Yakuba 1 - ALA KA KUMA

Foli

¹ Ne Zaki min ye Ala ni Matigi Yezu Krista ka baarakɛla ye, n be bataki nin ci aw Isirayɛlidenw ma minw jɛnsɛnnin be diɲɛ faan bɛɛ la, k'aw fo.

Kana sigasiga Ala daalituma na

² N badenw, kɔrɔbɔli sifa o sifa mana se aw ma, aw k'aw yɛrɛ jati mɔgɔdagamuninw ye.

³ Bari aw b'a lɔn ko tɔɔrɔ minw be sɔrɔ Yezu kosɔn, k'o be kɛ sababu ye aw be kɛ muɲubagaw ye.

⁴ Nga o muɲuli nin ka dafa, waasa aw ka kɛ mɔgɔdafaninw ye, ani fiɲɛ kana sɔrɔ aw la fewu.

⁵ N'o y'a sɔrɔ n'aw dɔ dɛsɛnin lo hakilitigiya la, o tigi k'a daali Ala fɛ, a ben'a d'a ma. A tigɛ man gwɛlɛ, a be mɔgɔ bɛɛ sɔn ka ɲa. A t'an sɔngɔ ka sɔrɔ k'an sɔn.

⁶ Nga o tigi k'a jigi la Ala kan k'a daali, a kana sigasiga hali fitini. Bari mɔgɔ min be sigasiga, o tigi bɔnin be baji fɛ, fɔɲɔ be min lamaga ka taga n'a ye faan bɛɛ.

⁷ O tigi kan'a miiri ko a bena fɛɛn dɔ sɔrɔ Matigi fɛ.

⁸ Bari a hakili te kelen kan, a be siga a ka kokɛtaw bɛɛ la.

Fantanya ni nafolotigiya

⁹ Aw minw ye fantanw ye, aw ye nisɔndiya, bari Ala b'aw kɔrɔta.

¹⁰ Minw wasanin be, ni olu dɔ nagasira, a ka nisɔndiya o la, bari a bena sa i n'a fɔ binfeeren.

¹¹ Tile be fariya ka biin ja, a feeren ka cɛɲa be ban ka tila ka ben cogo min na, o cogo kelen na, mɔgɔwasaninw bena ben u ka baara la.

Kɔrɔbɔliko

¹² Mɔgɔ min be jija ka sigɛn muɲu, o tigi dagamunin lo. Bari n'a sera ka sigɛn nunu muɲu, a bena nii banbali sɔrɔ a ka tɔnɔ ye. Ala tun y'a daa di a kanubagaw ma, ko u bena min sɔrɔ.

¹³ Ni kojugukɛ nigɛ donna min na, o tigi kan'a fɔ ko Ala nɔɔ lo. Bari kojugu nigɛ te Ala minɛ fewu. A fana te mɔgɔ si nigɛ ka don kojugu la.

¹⁴ Nga mɔgɔ kelen kelen bɛɛ kɔnɔnako le be kojugukɛ nigɛ don a la.

¹⁵ Ayiwa, ni kojugu nigɛ jiidira mɔgɔ kɔnɔ, a be na ni hakɛ ye. Ni hakɛ ye fanga sɔrɔ a kan, a be na ni saya ye.

¹⁶ N badenw, aw minw koo ka di ne ye, aw kana aw yɛrɛ nigɛ dɛ!

¹⁷ An be fɛnɲuman minw bɛɛ sɔrɔ n'o dafanin lo, o be bɔ Ala le fɛ min ye tile ni kalo ani lolow dan. A te yɛlɛma, dibidibi te a ka koo si la.

¹⁸ A diyara Ala ye, a y'an dan a ka tiɲɛkuma barika la, waasa an ka kɛ a ka danfɛnw bɛɛ ɲamɔgɔw ye.

Ala ka kuma bato

¹⁹ N badenw, aw minw koo ka di ne ye, aw k'a lɔn kosɔbɛ ko mɔgɔ kelen kelen bɛɛ ka kan ka lamɛnni kɛ ka ɲa, nga a kana teliya ka kuma, a kana dimi joona.

²⁰ Bari mɔgɔ min dusu gwannin lo, o tigi te kotilennin kɛ Ala ɲakɔrɔ.

²¹ O kama, koo o koo be mɔgɔ nɔgɔ Ala ɲana, ani juguya bɛɛ, aw k'o bɛɛ dabila. Ala ka kuma min b'aw kɔnɔ, aw ka sɔn o ma ni yɛrɛmajigi ye. O kuma nin, be se k'aw kisi.

²² Aw kana aw yɛrɛ nigɛ fana ko aw be to ka Ala ka kuma lamɛn. Nga aw k'o lamɛn, k'a bato.

²³ Mɔgɔ min be Ala ka kuma lamɛn n'a t'a bato, o tigi bɔnin be mɔgɔ fɛ min b'a yɛrɛ filɛ dubalen kɔnɔ.

²⁴ A b'a yɛrɛ filɛ, n'a bɔra yen, a be ɲinɛ a yɛrɛ cogo kɔ.

²⁵ Nga, mɔgɔ min be sariya sɔbɛsɔbɛ kɔnɔnakuma lamɛn, ka ɲa k'a janto a la, n'a te ɲinɛ a kɔ, ani ka to k'a bato, o tigi kɔni bena hɛrɛ sɔrɔ a ka kɛwaliw la. O kuma nin le be mɔgɔ kɛ hɔrɔnw ye.

²⁶ Ni min y'a miiri ko ale be Alasira tagama k'a sɔrɔ a t'a kumacogo kɔlɔsi, o tigi b'a yɛrɛ nigɛ, kuun te o tigi ka Alasira koo la.

²⁷ Alasira taamacogo min tilennin be, ni fiɲɛ t'a la an Faa Ala ɲakɔrɔ, o filɛ: e k'i janto falatɔw ni firiyamusow la u ka tɔɔrɔ tuma na. Ani e k'i yɛrɛ tanga diɲɛ koo nɔgɔninw bɛɛ ma.