Waajurikɛbaga 3 - ALA KA KUMA

Koo bɛɛ n'a tuma lo

¹ Koo bɛɛ n'a tuma lo. Dugukolo kan, koo kelen kelen bɛɛ n'a waati lo.

² Deen wolo waati be yen, a sawaati fana be yen. Yiri tutuwaati be yen, a bɔnwaati fana be yen.

³ Mɔgɔ fagawaati be yen, a furakɛwaati fana be yen. Fɛɛn ciwaati be yen, a lɔwaati fana be yen.

⁴ Kasiwaati be yen, yɛlɛkowaati fana be yen. Dusukasiwaati be yen, ɲanagwɛwaati fana be yen.

⁵ Bɛrɛbonwaati be yen, bɛrɛtɔmɔwaati fana be yen. Ɲɔgɔnfowaati be yen, ka ban foli la o waati fana be yen.

⁶ Fɛɛnɲiniwaati be yen, fɛɛnɲinibaliyawaati fana be yen. Fɛɛnmarawaati be yen, filiwaati fana be yen.

⁷ Fɛɛnfaranwaati be yen, fɛɛnkalanwaati fana be yen. Jewaati be yen, kumawaati fana be yen.

⁸ Mɔgɔ koo ka diya i ye, o waati be yen, k'a kɔniya, o waati fana be yen. Kɛlɛkɛwaati be yen, hɛrɛwaati fana be yen.

⁹ Baarakɛla be sigɛn min kɛ a ka baara la, a be tɔnɔ jumɛn sɔrɔ a la?

¹⁰ Ala ye sigɛn min la adamaden kan, ne y'o jati minɛ.

¹¹ A ye koo bɛɛ kɛ ka ɲa ka kɛɲɛ n'a waati ye. A ye siniko don mɔgɔ dusu la. O n'a ta bɛɛ, k'a ta a ka koow daminɛ na, ka ta'a bila a laban na, mɔgɔw tora o faamubaliya la.

¹² Ne y'a lɔn ko adamaden ka nisɔndiya, ka koɲuman kɛ a sii kɔnɔ, k'o dama le ka ɲi a ma.

¹³ Ni mɔgɔ o mɔgɔ be dumuni kɛ, ka minni kɛ, ka nisɔndiya a ka baara bɛɛ la, o ye Ala ka dɛmɛ ye.

¹⁴ Ne y'a lɔn ko Ala be koo min bɛɛ kɛ, o bena to seen kan tuma bɛɛ, dɔ tena fara a kan, dɔ tena bɔ a la. Ala y'a kɛ ten, waasa mɔgɔw ka siran a ɲa.

¹⁵ Fɛɛn min be yen, o tun be yen ka kɔrɔ. Fɛɛn min bena kɛ yen, o fana tun be yen ka kɔrɔ. Ala le b'a to fɛɛn nunu be segi ka kɛ.

Ɲuman ni juguman sara

¹⁶ Ne y'a ye diɲɛ kɔnɔ fana ko tiɲɛ te fɔ kiti tigɛyɔrɔ la, Tilenninya ka kan ka kɛ yɔrɔ min na, juguya le be kɛ yen.

¹⁷ Ne y'a fɔ n yɛrɛ kɔnɔ ko Ala bena mɔgɔɲuman ni mɔgɔjugu bɛɛ kiti, bari koo bɛɛ ni kɛwaliw bɛɛ n'u kitituma lo.

¹⁸ Ne y'a fɔ n yɛrɛ kɔnɔ adamadenw ka koo la ko Ala b'u kɔrɔbɔra le, janko u k'a lɔn ko u ni begɛnw bɛɛ ye kelen ye.

¹⁹ Bari, adamaden laban ni begɛn ta bɛɛ ye kelen ye. Sabu u fila bɛɛ sacogo ye kelen ye. Ninakili kelen le b'u la. Adamaden man fisa ni begɛn ye. Kabako faamubali lo.

²⁰ U bɛɛ bɔra bɔgɔ la, u bɛɛ bena segi ka kɛ bɔgɔ ye, u bɛɛ taayɔrɔ ye kelen ye.

²¹ Jɔn le b'a lɔn ni adamaden nii bɔra n'a be taga sanfɛ, ni begɛn ta be jigi dugukolo kɔnɔ?

²² Ayiwa, ne y'a ye ko fɛɛn min ka fisa adamaden ma, o ye ka nisɔndiya a ka baara la. O le y'a niyɔrɔ ye. Bari, koo min bena kɛ a kɔfɛ, jɔn ben'a kɛ a b'o ye?