Tes 2nan 1 - ALA KA KUMA

Foli

¹ Ne Pɔli ni Silivɛn, ani Timote be bataki nin ci Ala ka jama ma Tesaloniki, aw minw ye an Faa Ala n'an Matigi Yezu Krista ta ye.

² An Faa Ala, n'an Matigi Yezu Krista ka nɛɛma ni hɛrɛ kɛ aw ye.

Tesalonikaw ka jijali

³ N balimaw, an ka kan ka barika la Ala ye tuma bɛɛ aw kosɔn la, o ka ɲi. Bari aw jigi lanin lo Matigi kan kosɔbɛ ani kanuya min be aw ni ɲɔgɔn cɛ, o be boɲana ka taga ɲa,

⁴ fɔɔ an b'an yɛrɛ boɲa Krista ka jama cɛma aw ka jijali, n'aw ka lanaya kosɔn, hali k'aw to nin tɔɔrɔ ni kɔrɔbɔli bɛɛ la.

⁵ O ye Ala ka kiti tilennin taamasiɲɛ ye, o kɛkun ye nin ye: waasa k'aw kɛ mɔgɔw ye minw ka kan ni Ala ka masaya ye aw be tɔɔrɔla min kosɔn.

An Matigi Yezu bena kɔsegi ka na

⁶ A bɛnnin lo Ala k'aw tɔɔrɔbagaw tɔɔrɔ fana.

⁷ O la, aw minw be tɔɔrɔ la, a ka hɛrɛ kɛ aw ye i n'a fɔ anw. O bena kɛ an Matigi Yezu kɔsegituma na n'a ben'a yɛrɛ yira ka bɔ sankolo la n'a ka mɛlɛkɛ setigiw ye.

⁸ A bena na ni tasuma ye, ka mɔgɔw ɲaa gwan minw ma Ala lɔn ani minw ma sɔn an Matigi Yezu ka kibaru diman ma.

⁹ U ta bena cɛn pewu, u yɔrɔ bena jaɲa Matigi n'a ka nɔɔrɔ la.

¹⁰ Mɔgɔ minw y'u jigi la a kan, a bena na o loon na janko olu k'a boɲa, ani u ka nisɔndiya a ka koo la, aw fana do sɔnna an ka kuma ma.

¹¹ O le y'a to an b'an ka Ala daali aw ye tuma bɛɛ, waasa, Ala y'aw wele kuun min na, aw k'o ɲa. Ani ka see d'aw ma, aw jigi kosɔn, aw b'a fɛ ka koɲuman min kɛ, aw ka se k'o kɛ.

¹² O la, an Matigi Yezu tɔgɔ bena boɲa aw kosɔn, ani aw fana ka boɲa sɔrɔ ale kosɔn, ka kɛɲɛ n'an ka Ala, n'an Matigi Yezu Krista ka nɛɛma ye.