Tes 2nan 2 - ALA KA KUMA

Koo min ka kan ka kɛ yanni Matigi ka na

¹ Min y'an Matigi Yezu Krista ka kɔsegiko ye, ani an lajɛnko ye a fɛ, n balimaw, an b'aw daali ko

² aw kan'a to mɔgɔ si k'aw hakili ɲagami, ani ka siranya bila aw la, ko ale ye kirayakuma sɔrɔ, ka kuma dɔ fɔ aw ye, walima n'u dɔ ye bataki koo fɔ aw ye k'o bɔra an fɛ, n'u b'a fɔ aw ye ko Matigi ka kɔsegituma sera.

³ Aw kana la u la, bari murutili bena kɛ Ala ma fɔlɔ, mɔgɔjugu k'a yɛrɛ yira, ale min labɛnnin be halakili kama.

⁴ Ale bena wili batofɛnw bɛɛ kama k'a yɛrɛ boɲa ka taga sigi Alabatosoba kɔnɔ k'a yɛrɛ kɛ Ala ye.

⁵ Ne tun y'o koo fɔ aw ye tuma min na ka ne to aw fɛ yen, aw hakili t'o la wa?

⁶ Fɛɛn min b'a bali sisan n'a te se k'a yɛrɛ yira, n'a waati ma se, aw b'o lɔn.

⁷ Bari fɛnjugu dogonin y'a ka baara daminɛ ka ban, a tora fɛɛn min b'a bali, o ka bɔ a ɲa dɔrɔn.

⁸ O la, mɔgɔjugu nin b'a yɛrɛ yira, an Matigi Yezu ben'a halaki a dalafɔɲɔ fɛ, k'a kɛ a be tunu pewu n'a ka nali nɔɔrɔ ye.

⁹ O juguman nin bena na ni Sutana ka fanga ye, ka kabako sifa bɛɛ kɛ fɔɔ ka mɔgɔw namara ni dɔw ye.

¹⁰ A bena kojugu sifa bɛɛ kɛ janko mɔgɔ minw be halaki sira kan, a ka olu lafili. Olu bena halaki bari u ma sɔn tiɲɛ koo ka diya u ye, u tun be se ka kisi min barika la.

¹¹ O le y'a to Ala y'a kɛ u filila kosɔbɛ.

¹² A kɛra ten, mɔgɔ minw ma sɔn tiɲɛ ma, ani kojugu ka di u ye, olu ka jalaki.

Ala ka weleli

¹³ N balimaw, aw minw koo ka di Matigi ye, an ka kan ka barika la Ala ye aw kosɔn tuma bɛɛ, bari a y'aw woloma kabini fɔlɔfɔlɔ, waasa aw ka kisi, aw jigi barika la, min be tiɲɛ kan, ani Nii Senuman barika la, ale min b'aw kɛ Ala ta ye.

¹⁴ A y'aw wele o le kama an ka kibaru diman fɔli barika la, janko aw k'an Matigi Yezu Krista ka nɔɔrɔ sɔrɔ.

¹⁵ O la n balimaw, an ye aw kalan koo minw na, an ye min fɔ aw ye n'an daa ye, walima an ye minw kɛ bataki ye k'o ci aw ma, aw ka jija k'o minɛ ka ɲa kosɔbɛ.

¹⁶ An Matigi Yezu Krista yɛrɛ, n'an Faa Ala, min y'an kanu n'a b'an jaa gwɛlɛya tuma bɛɛ, ani ka jigiɲuman d'an ma, a ka nɛɛma kosɔn,

¹⁷ olu k'aw jaa gwɛlɛya, ani ka barika don aw la koo bɛɛ la, baara ni kuma na.