Sariya 34 - ALA KA KUMA

Musa sayako

¹ Musa lɔra Mowabu kɛnɛba la ka taga yɛlɛ Nebo kulu kan, Pisiga kulu kunna, Zeriko ɲafɛ. Masaba ye jamana nin bɛɛ yira a la, k'a ta Galaadi mara la fɔɔ ka se Dan:

² Nɛfutali ka mara bɛɛ, ni Efarayimu ani Manase ka maraw, ni Zuda ka mara fɔɔ ka taga se tileben ɲafan kɔgɔji ma,

³ ni Zuda mara worodugu ɲafan fɛ, ani Zurudɛnba kɛnɛ, Zeriko mara, min ye Tamarosundugu ye, fɔɔ ka taga Sowari.

⁴ Masaba y'a fɔ ko: «A filɛ, ne ye jamana min layidu ta Ibrayima, ni Isiyaka, ani Yakuba ye, tuma min na ne y'a fɔ u ye ko, ne bena jamana nin di aw kɔmɔgɔw ma, n b'a yira i la, nga i tena don yen.»

⁵ Masaba ka baarakɛla Musa sara yen Mowabu mara la, i ko Masaba tun y'a fɔ cogo min na.

⁶ Ala yɛrɛ y'a suu don Mowabu kulu dɔw furancɛ la Bɛtipewɔri ɲafɛ. Fɔɔ ka se bii ma, mɔgɔ si m'a lɔn a kaburu be yɔrɔ min na.

⁷ Musa satuma na, a tun be ni saan kɛmɛ ni mugan ye, nga a tun be yeli kɛ ka ɲa halibi, a fanga fana tun ma ban.

⁸ Isirayɛlidenw kasira Musa ka saya la tile bi saba kɔnɔ Mowabu kɛnɛba la. Musa sanga banna ten.

⁹ Hakilitigiya tun be Nun dencɛ Zozuwe la kosɔbɛ, bari Musa tun y'a bolo la a kunna. O la, Isirayɛlidenw ye mɛnni kɛ a fɛ, Masaba tun ye min fɔ Musa ye, u y'o kɛ.

¹⁰ Kira ma wili Isirayɛlidenw cɛma tugu i n'a fɔ Musa, Masaba tun be kuma ni ale ye daa ni daa.

¹¹ A y'a ci ka taga taamasiɲɛ ni kabako nunu bɛɛ kɛ Ezipiti jamana na Ezipiti masacɛ n'a ka baarakɛlaw bɛɛ la, n'a ka jamana bɛɛ.

¹² Isirayɛlidenw bɛɛ ɲakɔrɔ, Musa ye baara kɛ ni sebagaya ye, ka siranyakow kɛ.