Waajurikɛbaga 7 - ALA KA KUMA

Hakilitigiya nafa

¹ Tɔgɔɲuman ka fisa ni tulu kasadiman ye. Mɔgɔ salon ka fisa n'a wololon ye.

² Ka taga sangayɔrɔ la, o ka fisa ka taga ɲanagwɛyɔrɔ la. Bari, o ye bɛɛ labanyɔrɔ ye. Mɔgɔw ka kan ka miiri o la.

³ Dusukasi ka fisa ni nisɔndiya ye. A be mɔgɔ ɲaa kumu, nga a b'a ladi.

⁴ Hakilitigi be miiri saya la, nga naloman be miiri nisɔndiya le la.

⁵ Ka mɛnni kɛ hakilitigi ka ladili la, o ka fisa k'i tulo malɔ naloman ka dɔnkili la.

⁶ Kala be mankan min kɛ tasuma bolo daga kɔrɔ, o ni naloman yɛlɛkan bɛɛ ye kelen ye. O fana ye kabako ye.

⁷ Tɔɔrɔ be se ka hakilitigi kɛ naloman ye. Bonyafɛn fana be se ka hakilitigi ka hɔrɔnya bɔsi a la.

⁸ Ka koo laban ye, o ka fisa n'a daminɛ ye. Muɲuli ka fisa ni yɛrɛboɲa ye.

⁹ Kana kɔn k'i dusu gwan, bari dusugwan ye nalomanw ta ye.

¹⁰ Kan'a fɔ ko: «Mun na fɔlɔfɔlɔ tile ka fisa ni sisan ta ye?» Bari, o te hakilitigi ka ɲiningali ye.

¹¹ Hakilitigiya ka ɲi, i ko cɛɛn. Mɔgɔ minw be nii na, olu be tɔnɔ sɔrɔ a la.

¹² Bari, hakilitigiya be mɔgɔ sutara i ko wari. O la, hakilitigi ka lɔnniya b'a sii sabati. O y'a ka tɔnɔ ye.

¹³ Ala ka baara jati minɛ: A ye fɛɛn min kuru, jɔn be se k'o tilen?

¹⁴ Hɛrɛ loon na, i ka nisɔndiya. Bɔnɛ loon na, i ka sigi ka miiri. O koo fila bɛɛ be bɔ Ala fɛ, a kɛra ten, adamaden kana foyi faamu a yɛrɛ kɔfɛko la.

¹⁵ Ne ka diɲɛlatigɛ kabakoman nin na, ne ye koo bɛɛ ye: mɔgɔtilennin be sa joona, mɔgɔjugu n'a ka juguya bɛɛ, a be sijan sɔrɔ.

¹⁶ Kana i yɛrɛ jati mɔgɔtilennin ye ka tɛmɛ. Kana i yɛrɛ kɛ lɔnnikɛlaba fana ye. Mun na i b'i yɛrɛ halakira?

¹⁷ Kana juguya ka dama tɛmɛ. Kana kɛ naloman fana ye. Mun na i b'i yɛrɛ faga n'i sawaati ma se fɔlɔ?

¹⁸ A ka ɲi, e be o koo minɛ ka ɲa dɛ! Nga i kan'a to dɔ nin be bɔ i bolo. Bari n'i be siran Ala ɲa, i ben'a fila bɛɛ kɛ ka kɛɲɛ.

¹⁹ Lɔnnikɛla ka lɔnniya be see d'a ma ka tɛmɛ dugu kɔnɔ fangatigi tan kan.

²⁰ Mɔgɔ te dugukolo kan min tilennin lo, n'a be koɲuman dama kɛ, n'a te kojugu kɛ ka ye.

²¹ O la, i kana i tulo malɔ mɔgɔw ka fɔtaw bɛɛ la, waasa i ka baaraden ye kumajugu min fɔ i kosɔn, i kana o mɛn.

²² Bari, ele yɛrɛ b'a lɔn ko siɲɛ caaman na, i ye dɔw tɔgɔjugu fɔ.

Lɔnniya sɔrɔ man di

²³ Ne ye koo nunu bɛɛ jati minɛ ni hakilitigiya ye. Ne y'a fɔ ko ne bena kɛ lɔnnikɛla ye. Nga, o yɔrɔ ka jan n na.

²⁴ Koo min be yen, a kɔrɔ ka bon, a ka dun. Jɔn be se k'a kɔrɔ lɔn?

²⁵ Ne ko ne bena lɔnniya ɲini ka koo kɛtaw sɛgɛsɛgɛ, k'u filɛ ka ɲa, ka se k'u kuun lɔn. Ne y'a faamu ko ka kɛ mɔgɔjugu ye, o ye hakilitanya ye, ko nalomanya ye fatɔya ye.

²⁶ Ne y'a kɔlɔsi k'a ye ko muso min be i ko jaan, n'a kɔnɔnako be i ko jɔɔ, a be mɔgɔ siri i ko jɔrɔkɔ, o ka jugu ni saya ye. Mɔgɔ min koo ka di Ala ye, o tigi be se k'a yɛrɛ bɔsi a bolo. Nga a be kojugukɛla kɔni sɔrɔ.

²⁷ Waajulikɛla ko: «Ne ye min lɔn, o ye nin ye. Ka koow jati minɛ kelen kelen ɲɔgɔn kɔ waasa k'u kɛkun lɔn.

²⁸ O ye koo ye n be min na kudayi, n t'a lɔnna. Nga n y'a ye ko cɛɛ waa kelen cɛma, n ye mɔgɔ kelen sɔrɔ. Musow bɛɛ cɛma, n ma foyi sɔrɔ.

²⁹ Ne ye min ye, o filɛ nin ye: ko Ala ye adamaden dan k'a kɛ mɔgɔtilennin ye. Nga ale yɛrɛ tora k'a ka koow ɲagami.»