Waajurikɛbaga 6 - ALA KA KUMA

¹ Ne ye kojugu dɔ wɛrɛ ye diɲɛ kɔnɔ, min be adamaden sigɛn kosɔbɛ.

² O ye nin ye: Ala b'a nɔgɔya mɔgɔ dɔ ye, ka nafolo d'a ma, a b'a boɲa fana, fɛɛn min ka d'a ye, a b'o bɛɛ sɔrɔ. Nga, Ala t'a to a b'o diya bɔ, fɔɔ mɔgɔ wɛrɛ. O fana ye kabako ye. Koo lo min be digi adamaden na.

Sijan sɔrɔ

³ Mɔgɔ min ye deen caaman wolo, ka sijan sɔrɔ, nga a sii n'a jaɲa bɛɛ, a ma hɛrɛ sɔrɔ a kɔnɔ. Kaburu yɛrɛ t'a fɛ. Deen min sanin wolola, ne ko ale ta ka fisa n'o tigi ta ye.

⁴ Bari deen nin woloko ma foyi ɲa, a wolola, a ma kɛnɛ ye, a tɛmɛna. A tɔgɔ fana tununa.

⁵ A ma tile ye, a ma koo lɔn fana. Ale be lafiɲɛ na ka tɛmɛ dɔ nin kan.

⁶ Hali n'a tun ye saan waa fila kɛ sii la, n'a ma hɛrɛ sɔrɔ, nafa jumɛn b'o la? U bɛɛ bena taga yɔrɔ kelen na.

Adamaden ka wasabaliya

⁷ Adamaden be baara minw bɛɛ kɛ, a b'o kɛ a kɔnɔbara le kama. A daa nin do tena fa ka ye.

⁸ Ne ko, hakilitigi ka fisa ni naloman ye cogo di? fantan ka se a yɛrɛ minɛcogo la mɔgɔ tɔw cɛma, o be mun ɲa?

⁹ I bololafɛn k'i wasa, o ka fisa ni miiri caaman ye. O fana ye kabako dɔ ye, a be i n'a fɔ mɔgɔ min b'a fɛ ka fɔɲɔ mara.

¹⁰ Fɛɛn o fɛɛn be yen, o bɛɛ be n'u tɔgɔ ye ka ban. Adamaden ye fɛɛn min ye, o lɔnnin lo. A te se ka sɔsɔli kɛ ni fangatigi ye.

¹¹ Ni kuma cayara, a faamubali be caya fana. Adamaden ka tɔnɔ ye jumɛn ye o la?

¹² Ne ko, fɛɛn min ka ɲi adamaden ma a sii la, jɔn b'o lɔn? A be min na ten n'a tɛmɛcogo te faamu, i n'a fɔ suma. Koo minw bena kɛ a kɔfɛ diɲɛ na, jɔn be se k'o fɔ a ye?