi n'u ka minan lakolonw ye. Maloya, ni hakiliɲagami y'u kuun surun.

⁴ Dugukolo pɛrɛnpɛrɛnnin lo bari sanji te na tugu jamana kɔnɔ. Sɛnɛkɛlaw y'u kuun surun maloya bolo.

⁵ Kongo kɔnɔ, mankalanin be wolo, ani ka taga k'a deen to yen. Bari, biin te yen.

⁶ Kongofaliw be lɔ kongokolon kulujanw kan, ka fɔɲɔ minɛ i ko kongowuluw. U ɲaa be dibi bari biin te yen k'a ɲimi.»

⁷ N'an ka kojuguw b'an jalaki, Masaba, fɔɔ i ka dɔ kɛ i tɔgɔ kosɔn. Bari an ka tilenbaliyakow cayara, an y'i hakɛ ta.

⁸ Isirayɛli jigi, e min y'a kisibaga ye waatigwɛlɛn na, mun na e b'i yɛrɛ kɛ i n'a fɔ lonan, jamana kɔnɔ, i ko tɛmɛbaga min be la suu kelen?

⁹ Mun na e y'i yɛrɛ kɛ i n'a fɔ cɛɛ min fanga banna, i ko kɛlɛdenŋana min te se ka mɔgɔ kuun bɔ? K'a sɔrɔ i do b'an cɛma, Masaba. An ye i ka mɔgɔw le ye, kana an labila.

*

¹⁰ Masaba y'a fɔ siya nin kosɔn ko: «Tiɲɛ na, ka taama u kunfɛ, o le ka d'u ye.» U koo kɔni man di Masaba ye fewu. Sisan kɔni, a hakili b'u ka juguya la, a bena u ka kojuguw juru sara.

¹¹ Masaba y'a fɔ ne ye ko: «Kana ne daali siya nin ka hɛrɛ kama dɛ!

¹² Hali n'u ye suun don, ne tena mɛnni kɛ u kasikan la. Hali n'u ye saraka jɛnita ni suman sarakaw bɔ, ne tena sɔn o la. Ne bena u halaki ni murujan, ni kɔngɔ, ani fɔɲɔbana ye.»

¹³ Ne y'a jaabi ko: «Ee! Matigi, Masaba! A ye, kiraw b'a fɔra u ye ko: ‹Aw tena murujan ye, kɔngɔ tena aw tɔɔrɔ. Ne bena hɛrɛ kɛ aw ye o yɔrɔ nin na.› »

¹⁴ O tuma na, Masaba y'a fɔ ne ye ko: «Kira nunu be min fɔra ne tɔgɔ la, o ye galon le ye. Ne m'u ci. Ne ma cii foyi di u ma. Ne ma foyi fɔ u ye. Olu yɛrɛ ka siko galonlamanw, ni lagwɛlikɛkumafu nunu, ani u ka miiriyakolonw, u b'o le kiraya kɛra aw ye.

¹⁵ O le kama, kira minw be kiraya kɛra ne tɔgɔ la, ne Masaba ko: Ne m'u ci, k'a sɔrɔ u b'a fɔra ko murujan ni kɔngo tena se jamana nin ma. Olu kɔni, murujan ni kɔngɔ le bena olu halaki.

¹⁶ U be kirayakuma fɔra minw ye, olu bena filifili Zeruzalɛmu bɔlɔnw na kɔngo ni murujan kosɔn. Mɔgɔw tena sɔrɔ k'u suu don, olu, n'u musow, n'u deen cɛmanw ni musomanw. N bena u ka juguya sara u la ten.»

Zeremi be yafa ɲini jama ye

¹⁷ Masaba ko: «I bena nin fɔ u ye ko: ‹Ne ɲaji be woyora suu ni tile, a te lɔra. Bari, bɔnɛ ye ne ka jama sɔrɔ, ne diyanamɔgɔw mandimina kosɔbɛ.

¹⁸ Ni n tagara kongo kɔnɔ, minw fagara ni murujan ye, olu b'o yɔrɔ la. Ni n nana dugu kɔnɔ, minw be tɔɔrɔla kɔngɔ bolo, olu le be yen. Kiraw ni sarakalasebagaw be munumununa jamana kɔnɔ, u te foyi faamuna.› »

¹⁹ O tuma na, i ye Zuda mara mɔgɔw fili pewu wa? *Siyɔn koo goyara i ye le wa? Mun na i be sɛgɛn lara an kan, fura te min na? An tun be hɛrɛ makɔnɔna, nga foyi! An tun be lafiya kɔnɔna, nga jatigɛ le be se an ma.

²⁰ Masaba, an sɔnna an ka juguya ma, ani an faaw ka kojuguw. An y'i hakɛ ta.

²¹ Kana an fili i bolo kɔ, i tɔgɔ kosɔn, kan'a to i ka masasigiyɔrɔ be mafiɲɛ ya. I hakili to an ka bɛɛn la, i kan'a cɛn.

²² Siyaw ka joow cɛma, dɔ be yen min be se k'a to sanji be ben wa? Yala sankolo barika le be na ni sanji ye wa? Masaba an ka Ala, e le te sanji dibaga ye wa? An jigi be e le kan, bari e le be o koow bɛɛ kɛ.