Waajurikɛbaga 1 - ALA KA KUMA

Fɛɛn bɛɛ ye kabako ye

¹ Dawuda deen Waajulikɛla ka kuma, ale min ye masa ye Zeruzalɛmu.

² Kabako, kabako! Waajulikɛla ko ten. Fɛɛn bɛɛ ye kabako ye.

³ Adamaden be baara min bɛɛ kɛ diɲɛ na, a be tɔnɔ jumɛn le sɔrɔ o la?

⁴ *Filankuru dɔ be tɛmɛ, dɔ wɛrɛ be wili. Nga dugukolo be to a nɔɔ na tuma bɛɛ.

⁵ Tile be bɔ, ka taga ben. A mana ben, a be teliya ka segi ka ta'a bɔyɔrɔ la tugu.

⁶ Fɔɲɔ be fiyɛ ka taga worodugu faan fɛ, ka yɛlɛma ka taga kɔgɔdugu faan fɛ, a be munumunu ka munumunu, ka segi k'a ka sirakɔrɔ ta.

⁷ Kɔɔ bɛɛ be woyo ka taga kɔgɔji kɔnɔ, nga a te fara ka ye. Kɔɔw be woyo ka taga u taayɔrɔ kɔrɔ le la.

⁸ Koo bɛɛ ye sigɛn ye, mɔgɔ te se ka min ɲafɔ. Ɲadenw te fa filɛli la, tulo te fa mɛnni na.

⁹ Fɛɛn min tun be yen ka kɔrɔ, o le bena tila ka kɛ yen tugu. Koo min tun kɛra, ale lo bena kɛ tugu. Fɛnkura si te yen diɲɛ na.

¹⁰ U man'a fɔ fɛɛn min ma ko: «Aa, nin ye fɛnkura ye», o y'a sɔrɔ, o ɲɔgɔn tɛmɛna kabini tumajan an ɲa.

¹¹ Fɔlɔfɔlɔ mɔgɔw ka koo te to bii mɔgɔw hakili la. Mɔgɔ minw bena na, u fana ka koo tena to olu kɔmɔgɔw hakili la.

Lɔnnikɛla ka lɔnni

¹² Ne Waajulikɛla tun ye Isirayɛlidenw ka masacɛ ye Zeruzalɛmu.

¹³ Koo minw bɛɛ be kɛra dugukolo kan, ne ye olu jati minɛ kosɔbɛ k'u sɛgɛsɛgɛ lɔnniya sababu la. O ye sigɛnba le ye Ala ye min la adamaden kan ko a k'a kɛ.

¹⁴ Koo minw bɛɛ be kɛra diɲɛ na, ne y'o bɛɛ jati minɛ, k'a ye ko kabako lo, i n'a fɔ mɔgɔ min b'a fɛ ka fɔɲɔ mara.

¹⁵ Fɛɛn min gɔngɔrɔnin lo, o te se ka tilen, fɛɛn min te yen, o te se ka jati.

¹⁶ Ne y'a fɔ n yɛrɛ kɔnɔ ko ne kɛra lɔnnikɛla ye kosɔbɛ ka tɛmɛ masa fɔlɔw bɛɛ kan Zeruzalɛmu. Ne ye hakilitigiya ni lɔnniya sɔrɔ kosɔbɛ.

¹⁷ Ne ye lɔnniya ɲini ni n dusu bɛɛ ye, ka hakilitanya ni nalomanya fana faamu. Ne y'a ye k'o be i n'a fɔ mɔgɔ min b'a fɛ ka fɔɲɔ mara.

¹⁸ Bari lɔnniyaba be na ni sigɛnba ye. Mɔgɔ min ka lɔnniya boɲana, o ka tɔɔrɔ fana be boɲa.