Dɔnkiriw 7 - ALA KA KUMA

(Dɔw)

¹ Na, na Sulamiti! Na, an b'i filɛ sa! Mun n'aw be Sulamiti filɛra i ko aw be dɔnkɛlaw le filɛra?

(Kanbelen)

² Ee! I seenw cɛɛ ka ɲi e ka sanbaraw kɔnɔ dɛ! Masacɛ denmuso! I soron koorinin be i ko bololanigɛ, min ye bololabaarakɛla dɔ bulonɔ ye.

³ I kɔnɔbara be i ko filen, kalo tilan kelen, duvɛn te fɔn a kɔnɔ. I fari kɛra i ko suman tonnin, lisiyiriw kɛra ka min koori.

⁴ I sinbara fila cɛɛ ka ɲi i ko mankalaniden fila, i ko minanden fila.

⁵ I kankala be i ko sangaso min lɔra ni samaɲin ye. I ɲadenw be manamana i ko Ɛsibɔn dalan jii min be Batirabɛn donda gɛrɛfɛ. I nunkala be i ko Liban sangaso min lɔnin lo k'a ɲasin Damasi dugu ma.

⁶ I lɔra i ko Karimɛli kulu. I kunsigi dannin sira be i ko foro kɔnɔ walan! Mɔgɔ bena ben minw kɔnɔ.

⁷ Ee! I do cɛɛ ka ɲi sa! I koo ka di n ye! Ne kanubaga! E min koo be ne dusu la!

⁸ I be i ko tamarosun. E siin be i ko yiridenw.

⁹ Ne ko: Fɔɔ ne ka yɛlɛ tamarosun nin kan k'a deen sɔrɔ. E sinbara nunu ka maga ne bolo i ko *ɛrɛzɛn mɔnnin. I nunfiɲɛ ka kɛ i ko yiriden kasadiman dɔ.

¹⁰ I dalakuma ka di i ko duvɛn diman. Jaati, a bilanin be ne kanubaga le ye, a be woyo an dagolo kan an sinɔgɔtuma.

(Sunguru) Nisɔndiya be kanuya la

¹¹ Ne ye n kanubaga ta ye, ne koo le b'a dusu la kosɔbɛ!

¹² Ne kanubaga, na, an be taga kongo kɔnɔ. An bena si dugudennin dɔ la.

¹³ Sɔgɔma joona, an be taga filɛli kɛ foro la n'o y'a sɔrɔ ni *ɛrɛzɛn nɛrɛla ka feeren, ni yiriw feerenna. O yɔrɔ la, ne ben'a yira i la ko n b'i kanu.

¹⁴ Yiriden min be kanuya boɲa, o kasa be wilila. Yiridenɲuman sifa bɛɛ be an ka bonda la, tigɛnin kuraman ni kɔrɔmanw bɛɛ. Ne y'o mara ele ye, ne kanubaga.