Sariya 33 - ALA KA KUMA

Musa be duba kɛ Isirayɛli kɔmɔgɔw ye

¹ Sanni Ala ka mɔgɔ Musa ka sa, a ye duba minw kɛ Isirayɛlidenw ye, olu filɛ nin ye.

² A ko: «Masaba bɔra Sinayi kulu kan ka na, a bɔra i ko tile wilitɔ, *Seyiri mara la. A tora Paran kulu kan ka yeelen bɔ a ka jama ye. A nana ni mɛlɛkɛ waa caaman ye, ka bɔ kulu nin kan, worodugu ɲafan fɛ.

³ Isirayɛli jama koo ka di Masaba ye, a b'a ka mɔgɔw bɛɛ mara. U b'u kunbiri gwan a seen kɔrɔ, u be kalan sɔrɔ yen.

⁴ Musa ye sariya min di anw ma, o ye Yakuba kɔmɔgɔw ka nafolo le ye.

⁵ Masaba kɛra Yesurun ka masa ye, jama kuntigiw ni Isirayɛlidenw bɛɛ lajɛntuma na.

⁶ Urubɛn kɔmɔgɔw ka to nii na, u kana sa, a kɔmɔgɔw ka caya.»

⁷ A ye min fɔ Zuda kɔmɔgɔw ka koo la, o filɛ: «Masaba, Zuda kaan mɛn. A to u be bɛɛn n'u ka mɔgɔw ye tugu. U ka barika sɔrɔ kɛlɛ la. Kɛ u dɛmɛbaga ye u juguw kama!»

⁸ Levi kɔmɔgɔw ka koo la, Musa y'a fɔ ko: «Masaba, i ye filɛlikɛnanw *Urimu ni *Tumimu kalifa i ka baarakɛla tilenninw ma. I y'u kɔrɔbɔ Masa yɔrɔ la, i y'u sɛgɛsɛgɛ Meriba jiyɔrɔ la.

⁹ U y'a yira ko i koo ka d'u ye ka tɛmɛ u faaw n'u balimaw, n'u deenw kan. U y'i ka fɔta kɛ, k'i ka bɛɛn bato.

¹⁰ U be Yakuba kɔmɔgɔw kalan i ka kolatigɛninw na, u be Isirayɛlidenw kalan i ka sariya la. U be wusulan jɛni i ɲakɔrɔ, u be saraka dafaninw bɔ i ka sarakabɔyɔrɔ la.

¹¹ Masaba, barika don u la, i ka u ka kokɛtaw bɛɛ ɲa. U juguw fanga cɛn, u ka sebagaya dɔgɔya, janko u kana wili tugu.»

¹² Bɛnzamɛn kɔmɔgɔw ka koo la, Musa y'a fɔ ko: «U ye Masaba ka diyanamɔgɔw le ye, u hakili siginin be to u ka Ala gɛrɛfɛ. A b'u mara loon o loon, a be u cɛma.»

¹³ Yusufu kɔmɔgɔw ka koo la, a y'a fɔ ko: «Masaba ka barika don u ka dugukolo la: U ka komiji sɔrɔ ka bɔ sankolo la, ani jii, ka bɔ dugukolo la.

¹⁴ Tile k'a kɛ sumanw be falen, kalo o kalo, sumankuraw ka mɔn.

¹⁵ U ka fɛɛn ɲanamanw sɔrɔ fɔlɔfɔlɔ kuluw kan, u ka nafa sɔrɔ tintinkɔrɔw kan.

¹⁶ Jamana nin kɔnɔnafɛn ɲumamanw ka kɛ u ta ye, Ala ka ɲumanya ka to u kan, ale min tun be yiritunin na. Ala k'o duba nunu bɛɛ minɛ Yusufu ka jama ye, ale min kɛr'a balimaw kuntigi ye.

¹⁷ Fanga be Yusufu la i ko tura, kongomisi gɔɔn ɲɔgɔn fila le b'a fɛ. A be siyaw kɛlɛ n'o ye, a b'o ɲɔti fɔɔ diɲɛ daan na. O gɔɔn kelen ye Manase ka mɔgɔ waa caaman ye, tɔ kelen ye Efarayimu ka mɔgɔ waa tan tan le ye.»

¹⁸ Zabulɔn kɔmɔgɔw ka koo la, Musa y'a fɔ ko: «Zabulɔn kɔmɔgɔw, aw ka nisɔndiya aw ka jago kɔnɔ, Isakari kɔmɔgɔw, aw ka nisɔndiya aw ka fanibuguw kɔnɔ.

¹⁹ U bena siyaw wele ka na kulu kunna, u bena saraka bɛnninw bɔ o yɔrɔ la. U bena balo kɔgɔji kɔnɔ fɛɛnw caya sababu la, ani nafolo min dogonin be cɛncɛn jukɔrɔ.»

²⁰ Gadi kɔmɔgɔw ka koo la, Musa y'a fɔ ko: «Masaba ka tanu, ale min be dugukoloba di Gadi kɔmɔgɔw ma! Gadi kɔmɔgɔw lanin be i ko jara, u labɛnnin be ka sogo ɲafɛsen faran, walima a kuun yɛrɛ.

²¹ U ye dugukolo ɲanaman kɛ u yɛrɛ ta ye. Faan min ka kan ni ɲamɔgɔ ye, u y'o ta. U tagara fara jama ɲamɔgɔw kan, u ye Masaba sago kɛ. Masaba ye min ŋaniya Isirayɛli ye, u y'o kɛ.»

²² Dan kɔmɔgɔw ka koo la, Musa y'a fɔ ko: «Dan kɔmɔgɔw be i ko jaraden min be pan ka bɔ *Basan.»

²³ Nɛfutali kɔmɔgɔw ka koo la, a y'a fɔ ko: «Duba be Nɛfutali kɔmɔgɔw kan, Masaba ka ɲumanya b'u kan. A k'u ka mara boɲa ka taga tileben, ni worodugu faan fɛ.»

²⁴ Asɛri kɔmɔgɔw ka koo la, Musa y'a fɔ ko: «Asɛri ka barika sɔrɔ Yakuba deenw cɛma. A koo ka diya a balimaw ye, a k'a seen ko tulu la.

²⁵ I ka dugu dondaw sɔgɔnanw ka kɛ nigɛ ani zira ye, barika ka to i la i sii bɛɛ la.

²⁶ Yesurun, i ka Ala ɲɔgɔn te yen! A be bɔ sankolo la ka na i dɛmɛ, a be na sankabaw kan i ko sotigi, a be na a ka nɔɔrɔ kɔnɔ.

²⁷ Kabini fɔlɔfɔlɔ, Ala kɛra i dogoyɔrɔ ye, kabini fɔlɔfɔlɔ, i maranin be a ka sebagaya barika la. Ale lo b'i juguw gwɛn ka bɔ i ɲafɛ, a b'a fɔ ko u k'u faga.

²⁸ Isirayɛlidenw siginin be hɛrɛ la, Yakuba kɔmɔgɔw siginin be sutara la, jamana kɔnɔ, suman ni duvɛnkɛnɛ be yɔrɔ min na, bari komiji be bɔ sankolo la ka na.

²⁹ Isirayɛlidenw, aw dagamuna dɛ! Jɔn be i ko aw? Masaba y'aw le kisi. Masaba y'aw tangabaga n'aw dɛmɛbaga ye, murujan lo, min be see di aw ma. Aw juguw bena u yɛrɛ majigi aw kɔrɔ, aw bena u ka yɔrɔbabaw cɛn.»