Waajurikɛbaga 12 - ALA KA KUMA

Loon min ni tɔw te kelen ye

¹ I hakili to i Danbaga la i kanbelenya waati la, sanni lonjuguw ka se, i ben'a fɔ minw na ko: «N te diya lɔnn'a la hali dɔɔni yɛrɛ!»

² Sanni o loon ka se, tile ka dibi, yeelen tena kɛ yen, kalo tena yeelen bɔ, lolow tena bɔ, sankabaw ka segi ka wili sanji bannin kɔ.

³ Loon min na, soo kɔlɔsibagaw be yɛrɛyɛrɛ. Cɛɛ barikamanw b'u yɛrɛ kuru loon min na. Sinnikɛbagaw bena sinni dabila u sinnikɛɲɔgɔn tanya kosɔn loon min na. Muso minw be filɛli kɛ fenɛtiri la, olu te yeli kɛ ka ɲa loon min na.

⁴ Bɔlɔn kɔnɔ, daaw be tugu loon min na. Wugu mankan be nɔgɔya loon min. Mɔgɔ be wili kɔnɔ kasikan fɛ loon min na. Dɔnkililabagaw kaan bena dɔgɔya loon min.

⁵ Siranya be kulu yɛlɛ la loon min na, i bena siran taama ɲa kosɔbɛ loon min bɔlɔn kɔnɔ, yiri kuun be gwɛ a feeren fɛ waati min na, tɔɔn te se a yɛrɛ kɔrɔ waati min, nanfɛn diya be ban loon min. Bari adamaden be tagar'a ka soo, a toyɔrɔ. Kabini kelen, kasikanw be durula bɔlɔnw cɛ.

⁶ I hakili to i Danbaga la, sanni warigwɛjuru ka tigɛ, sanni sanufilen ka ci, sanni duun ka ci jii bɔyɔrɔ la. Jurukisɛ kana tigɛ kɔlɔnda la.

⁷ Sanni farisogo ka segi ka kɛ bɔgɔ ye a bɔyɔrɔ la, sanni mɔgɔ nii ka segi Ala ma, min y'a dibaga ye.

⁸ Kabako, kabako! Waajulikɛla ko ten. Fɛɛn bɛɛ ye kabako ye.

Kuma laban

⁹ Waajulikɛla tun te hakilitigi dama ye. A ye mɔgɔw kalan lɔnniya la fana. A ye talen caaman kɔrɔ ɲini, k'u sɛgɛsɛgɛ, k'u tugutugu ɲɔgɔn na.

¹⁰ Waajulikɛla jijara ka kumaɲumanw fɔ, minw sɛbɛnna ka tiɲɛ yira tigitigi.

¹¹ Hakilitigi ka kuma be i n'a fɔ misidɛndɛbaga ka bere, miseli be min na. A ka talenw be i n'a fɔ gween, min donna kogo la kosɔbɛ min te yuguyugu. O ye dɛndɛbaga kelen ka difɛn le ye.

¹² Ayiwa, ne deen, i yɛrɛ kɔlɔsi, i kana dɔ fara a kan. Mɔgɔw be sɛbɛ caaman bɔ, daan t'u la. Kalankɛkojugu be mɔgɔ barika ban.

¹³ I ye kuma minw lamɛn, o bɛɛ laban filɛ nin ye. Ka siran Ala ɲa, o dama le ye adamaden ka kɛta ye, bɛɛ ka Ala ka fɔta bato.

¹⁴ Bari, Ala bena mɔgɔw ɲininga u ka kɛwaliw kelen kelen bɛɛ la, hali minw kɛra dogo la, a ɲuman fara jugumanw kan.