Yeremi 10 - ALA KA KUMA

Joo te foyi ɲa

¹ Masaba be kuma min fɔra aw Isirayɛlidenw kosɔn, aw k'o lamɛn.

² A ko: «Aw kana siya wɛrɛw ka kɛwaliw ladege. Taamasiɲɛ minw be ye sankolo la, aw jaa kana tigɛ olu kosɔn. Siya wɛrɛw le jaa be tigɛ o kosɔn.

³ Bari siya wɛrɛw ka landaw ye fɛɛn fufafuw le ye. O be yiri tigɛ tuu kɔnɔ, lɛsɛnikɛla b'o lɛsɛ ni sɛmɛ ye.

⁴ O kɔ, u y'a mɔ ni warigwɛ, ni sanu ye, ka nigɛ dɔ ta k'a gwengwen waasa a ka lɔ ka ɲa.

⁵ O joo nunu be i ko lɔgɔkuru, u te se ka kuma. Fɔɔ mɔgɔ k'u ta le, bari u te se ka taama. Aw kana siran u ɲa, u te se ka kojugu si kɛ aw la, u te se k'aw mako ɲa fana.»

⁶ Masaba, e ɲɔgɔn te yen, i ka bon, i tɔgɔ ka bon, barika b'a la.

⁷ Jɔn le tena siran i ɲa, siyaw ka Masa? I ka kan n'o ye! Bari, siyaw ka lɔnnikɛlaw bɛɛ cɛma, ni jamanaw bɛɛ kɔnɔ, ele ɲɔgɔn te yen.

⁸ Olu bɛɛ lajɛnnin ye nalonmanw ye, hakilitanw lo. U be hakili min sɔrɔ joo lɔgɔlaman fɛ, fuu lo.

⁹ U be bɔ ni warigwɛ pɛnpɛrɛninw ye Tarisisi, ka bɔ ni sanu ye Ufazi. Nigɛbaarakɛla b'o baara, numu b'o lalaga, a b'o masiri ni jese bulalaman, ani jesewulen ye. O bɛɛ ye baaralɔnbaga bulonɔ ye.

¹⁰ Nga Masaba ye Ala yɛrɛ yɛrɛ ye, ale lo ye Ala ye, ale ka masaya te ban. N'a dimina, dugukolo be yɛrɛyɛrɛ. Siyaw te se ka lɔ a diminin ɲa.

¹¹ «Aw ben'a fɔ u ye ko: Batofɛn minw ma sankolo ni dugukolo dan, olu bɛɛ bena tunu ka bɔ diɲɛ na.»

¹² Ale lo ye dugukolo dan n'a ka sebagaya ye, a ye diɲɛ dan n'a ka lɔnniya ye, a ye sankolo kɛ a ka hakilitigiya la.

¹³ N'a kumana, jii be lajɛn sankolo la. A b'a kɛ sankabaw be yɛlɛ sanfɛ ka bɔ diɲɛ daan na, ka saan manamana, ka fɔɲɔ bɔ a marayɔrɔw la.

¹⁴ Mɔgɔ bɛɛ be nalo, u te foyi faamu. Numuw bɛɛ be maloya u ka joow kama. Bari u ka joow ye namarafɛnw le ye, niin t'u la.

¹⁵ Fɛɛn fufafuw lo, baara lo kuun te min na. N'u ka kitiwaati sera, u bena tunu.

¹⁶ Yakuba ka Ala te ten, bari ale lo ye fɛɛn bɛɛ dan. Isirayɛli ka siya kɛr'a ta ye. A tɔgɔ le ko Masaba, Setigi.

Jamana ka bɔnɛko (Zeremi be kumana)

¹⁷ Aw minw datugunin be, aw ye wili k'aw ka minanw cɛ duguma.

¹⁸ Bari Masaba ko: «Sisan, ne bena jamanadenw gwɛn ka bɔ jamana kɔnɔ. Ne bena u dɛrɛ janko u kana se k'u yɛrɛ bɔsi.»

(Zeruzalɛmu be kumana)

¹⁹ Bɔnɛ ye ne ta ye, ne halakinin lo! Ne ka joli te banta ye! K'a sɔrɔ ne tun b'a fɔra ko: «Ne ka tɔɔrɔ le kɛra nin ye, n ben'a muɲu.»

²⁰ Ne ka fanibugu cɛnna, a juruw bɛɛ tigɛtigɛra. Ne deenw tagara ka ne to, mɔgɔ si te yen. Mɔgɔ si te yen tugu min bena ne ka fanibugu kɔrɔta, mɔgɔ te yen tugu ka ne ka sibon lɔ seen kan.

(Zeremi be kumana)

²¹ Ɲamɔgɔw nalonin lo. U ma Masaba yɔrɔ ɲini do. O le y'a to u dɛsɛra, u ka jama bɛɛ yɛrɛkɛra.

²² Kibaru dɔ be bɔra ka na an fɛ! Mankanba dɔ be bɔra kɔgɔdugu ɲafan jamana na! Zuda mara duguw cibagaw lo, u ben'u kɛ dusukasiyɔrɔ ye, u ben'u kɛ kongowuluw layɔrɔ ye.

Zeremi ka daalili

²³ Masaba, ne y'a lɔn ko see te adamaden ye ka se k'a yɛrɛ ka koo latigɛ, o t'a ka koo ye.

²⁴ Masaba, ne kolo. Nga e k'o kɛ k'a dama kɛɲɛ, kana o kɛ ni dimi ye, waasa i kana ne halaki.

²⁵ I ka dimi siya wɛrɛw kɔrɔ, minw t'i lɔn, minw t'i bato. Bari olu le ye Yakuba kɔmɔgɔw halakibagaw ye. U b'u halakira, u halakira pewu. U y'a ka mara cɛn bugubugu!