Yakuba 2 - ALA KA KUMA

Kana mɔgɔw woloma

¹ N badenw, aw minw lanin be an Matigi Yezu Krista nɔɔrɔtigi la, aw kana mɔgɔw woloma k'u fisaya ɲɔgɔn ye.

² Ni mɔgɔ fila nana don aw cɛma aw ka lajɛnyɔrɔ la, ni dakamana fani be kelen kaan na, ni sanu donnin b'a bolo, k'a sɔrɔ dɔ nin ka faniw faranfarannin lo,

³ n'aw y'aw janto dakamana fanitigi la k'a fɔ a ye ko a ka na sigi yɔrɔɲuman na, k'a fɔ fantan nin ye ko a ka lɔ sanfɛ, walima ko a ka sigi duguma aw seen kɔrɔ,

⁴ n'aw y'o kɛ, aw ma wolomani kɛ wa? Aw be mɔgɔw bɔ ɲɔgɔn na ni ŋaniyajugu ye.

⁵ N badenw, aw minw koo ka di ne ye, aw ye mɛnni kɛ, minw be jati fantanw ye diɲɛ kɔnɔ, Ala m'u woloma k'u kɛ fɛntigiw ye lanaya la, ani k'u ladon a ka masaya la wa? A tun y'a daa di a kanubagaw ma min la.

⁶ Nga aw kɔni, aw be fantanw le dɔgɔya. Nafolotigiw le t'aw tɔɔrɔ k'aw minɛ ka taga n'aw ye faamaso wa?

⁷ U b'aw wele ni tɔgɔɲuman min ye, olu le te o cɛnbagaw ye wa?

⁸ Sariya min fɔra Masa Ala ka kuma na ko: «E k'i tɔɲɔgɔn kanu i n'a fɔ i yɛrɛ.» N'aw b'o bato, o tuma na, aw ka kɛwali ka ɲi.

⁹ Nga n'aw be wolomani kɛ ka mɔgɔw fisaya ni ɲɔgɔn ye, aw be hakɛ kɛ, Ala ka sariya b'aw minɛ bari aw m'a bato.

¹⁰ Ni min ye sariya kelen cɛn, o tigi ye sariya bɛɛ le cɛn, hali n'a ye tɔ nunu bɛɛ bato.

¹¹ Bari min y'a fɔ ko: «I kana kakalaya kɛ,» ale lo y'a fɔ fana ko: «I kana mɔgɔ faga.» Ayiwa, e te kakalaya kɛ, nga i be mɔgɔ faga, sariya y'i minɛ.

¹² Sariya min b'aw hɔrɔnya, aw bena kiti ka kɛɲɛ n'o le ye. O kama, aw kumacogo n'aw ka kɛwaliw ka bɛn o ma.

¹³ Bari mɔgɔ min te makari tɔw la, kiti tigɛlon na, Ala fana tena makari o tigi la. Nga minw be makari, olu te siran kiti ɲa.

Jigi koo

¹⁴ N badenw, ni mɔgɔ dɔ y'a fɔ ko ale jigi be Ala kan, k'a sɔrɔ o te ye a ka kɛwaliw la, a be mun ɲa sa? O jigi nin be se k'a kisi wa?

¹⁵ N'aw balimacɛ dɔ, walima aw balimamuso dɔ fari lakolon lo, ni bii dumuni fana t'a fɛ,

¹⁶ n'aw dɔ y'a fɔ a ye ko: «Taga hɛrɛ la, Ala k'i dɛmɛ,» k'a sɔrɔ a mako be fɛɛn min na, aw m'o d'a ma, aw ye duba min kɛ, o be mun ɲa sa?

¹⁷ Ayiwa, ni min ko ale jigi be Ala kan, k'a sɔrɔ o te ye a ka kɛwaliw la, o jigi nin ye fuu ye.

¹⁸ O la, dɔ be se k'a fɔ ko: «I ko i jigi be Ala kan, ne kɔni be kɛwaliɲumanw le kɛ. E k'i jigi yira ni kɛwali niin t'a la, ne bena n ta yira ni kɛwali ye.»

¹⁹ I lanin b'a la ko Ala ye kelenpe ye kɛ! O ka ɲi. Jinaw fana lanin b'o la, u be siran fɔɔ ka yɛrɛyɛrɛ.

²⁰ Naloman! K'a fɔ ko i jigi be Ala kan k'a sɔrɔ o te ye i ka kɛwaliw la, i b'a fɛ k'a lɔn k'o ye fuu ye wa?

²¹ An bɛma Ibrayima ta filɛ kɛ. A y'a dencɛ Isiyaka di Ala ma sarakabɔyɔrɔ kan minkɛ, o la, Ala y'a jati mɔgɔtilennin ye a ka kɛwali kosɔn.

²² I y'a ye wa? A jigi tun be Ala kan, a fana tun ye kɛwaliw kɛ. A ka kɛwaliw y'a yira ko a jigi dafanin lo.

²³ O la, min fɔra Ala ka kuma na, o kɛra tiɲɛ na ko: «Ibrayima lara Ala la, o kosɔn, Ala y'a jati mɔgɔtilennin ye,» k'a wele ko a tericɛ.

²⁴ Aw m'a ye wa? Mɔgɔ ka kɛwaliɲumanw le b'a to Ala b'a jati mɔgɔtilennin ye. Jigi koo dama tɛ.

²⁵ O cogo kelen na, Ala ye kakalamuso Araabu jati mɔgɔtilennin ye a ka kɛwali kosɔn. Bari a ye Isirayɛli ka cidenw ladon ka sɔrɔ ka sira wɛrɛ don u seen kɔrɔ.

²⁶ Ayiwa, ni mɔgɔ nii bɔra, a be kɛ suu ye cogo min na, o cogo kelen na, n'i ko i lanin be Ala la k'a sɔrɔ o te ye i ka kɛwaliw la, o fana ye jigifu ye.