Tite 3 - ALA KA KUMA

Krista ka mɔgɔ taamacogo

¹ A fɔ bɛɛ ye ko u k'u yɛrɛ majigi kuntigiw ni faamaw ye, k'u boɲa, ani u labɛnnin ka to koɲuman sifa bɛɛ kɛli kama.

² U kana mɔgɔ si tɔgɔ cɛn, u kana kɛlɛ kɛ, u k'u yɛrɛ kɛ mɔgɔsɔbɛw ye, ka muɲu bɛɛ kɔrɔ tuma bɛɛ.

³ Bari fɔlɔfɔlɔ, an fana tun ye hakilitanw ye, mɔgɔmurutininw, an tun filila, nigɛjugu sifa bɛɛ, tun y'an kɛ jɔɔn ye, an tun be juguya, ni sɔnjuguya la. An koo fana tun man di ɲɔgɔn ye.

⁴ Nga an kisibaga Ala y'a ka ɲumanya n'a ka kanuya yira mɔgɔw la tuma min na,

⁵ a y'an kisi. O ma kɛ an ka kɛwaliɲuman kosɔn, nga a ka makari le kosɔn a y'o kɛ, an ye niikura sɔrɔ jii kɔnɔ koli fɛ Nii Senuman barika la, sisan an ɲanaman lo Ala faan fɛ.

⁶ A ye Nii Senuman d'an ma fɔɔ ka ɲa an kisibaga Yezu Krista barika la,

⁷ janko Ala ye an minw kɛ mɔgɔtilenninw ye a ka nɛɛma barika la, an ka nii banbali sɔrɔ an jigi be min kan.

⁸ Nin kuma ye tiɲɛ ye. Ne b'a fɛ i ka to o kan k'a fɔ ka gwɛlɛya, waasa mɔgɔ minw lara Ala la, olu k'u yɛrɛ bila koɲuman kɛli la, o le ka ɲi ani nafa b'o la mɔgɔw fɛ.

⁹ Nga e k'i yɛrɛ kɔlɔsi kumakolon, ni mɔgɔ buruju fɔko, ani sɔsɔli ni sariya koo mankan ma. U te foyi ɲa, o ye gwansan ye.

¹⁰ Mɔgɔ min be farali kɛ, i k'o tigi lasɔmi fɔɔ siɲɛ fila. O kɔ, i k'o tigi niin bɔ aw fɛ.

¹¹ I k'a lɔn k'o mɔgɔ sifa nin ye sira tilennin bila ka ban ani a ka hakɛ ye jalaki ben a kan.

Ladili laban ni foli

¹² Ni ne ye Aritimasi, walima Tisiki ci i fɛ tuma min na, i ka banba ka na ne kunbɛn Nikopolisi, bari ne y'a latigɛ ka samiɲa kɛ o yɔrɔ la.

¹³ I ka koo bɛɛ kɛ waasa Zenasi min ye mɔgɔ dɛmɛbaga ye kiti la, ani Apolɔsi nunu ka taama be ɲa, u kana fɔn foyi la.

¹⁴ An ka mɔgɔw fana ka kan ka koɲuman kɛli dege, waasa u ka se ka koo gwanninmanw ɲanabɔ, o la, u tena to gwansan.

¹⁵ Mɔgɔ minw be ni ne ye, olu bɛɛ b'i fora, i k'an teriw fo, minw kɛra Krista taw ye. Ala ka nɛɛma kɛ aw bɛɛ ye.