Dɔnkiriw 1 - ALA KA KUMA

¹ Solomani ka dɔnkiliw bɛɛ la diman.

Kanuɲɔgɔnmanw ka baro (Sunguru)

² N mɔmɔ, n fari saalo ka ɲa sa! I ka mɔmɔni ka di ka tɛmɛ duvɛn kan.

³ I ka tulu kasa ka di ka tɛmɛ tulu bɛɛ kan. I be i ko tulu kasadiman. O kama, i koo ka di sungurudenw ye.

⁴ Ne minɛ ka tugu i kɔ, an ka boli! Masa, don ni ne ye i ka soo. An ka nisɔndiya kosɔbɛ e kosɔn! An b'i ka koo diya fɔ ko a tɛmɛna duvɛn kan. Tiɲɛ be sunguruw fɛ n'u b'i kanu!

⁵ Zeruzalɛmu sunguruw, n finnin lo. N be i ko Kedari bugusow, nga n cɛɛ ka ɲi. N be i ko Solomani ka sodalafaniw.

⁶ E kana ne finko filɛ, tile le ye ne jɛni. Ne baden cɛmanw le dimina ne kɔrɔ, u ye ne bila *ɛrɛzɛnforow kɔlɔsili la. Nga ne ma n ta kɔlɔsi.

⁷ Ee, a fɔ n ye dɛ, e min koo ka di ne ye. I bena taga i ka begɛnw dɛndɛ min? I bena taga n'u ye min, waasa u ka lafiɲɛ tilefɛ? O la, ne kana yaalayaala e tɔɲɔgɔnw ka begɛnw kɔ gwansan.

(Begɛndɛndɛbagaw)

⁸ Ele min cɛɛ ka ɲi ni musow bɛɛ ye, ni e m'o lɔn, e ka bɔ ka begɛnw kɔɔ gwɛn, ka taga i ka badenninw dɛndɛ begɛndɛndɛbagaw ka togonda gɛrɛfɛ.

(Kanbelen)

⁹ Ne kanubaga, e cɛɛ ka ɲi i ko *Faraŋɔn ka wotoro sama soo.

¹⁰ I ka tulolanigɛw ye dɔ fara e ɲada ka ɲa kan. Kɔnɔkisɛ y'i kaan ɲa dɛ!

(Begɛndɛndɛbagaw)

¹¹ An bena tulolanigɛ sanulaman lalaga i ye, ka warigwɛ dondon a la.

(Sunguru)

¹² Ka ne ka masacɛ to a ka baro kɛyɔrɔ la, ne ka tulu kasadiman kasa be bɔra.

¹³ Ne kanubaga be i ko kasadiyanan, bɔɔrɔnin kɔnɔ. A be to ne disi kan.

¹⁴ Ne kanubaga kasa ka di i ko jabifeeren ne fɛ, Ɛngɛdi ɛrɛzɛnforo kɔnɔ.

(Kanbelen)

¹⁵ I cɛɛ ka ɲi, ne kanubaga, i cɛɛ ka ɲi! I ɲadenw cɛɛ ka ɲi i ko tuganin ta!

(Sunguru)

¹⁶ I cɛɛ ka ɲi haali, ne kanubaga, an be la binkɛnɛ le kan.

¹⁷ An ka boon birinin be ni yiriw ye, a kogo ye yiriw ye.