Sariya 31 - ALA KA KUMA

Musa ka kuma laban ( 31.1—34.12 ) Musa ka saya

¹ O kɔ, Musa y'a fɔ Isirayɛlidenw bɛɛ ye tugu ko:

² «Sisan, ne be ni saan kɛmɛ ni mugan ye, ne te se ka kɛ aw ɲamɔgɔ ye tugu. Masaba yɛrɛ y'a fɔ ne ye ko ne tena Zurudɛn baji tigɛ.

³ Masaba aw ka Ala yɛrɛ bena bila aw ɲafɛ. Siya minw be faan dɔ fɛ, a bena olu bɛɛ halaki, janko aw ka se k'u ka jamana minɛ. Zozuwe bena kɛ aw kuntigi ye i ko Masaba y'a fɔ cogo min na.

⁴ Masaba bena siya nunu halaki i n'a fɔ a ye amoriw ka masacɛ Siŋɔn ni Ɔgi n'u ka maraw cɛn cogo min na.

⁵ A bena u di aw ma, aw bena u kɛ i ko a y'a fɔ aw ye cogo min na.

⁶ Aw ka barika don aw yɛrɛ la, k'aw jaa gwɛlɛya, aw kana siran ka yɛrɛyɛrɛ u ɲɛ bari, Masaba aw ka Ala bena taama n'aw ye, a tena aw to yen, a tena faran ka bɔ aw la.»

⁷ O kɔ, Musa ye Zozuwe wele k'a fɔ a ye Isirayɛlidenw bɛɛ ɲana ko: «I ka barika don i yɛrɛ la, k'i jaa gwɛlɛya, bari Masaba ye layidu ta jama nin bɛmaw ye ko a bena jamana min di u ma, e lo bena taga n'u ye o yɔrɔ la. Ani k'a tilan u cɛ, ka bɛɛ niyɔrɔ d'a ma.

⁸ Masaba le bena bila i ɲafɛ, a bena to n'i ye tuma bɛɛ, a tena i to yen, a tena faran ka bɔ i la. I kana siran, i jaa kana tigɛ.»

Sariya kalanko

⁹ Musa ye sariya nin sɛbɛn k'a di Levi kɔmɔgɔw, sarakalasebagaw ma, minw ka kan ka Masaba ka layidu taamasiɲɛ kɛsu ta, ani Isirayɛli cɛkɔrɔbaw.

¹⁰ O kɔ, Musa y'a fɔ u ye ko: «Saan wolonwula o saan wolonwula, juru yafasan na, *Gwatakɔrɔsigi ɲanagwɛ tuma na,

¹¹ ni Isirayɛlidenw bɛɛ nana lɔ Masaba aw ka Ala ɲakɔrɔ tuma min na, a ka yɔrɔ wolomanin na, e bena sariya nin kalan u bɛɛ ɲana, u k'a mɛn.

¹² I bena mɔgɔw bɛɛ lajɛn, cɛɛ fara musow kan, ni denmisɛnw, ani lonan minw bɛɛ siginin be aw ka duguw kɔnɔ, waasa u ka se ka kuma nin mɛn, k'a lɔn ka siran Masaba aw ka Ala ɲa, k'a ka sariya nin kɔnɔnakuma bɛɛ bato.

¹³ U ka denmisɛn minw t'a lɔn fɔlɔ, olu fana ka kan k'a mɛn k'a lɔn ka siran Masaba aw ka Ala ɲa, k'aw to jamana nin kɔnɔ, aw bena Zurudɛn baji tigɛ ka min minɛ.»

Isirayɛlidenw bena muruti Ala ma

¹⁴ Masaba y'a fɔ Musa ye ko: «I satuma surunyana. Zozuwe wele, aw ka na ɲɔgɔn fɛ Ɲɔgɔnkunbɛn fanibugu la. N bena n ka ciiw fɔ a ye.» O la, Musa ni Zozuwe tagara Ɲɔgɔnkunbɛn fanibugu la.

¹⁵ Masaba y'a yɛrɛ yira o fanibugu nin yɔrɔ la, sankaba kɔnɔ, o tun be soo nin daa la.

¹⁶ A y'a fɔ Musa ye fɔlɔ ko: «Yanni dɔɔni i bena taga i faaw fɛ. I sanin kɔ, jama nin bena don jamana min kɔnɔ, u ben'a daminɛ ka kakalaya kɛ k'o yɔrɔ siyaw ka joow sɔn. U bena ban ne la, ne ye bɛɛn min kɛ n'u ye, u bena o cɛn.

¹⁷ O loon na, ne bena dimi u kɔrɔ k'u to yen. N bena n yɛrɛ dogo u la, u bena halaki. Kojugu ni tɔɔrɔ caaman bena u sɔrɔ. U ben'a faamuya ko kojugu nunu sera u ma, bari ne t'u cɛma tugu.

¹⁸ Ne bena n yɛrɛ dogo o loon na, bari u ye kojugu kɛ ka joow sɔn.

¹⁹ Sisan aw ka dɔnkili nin sɛbɛ aw yɛrɛ ye, ka Isirayɛlidenw degi a la, k'a to u b'a la, o dɔnkili nin ka kɛ seereya ye Isirayɛlidenw kama ne kosɔn la.

²⁰ Tiɲɛ na, ne tun ye jamana min layidu ta u bɛmaw ye, ne bena don ni jama nin ye o kɔnɔ, nɔnɔ ni lii ka ca kosɔbɛ yɔrɔ min na, jamana diman lo. U bena dumuni kɛ ka fa, ka boɲa, u bena yɛlɛma k'u ɲaa sin joow ma fana k'olu sɔn. U bena u ɲaa don ne la, ani ka ne ka bɛɛn cɛn.

²¹ Ni kojugu ni tɔɔrɔ caaman sera u ma tuma min na, u kɔmɔgɔw tena ɲinɛ nin dɔnkili nin kɔ, o bena kɛ seereya ye u kama. Ne b'u ka miiriyaw lɔn ka ban, yanni ne ka don n'u ye jamana nin kɔnɔ, ne ye min layidu ta.»

²² O loon na, Musa ye dɔnkili nin sɛbɛ ka Isirayɛlidenw dege a la.

²³ Masaba ye kuma nin fɔ Nun dencɛ Zozuwe ye ko: «Barika don i yɛrɛ la, k'i jaa gwɛlɛya, bari e lo bena don ni Isirayɛlidenw ye jamana nin kɔnɔ, ne ye min layidu ta u ye. Ne yɛrɛ bena kɛ n'i ye.»

²⁴ Tuma min na Musa ye sariya nin kɔnɔnakuma bɛɛ sɛbɛn ka ban sɛbɛ dɔ kɔnɔ,

²⁵ a ye kuma nin fɔ Levi kɔmɔgɔw ye, Masaba ka layidu taamasiɲɛ kɛsu koo tun be minw bolo.

²⁶ «Aw ka sariyasɛbɛ nin ta, k'a bila Masaba aw ka Ala ka layidu taamasiɲɛ kɛsu gɛrɛfɛ. A bena kɛ seereyafɛn ye aw kama o yɔrɔ la.

²⁷ Bari ne be aw ka murutiko n'aw ka tulogwɛlɛya lɔn. Aw kɛra mɔgɔmurutininw ye Masaba kama, k'a sɔrɔ ne be nii na aw cɛma. Ni ne sara, aw bena kɛ cogo di sa?

²⁸ Aw k'aw ka burujuw mɔgɔkɔrɔbaw bɛɛ lajɛn ne ɲakɔrɔ, n'aw ka ɲamɔgɔw bɛɛ, ne bena kuma nunu fɔ u ɲana, ka sankolo ni dugukolo kɛ n seerew ye u kama.

²⁹ Bari ne b'a lɔn ko ne sanin kɔ, aw bena kɛ mɔgɔjuguw yɛrɛ yɛrɛ ye. Ne ye sira min yira aw la, aw bena aw yɔrɔ jaɲa o la. Kojugu bena aw sɔrɔ waati nata la bari aw bena kojugu kɛ Masaba aw ka Ala ɲakɔrɔ, k'a dusu dimi n'aw ka kɛwaliw ye.»

Musa ka dɔnkili

³⁰ Musa ye dɔnkili nin kumadenw fɔ fɔɔ k'a ban Isirayɛlidenw bɛɛ ye ko: