Waajurikɛbaga 5 - ALA KA KUMA

I yɛrɛ kɔlɔsi Ala ɲakɔrɔ

¹ I kana teliya ka kuma, i kana kɔrɔtɔ k'i daa di Ala ma. Bari Ala be sankolo la, ele be dugukolo kan. O la do, i ka kuma kana caya.

² Bari, kuma caaman be na ni kumakolonfɔ ye. Hami caaman fana be na ni sikow ye.

³ N'i y'i daa di Ala ma koo dɔ la, kana mɛn k'o dajuru nin sara. Bari, miiribali koo man di Ala ye. Ele y'i daa di koo min na, o kɛ.

⁴ I kana dajuru ta, o ka fisa ka dajuru ta n'i m'o koo kɛ.

⁵ I kan'a to i daa b'i don koo la. I kan'a fɔ Ala ka baarakɛla ye ko: «O kɛra fili ye», janko Ala kana dimi e kɔrɔ e ka kuma kosɔn k'i ka baara cɛn.

⁶ Koo kuntan be siko caaman ni kuma caaman na, o la, e ka siran Ala ɲa.

Fangatigiw ka koo

⁷ N'i y'a ye n'u be dɛsɛbagatɔw tɔɔrɔla jamana kɔnɔ, ni tilenninya te yen fɔɔ ɲɔgɔntɔɲɔ, i kana kabakoya o la. Bari, mɔgɔbaba mana kɛ yen, mɔgɔbaba wɛrɛw le b'ale kunna. Mɔgɔba wɛrɛ fana ka kɛ olu kunna.

⁸ Dugukolo nafa ye bɛɛ ta ye. Hali masacɛ niyɔrɔ fana b'a la.

Nafolo n'a kunko

⁹ Mɔgɔ min ka wariko ka gwɛlɛ, wari tena o tigi labɔ ka ye fana. Min ka nafoloko ka gwɛlɛ, o tigi te wasa a ka sɔrɔ la ka ye. O fana ye kabako dɔ ye.

¹⁰ Ni sɔrɔ cayara yɔrɔ min na, a dumubagaw fana be caya. Fɛntigi ka nafa bena kɛ jumɛn ye o tuma na sa? Fɔɔ a ka sigi ka to k'u filɛ dɔrɔn.

¹¹ Baaraden ye dumunifitini kɛ wo, a ye dumuniba kɛ wo, a be sinɔgɔ ka ɲa. Nga nafolotigi ka nafoloko b'a bali sinɔgɔ ma.

¹² Ne ye kojuguba dɔ ye diɲɛ kɔnɔ, o ye nin ye: nafolotigi k'a ka sɔrɔ mara lonjugu kama.

¹³ Nga o nafolo nin be cɛn baara dɔ la min ma ɲa a bolo. N'a mana deen sɔrɔ tuma min na, foyi te sɔrɔ ale bolo tugu.

¹⁴ A bololakolon wolola cogo min na, a bena kɔsegi ka taga ten fana. A ma sɔrɔ ka foyi bɔ a ka baara nafa la a be se ka taga ni min ye a bolo.

¹⁵ A tun nana cogo min na, a ka taga ten, o fana ye kojugu ye min be digi mɔgɔ la. A ye tɔnɔ jumɛn le sɔrɔ a ka baara la? O ni fɔɲɔ kɛra kelen ye.

¹⁶ Ka fara o kan, a b'a sii bɛɛ kɛ dusukasi la, tɔɔrɔ ni degun, ani dimi la.

¹⁷ Ne ye min faamu o la, o ye nin ye ko min ka fisa adamaden ma, o ye ka dumuni kɛ ka minni kɛ, ani ka nisɔndiya a ka baara la, a be min bɛɛ kɛ loon o loon a sii la Ala barika la. Bari o le y'a niyɔrɔ ye.

¹⁸ Ni Ala y'a nɔgɔya mɔgɔ min ye ka nafolo d'a ma, ani k'a to o tigi fana ka se k'a diya bɔ, ani ka nisɔndiya a ka baara la, o fana ye Ala ka dɛmɛ ye.

¹⁹ O tigi be ɲinɛ ko diɲɛ te a toyɔrɔ ye, bari Ala ye hɛrɛ kɛ a ye.