Waajurikɛbaga 2 - ALA KA KUMA

¹ Ne y'a fɔ n yɛrɛ kɔnɔ ko n bena nisɔndiya jati minɛ k'a filɛ ni fɛɛn min ka ɲi. Nga n y'a ye k'o fana ye kabako ye.

² Ka yɛlɛko, ne k'o ye nalomanya ye. Ka nisɔndiya sɔrɔ, ne k'o be mun ɲa?

³ Ne y'a ŋaniya ko n bena don dɔrɔmin na, nga ka n hakili to n yɛrɛ la, ka n yɛrɛ kɛ naloman ye. Ne tun b'a fɛ k'a filɛ mɔgɔw be baara minw kɛ u sii kɔnɔ dugukolo kan, u be koɲuman jumɛn le sɔrɔ o la.

⁴ Ne ye baaraba kɛ, ne ye soow lɔ n yɛrɛ ye, ka *ɛrɛzɛnforow bɔ,

⁵ ka nankɔw kɛ, ka yiriforow bɔ, yiriden dumuta sifa bɛɛ be sɔrɔ minw kɔnɔ.

⁶ Ne ye dalanw bɔ waasa k'u jii kɛ ka n ka yirimisɛnw sɔn.

⁷ Ne ye jɔɔnw san, cɛɛ ni musow, u deenw balola ne ka soo. Ne ye begɛnw sɔrɔ caaman, a daba fara misɛnmanw kan, ka tɛmɛ fɔlɔ mɔgɔw bɛɛ kan Zeruzalɛmu kɔnɔ.

⁸ Ne ye warigwɛ ni sanu sɔrɔ, ani jamanaw n'u ka masacɛw ka nafolo. Dɔnkililabaga cɛɛw ni musow fana be ne fɛ. Ne ye muso caaman fana sɔrɔ minw be adamadenw nisɔndiya.

⁹ Ne kɛra mɔgɔbaba ni nafolotigi ye ka tɛmɛ fɔlɔmɔgɔw bɛɛ kan Zeruzalɛmu. Nga n ka lɔnniya fana ma bɔsi n na.

¹⁰ Ne tun be fɛɛn o fɛɛn fɛ, ne ma ban o si la. Koo min ka di ne ye, ne fana ma ban k'o si kɛ. N ye n diya bɔ n ka baara bɛɛ la. N tun ka kan n'o ye n ka baara bɛɛ la.

¹¹ Nga ne ye n ka kɛwaliw bɛɛ jati minɛ tuma min na, ani n sigɛnna ka baara minw kɛ, ne y'a ye k'o bɛɛ ye kabako ye, a be i n'a fɔ mɔgɔ min b'a fɛ ka fɔɲɔ mara. Tɔnɔ si te adamaden ka baara la dugukolo kan.

¹² Ne fana ye hakilitigiya, ni hakilitanya ani nalomanya jati minɛ. Mɔgɔ min bena sigi masacɛ nɔɔ na, ale bena koo jumɛn le kɛ, n'o ma kɛ ka ye?

¹³ Ne y'a ye ko hakilitigiya ka fisa ni nalomanya ye, i ko yeelen ka fisa ni dibi ye cogo min na.

¹⁴ Hakilitigi b'a taayɔrɔ lɔn, nga naloman kɔni be dibi la. O bɛɛ n'a ta, ne y'a ye ko koo kelen le b'u fila bɛɛ kɔnɔna.

¹⁵ O tuma na, ne y'a fɔ n kɔnɔ ko koo min bena naloman sɔrɔ, o ɲɔgɔn le bena ne sɔrɔ fana. Ne ka lɔnniyaba nin tɔnɔ kɛr'a jumɛn ye sa? O la, ne y'a fɔ n kɔnɔ k'o fana ye kabako dɔ ye.

¹⁶ Hakilitigi ka koo te to mɔgɔw kɔnɔ tuma bɛɛ ka tɛmɛ naloman ta kan do. Yanni waati dɔɔni, u be ɲinɛ u bɛɛ kɔ. Hali n'o tɛ, lɔnnikɛla ni naloman bɛɛ be sa.

¹⁷ O la, ka to nii na, o goyara ne ye, bari koo minw be kɛra diɲɛ kɔnɔ, ne y'a ye k'u be ne tɔɔrɔ. O bɛɛ ye kabako ye, a be i n'a fɔ mɔgɔ min b'a fɛ ka fɔɲɔ mara.

¹⁸ Ne ye baara minw bɛɛ kɛ ka sɛgɛn n sii kɔnɔ, o sii koo ma diya n ye, bari ne ka kan ka taga k'u to n nɔtabaga ye.

¹⁹ Ale bena kɛ hakilitigi, walima hakilitan ye wa, jɔn b'o lɔn? Ne ye baara min bɛɛ kɛ n sii kɔnɔ ni hakilitigiya ye, a bena kɛ o bɛɛ ɲamɔgɔ ye. O fana ye kabako faamubali dɔ ye.

²⁰ Ne ye baara min bɛɛ kɛ n sii la, ne fari fagara o bɛɛ la.

²¹ Bari mɔgɔ dɔ be baara kɛ ni hakilitigiya ye, ani jatiminɛ, a ka baara be ɲa, nga a b'o tɔnɔ to dɔ ye min bolo ma don a fɛ ka ye O fana ye kabako ye, min be digi mɔgɔ la kosɔbɛ.

²² Mɔgɔ be sigɛn min l'a yɛrɛ kan ka baara min bɛɛ kɛ a sii la, a bena tɔnɔ jumɛn le sɔrɔ a la sa?

²³ Bari, a be tɔɔrɔ a sii bɛɛ la, a ka baara bɛɛ ka gwɛlɛ. Hali sufɛ lafiɲɛ t'a fɛ. O fana ye kabako ye.

²⁴ Adamaden ka dumuni kɛ, ka minni kɛ, k'a ka baara diya bɔ, o le y'a ka hɛrɛ ye. Ne y'a ye k'o fana be bɔ Ala le fɛ.

²⁵ Bari mɔgɔ jumɛn be yen, n'a be dumuni kɛ ani ka nisɔndiya n'o ma sɔrɔ ale barika la?

²⁶ Ni mɔgɔ min y'a diya, a be hakilitigiya, ni lɔnniya, ani nisɔndiya di o tigi ma. Nga, a be kojugukɛla bila baara la, a bena baara min tɔnɔ ta k'a di ale Ala diyanamɔgɔ ma. O fana ye kabako ye, a be i n'a fɔ mɔgɔ min b'a fɛ ka fɔɲɔ mara.