Dɔnkiriw 3 - ALA KA KUMA

Sunguru be siko ni kanbelen ye (Sunguru)

¹ Ka ne to n layɔrɔ la, ne ye suu bɛɛ kɛ, ni ne be n kanubaga ka koo miirila. Ne y'a koo miiri ka dɛsɛ ne m'a ye.

² Fɔɔ ne ka wili ka dugu yaala, min koo ka di ne ye, n k'ale ɲini siraw kan ni forobayɔrɔw la. Ne y'a yaala ka dɛsɛ ne m'a ye.

³ Ne ye dugu kɔlɔsibagaw kunbɛn, n'u be dugu munumununa. N ko: «Aw ma ne kanubaga kunbɛn wa?»

⁴ Ne tɛmɛna u la dɔɔni dɔrɔn, ne ye n kanubaga kunbɛn. Ne y'a minɛ, ne ten'a bila tugu fɔɔ ne ka don n'a ye n bamuso ka soo kɔnɔ, min ye ne wolo, ale ka boon kɔnɔ.

⁵ Heyi! Zeruzalɛmu sunguruw, minanw ni mankalaninw kosɔn, ne b'aw daali ko aw kana n kanubaga kunun, aw kan'a to a be wili n'a man d'a ye.

⁶ Ee! Jɔn le be wilila ka bɔ kongo la ten, i ko sisi? Mire kasa ni wusulan kasa, ani kasa diman bɛɛ b'a kan.

⁷ Solomani tafɛn lo. A lamininin be ni cɛɛ barikaman bi wɔɔrɔ ye, olu minw barika ka bon ni Isirayɛli barikatigiw bɛɛ ye.

⁸ Murujan b'u bɛɛ fɛ, u bɛɛ labɛnnin lo kɛlɛ kama. U bɛɛ ka murujanjanw b'u tɔgɔn na, sufɛ balawu kama.

⁹ Masacɛ Solomani y'a tafɛn kɛ ni Liban yiri ye,

¹⁰ k'a seenw kɛ warigwɛ ye, k'a kɔsɛmɛyɔrɔ kɛ sanu ye, k'a sigiyɔrɔ kɛ ni fani wulenman cɔncɔncɔn ye. Zeruzalɛmu sunguruw le y'o labɛn kanuya la.

¹¹ *Siyɔn sunguruw, aw ye bɔ ka masacɛ Solomani filɛ, ni masafugulan b'a kuun na, a bamuso ye min biri a kuun na a ka furu sirilon na. A ka nisɔn diyalon.