Sariya 24 - ALA KA KUMA

Furusako

¹ «Ni cɛɛ dɔ ye muso dɔ furu, o kɔfɛ, muso nin nigɛ nana bɔ a la, bari a ye koo dɔ kɛ min y'a maloya, n'a ye furusasɛbɛ dilan k'a d'a ma, ani k'a gwɛn ka bɔ a ka soo kɔnɔ,

² ni muso nin bɔr'a fɛ ka taga furu cɛɛ wɛrɛ fɛ,

³ n'a nigɛ fana nana bɔ o tigi la fana, n'o ye furusasɛbɛ dilan k'a d'a ma, k'a gwɛn ka bɔ a ka soo, walima n'o cɛɛ nin sara,

⁴ cɛɛ fɔlɔ min tun y'a gwɛn, ale te se k'a ta tugu, bari a nɔgɔnin lo o cɛɛ nin faan fɛ. O koo ɲɔgɔn man di Masaba ye fewu. Masaba aw ka Ala be jamana min dira aw ma, aw kana hakɛ kɛ a kɔnɔ.

Kɔɲɔcɛ ka koo

⁵ «Kɔɲɔcɛ man kan ka taga kɛlɛ la, ani a man kan ka ta forobabaara si la. A ka kan ka to a ka soo kɔnɔ saan kelen k'a muso nisɔndiya.

⁶ «Kana mɔgɔ wajibiya k'a ka wugu, walima a ka wuguden minɛ i ka juru kama, bari o be kɛ sababu ye o tigi te balo.

⁷ «Ni aw Isirayɛlidenw dɔ y'a balima dɔ minɛ k'a kɛ jɔɔn ye, walima k'a feere, o tigi ka kan ka faga. O la, aw bena kojugu bɔ aw cɛma.

⁸ «Aw k'aw yɛrɛ kɔlɔsi farisogobana koo la: ne ye kuma minw fɔ sarakalasebagaw ye, minw ye Levi kɔmɔgɔw ye, ni u bena o fɔ aw ye, aw k'o bɛɛ bato.

⁹ Masaba aw ka Ala ye fɛɛn min kɛ Miriyama na k'aw to sira kan aw bɔnin kɔ Ezipiti jamana na, aw k'aw hakili to o la.

¹⁰ «N'i ye fɛɛn dɔ juru don i tɔɲɔgɔn na, kana don a ka soo kɔnɔ k'a ka fɛɛn dɔ ta i ka juru nɔɔ na.

¹¹ To kɛnɛma, i ye juru don mɔgɔ min na, ale lo bena bɔ k'a bololafɛn dɔ d'i ma juru nɔɔ na.

¹² «N'o tigi ye fantan ye, i ye fani min ta juru nɔɔ na, o kana si e fɛ.

¹³ Taga o fani nin d'a tigi ma tile bentuma na, waasa a ka se ka la ka ɲa. O la, a bena duba kɛ i ye, Masaba aw ka Ala bena o jati fana kotilennin ye.

Baaradenw ka koo

¹⁴ «Kana i ka baaraden dɛsɛbagatɔ fantan tɔɲɔ, i balima lo wo, walima lonan wo, min siginin be aw ka duguw dɔ la.

¹⁵ I b'a ka sara d'a ma loon o loon sanni tile ka ben, bari fantan lo, a kɔrɔtɔnin be k'a ka sara sɔrɔ. N'o tɛ, a bena i jalaki Masaba ɲana, o bena kɛ hakɛ ye i fɛ.

Bɛɛ n'a kunko

¹⁶ «Faaw tena faga u deenw nɔɔ na, deenw fana tena faga u faaw nɔɔ na. Mɔgɔ kelen kelen bɛɛ bena faga a yɛrɛ ka hakɛ le kosɔn.

Fantanw dɛmɛko

¹⁷ «Aw ka lonan, ni falatɔ minɛ ni tilenninya ye, aw kana firiyamuso ka fani ta aw ka juru nɔɔ na.

¹⁸ Aw k'aw hakili to a la ko aw tun ye jɔɔnw ye Ezipiti jamana na, ko Masaba aw ka Ala y'aw hɔrɔnya. O kosɔn, ne b'a fɔ aw ye ko aw ka kuma nin bato.

¹⁹ «N'i b'i ka suman tigɛra foro kɔnɔ, n'i tɛmɛna dɔ kan, n'i m'o ta, i kana segi ka taga o ta tugu. O bena kɛ lonan, ni falatɔ, ani firiyamuso ta ye, janko Masaba aw ka Ala be barika don i ka baara bɛɛ la.

²⁰ N'i y'i ka olivuyiriw yuguyugu, deen minw tora yen, kana segi k'o tigɛ tugu. O bena kɛ lonan, ni falatɔ, ani firiyamuso ta ye.

²¹ N'i b'i ka *ɛrɛzɛn bɔra foro kɔnɔ tuma min na, deen minw tora, kana segi k'u tigɛ. O bena kɛ lonan, ni falatɔ, ani firiyamuso ta ye.

²² Aw k'aw hakili to a la ko aw tun ye jɔɔnw ye Ezipiti jamana kɔnɔ. O kosɔn, ne b'a fɔ aw ye ko aw ka kuma nin bato.