Sariya 18 - ALA KA KUMA

Sarakalasebagaw ni Levi kɔmɔgɔ tɔw niyɔrɔw

¹ «Sarakalasebagaw, minw ye Levi kɔmɔgɔw ye, ani Levi kɔmɔgɔ tɔw bɛɛ, olu tena dugukolo sɔrɔ niyɔrɔ ye Isirayɛliden tɔw cɛma. Saraka minw bena bɔ Masaba ye, u ka dumuni bena bɔ o le la, ani fɛɛn tɔɔ minw bɛɛ be di Masaba ma.

² Niyɔrɔ tena sɔrɔ u fɛ u balimaw cɛma, bari u niyɔrɔ ye Masaba le ye i n'a fɔ a y'a daa di u ma cogo min na.

³ «Jama be tura, walima saga min kɛ saraka ye, u ka kan k'a ɲafɛsen d'u ma, ni dakalaw, ani kɔnɔnanugu.

⁴ Sɛnɛfɛn deen fɔlɔw, ni duvɛnkɛnɛ fɔlɔ, ni tulu fɔlɔ, ani aw be kɔn ka sagaw sii min tigɛ, o fana be d'u ma,

⁵ bari Masaba aw ka Ala ye Levi kɔmɔgɔw le woloma Isirayɛlidenw bɛɛ cɛma, janko u k'a ka baara kɛ a tɔgɔ la tuma bɛɛ.

⁶ «Ni Levi kɔmɔgɔw dɔ bɔr'aw ka dugu dɔ la, a siginin be yɔrɔ min na Isirayɛli jamana kɔnɔ, ko a be taga sigi Masaba ka yɔrɔ wolomanin na,

⁷ n'a tagara yen, a be se ka baara kɛ Masaba a ka Ala tɔgɔ la, i n'a fɔ a balima Levi kɔmɔgɔ tɔw minw bɛɛ be baara kɛ o yɔrɔ la Masaba ɲakɔrɔ.

⁸ A ka kan k'a niyɔrɔ sɔrɔ fana, i n'a fɔ tɔw, nga a ye min sɔrɔ a ka sokɔnɔfɛnw feereli la, a be se ka to n'o ye.

Kirakolonw ani kiraɲuman ka koo

⁹ «Masaba aw ka Ala be jamana min dira aw ma, n'aw donna o kɔnɔ tuma min na, aw kana o yɔrɔ siyaw ka baarakolonw dege.

¹⁰ Mɔgɔ kana sɔrɔ aw cɛma min b'a dencɛ, walima a denmuso kɛ saraka ye k'a jɛni. Filɛlikɛla kana sɔrɔ aw cɛma fana, ni kolonfilila, ni sirinantigi, ani subaga,

¹¹ walima kɔrɔti bonbaga, walima sukɔrɔ welebaga, ani lagwɛlikɛla.

¹² O koo ɲɔgɔn kɛbagaw koo man di Masaba ye fewu. O koow le kosɔn, Masaba aw ka Ala bena siya nunu gwɛn ka bɔ aw ɲa.

¹³ Aw ka kɛ mɔgɔ jalakibaliw ye Masaba aw ka Ala ɲakɔrɔ.

¹⁴ «Aw bena siya minw gwɛn ka bɔ o jamana na, olu be mɛnni kɛ filɛlikɛlaw ni lagwɛlikɛlaw fɛ. Nga Masaba aw ka Ala te sɔn aw k'o koo ɲɔgɔn kɛ.

¹⁵ A bena ne bɔɲɔgɔn kira dɔ wili aw balimaw cɛma. Aw ka kan ka mɛnni kɛ a fɛ.

¹⁶ A ye fɛɛn min daali Masaba aw ka Ala fɛ *Orɛbu kulu kɔrɔ aw lajɛnlon na, o ye nin ye. Aw y'a fɔ ko: ‹An t'a fɛ Masaba an ka Ala ka kuma anw fɛ a yɛrɛ ma tugu, an t'a fɛ ka tasumaba nin ye fana, n'o tɛ, an bena sa.›

¹⁷ O la, Masaba y'a fɔ ne ye ko: ‹U ka kuma nin ɲana.

¹⁸ N bena u balimaw dɔ kɛ kira ye i n'a fɔ ele. N bena n ka kumaw fɔ a ye, a bena segi k'o bɛɛ fɔ u ye.

¹⁹ Ne bena kuma min fɔ a ye, n'a y'o fɔ, ni mɔgɔ min ma mɛnni kɛ, ne yɛrɛ bena o tigi ɲininga.

²⁰ Nga ni kira min y'a jaa gwɛlɛya ka kuma dɔ fɔ ne tɔgɔ la k'a sɔrɔ ne ma o fɔ a ye, walima ka kuma batofɛn wɛrɛ tɔgɔ la, o ka kan ka faga.›

²¹ «N'a sɔrɔ aw b'aw yɛrɛ ɲiningana ko: ‹Mɔgɔ be se ka kɛ cogo di k'a lɔn ko Masaba ka kuma tɛ?›

²² Tiɲɛ na, ni kira dɔ ye kuma dɔ fɔ Masaba tɔgɔ la, n'o koo ma kɛ, o kɔrɔ ko Masaba ma o kuma fɔ. O kira y'a jaa gwɛlɛya k'o fɔ a yɛrɛ ma. Aw kana siran a ɲa.