Tes 2nan 3 - ALA KA KUMA

Pɔli ko Tesalonikaw ka daalili kɛ olu ye

¹ Ayiwa n balimaw, an b'a ɲini aw fɛ ko aw ka Ala daali an ye, waasa Matigi ka kuma ka se yɔrɔ bɛɛ teliya la, ani ka boɲa sɔrɔ, i n'a fɔ a tun kɛra aw cɛma cogo min na,

² ani Ala k'an kisi mɔgɔjugu ni mɔgɔkolonw ma, bari mɔgɔ bɛɛ ma sɔn kibaru diman ma.

³ Nga Matigi ye kantigi ye, a bena jagwɛlɛya d'aw ma ani k'aw tanga juguman ma.

⁴ Matigi barika la, an jigi b'aw kan ko an ye koo minw ɲini aw fɛ, aw b'o kɛra, ani aw fana bena to k'o kɛ.

⁵ Matigi k'a to aw ka ɲɔgɔn kanu i n'a fɔ Ala be mɔgɔ kanu cogo min na, ani aw ka se ka muɲuli kɛ i ko Krista y'a kɛ cogo min na.

Pɔli ko Tesalonikaw ka kɛ a ladegebagaw ye

⁶ N balimaw, an b'aw daali an Matigi Yezu Krista tɔgɔ la ko aw ka faran ka bɔ aw balimakolonw na, minw te taama ka kɛɲɛ n'an ka kalan ye.

⁷ Aw ka kan k'an ladege cogo min na, aw yɛrɛ b'o lɔn, bari an tun ma kɛ salabagatɔw ye aw cɛma.

⁸ K'an to aw cɛma, an m'a ɲini mɔgɔ si fɛ ko a k'an balo, an yɛrɛ le tun be baara kɛ ka sigɛn suu ni tile, waasa an kana kɛ mɔgɔ si ka doni ye.

⁹ A ma kɛ ko an tun man kan n'o ye. An tun ka kan n'a ye, nga an tun b'a fɛ ka koo le ɲayira aw la.

¹⁰ K'an to aw fɛ yen, an tun b'a fɔ aw ye tuma bɛɛ ko mɔgɔ min te sɔn baara ma, o tigi kana dumuni kɛ fana.

¹¹ An y'a mɛn ko mɔgɔ dɔw b'aw cɛma minw ye salabagatɔw ye, u te sɔn ka foyi kɛ fɔɔ kokolonw.

¹² An b'a ɲini o mɔgɔ nunu fɛ ani an b'u ladi an Matigi Yezu Krista tɔgɔ la, k'u hakili siginin ka baara kɛ dɔrɔn k'u yɛrɛ ka dumuni sɔrɔ.

¹³ Aw kɔni, n balimaw, aw kana koɲuman kɛli dabila.

¹⁴ Ni mɔgɔ min ma sɔn k'an ka bataki nin kɔnɔnakuma bato, aw k'o tigi to yen, aw kana jɛnɲɔgɔnya kɛ n'a ye tugu, janko a ka maloya.

¹⁵ O n'a ta bɛɛ, aw kan'a minɛ i n'a fɔ aw jugu, nga aw k'a ladi i n'a fɔ aw balima.

Pɔli be duba ni foli kɛra

¹⁶ Hɛrɛtigi ka hɛrɛ kɛ aw ye tuma bɛɛ ni cogo bɛɛ la. Matigi ka to n'aw bɛɛ ye.

¹⁷ Ne Pɔli le be foli kuma nin sɛbɛnna n yɛrɛ ma. N be to ka n bulonɔ bila ten n ka batakiw bɛɛ la. N be to k'o sɛbɛn ten.

¹⁸ An Matigi Yezu Krista ka nɛɛma kɛ aw bɛɛ ye.