Waajurikɛbaga 10 - ALA KA KUMA

¹ Limɔgɔsu be tulu kasadiman cɛn k'a kasa goya. Nalomanya dɔɔni fana be hakilitigiya ni boɲa nagasi.

² Hakilitigi ka miiriya tilennin lo, naloman taw tilennin tɛ.

³ Hali ni naloman ye sira ta, a be ye a la ko a nalonnin lo. O la, bɛɛ b'a fɔ ko naloman lo.

Hakilitigi ka yɛrɛminɛ

⁴ N'i kuntigi dimina i kɔrɔ, i kana i ka baara kɛta dabila. Bari, yɛrɛminɛ be mɔgɔ tanga kojugu caaman ma.

⁵ Ne ye kojugu kelen fana kɔlɔsi diɲɛ na: o ye masacɛ ka fili ye:

⁶ Lɔyɔrɔɲuman be di naloman ma, k'a sɔrɔ mɔgɔ minw ka kan ka jati, olu be to kɔfɛ.

⁷ Ne ye jɔɔnw taatɔ ye soow kan, ka masadenw ye seen na i ko jɔɔnw.

⁸ Mɔgɔ min be dingɛ sogi, o be se ka ben a kɔnɔ. Min be kogo juu sɔgɔ, saa be se k'a cin.

⁹ Kabakurubɔla be se k'a yɛrɛ mandimi ni kabakuru ye. Mɔgɔ min be lɔgɔ ci, farati ye o tigi ta ye.

¹⁰ Ni jende daa goyara n'i m'a diya, fɔɔ i ka dɔ fara i barika kan, ka se ka tigɛri kɛ n'a ye. Lɔnniya be na ni ɲataa ye.

¹¹ Ni saa ye dabaritigi cin, kuun te a ka dabari la.

Hakilitigi ni naloman

¹² Hakilitigi dalakuma mɛn ka di. Nga naloman ta b'a yɛrɛ mako sa.

¹³ A ka kuma be daminɛ ni nalomanyakuma ye, ka laban ni fatɔyakuma ye.

¹⁴ Naloman ka kuma ka ca. Adamaden t'a lɔn, koo min bena kɛ kɔfɛ. Koo min bena kɛ a kɔfɛ, jɔn le be se k'o ɲafɔ a ye?

¹⁵ Naloman ka baara b'a sigɛn. A bena sira min ta, a yɛrɛ t'o lɔn.

Masacɛ ka koo

¹⁶ Bɔnɛ ye ele jamana nin ta ye. E min masacɛ ye denmisɛn ye. E min kɔnɔ, ɲamɔgɔw be dumunibabaw kɛ sɔgɔma o sɔgɔma.

¹⁷ E dagamuna, ele jamana min masacɛ ye masaden ye. E min kɔnɔ, ɲamɔgɔw be dumuni kɛ a kɛwaati la. U be dumuni kɛ waasa ka barika sɔrɔ. Nga u t'a kɛ minni ye.

¹⁸ Salabagatɔ ka boon banabiri be kari ka ben. Mɔgɔ min mako te foyi la, jii be don ka lɔ ale lo ka soo kɔnɔ.

¹⁹ Mɔgɔw be dumunibaba labɛn, waasa ka ɲanagwɛ. Duvɛn be mɔgɔ nisɔndiya. Wari be se ka fɛɛn bɛɛ kɛ.

²⁰ I kana kojugu miiri masacɛ la. I kana kumajugu fɔ mɔgɔbaba kosɔn, hali i ka layɔrɔ la. Bari, kɔnɔ be se ka bɔ n'i ka kuma ye. I ye min fɔ, gamantigi be se k'o yɛrɛkɛ.