Sarakalasebagaw 25 - ALA KA KUMA

Lafiɲɛsan

¹ Masaba y'a fɔ Musa ye Sinayi kulu kan ko:

² «A fɔ Isirayɛlidenw ye ko: Ne bena jamana min di aw ma, n'aw donna yen tuma min na, dugukolo ka kan ka lafiɲɛ janko ne Masaba ka boɲa sɔrɔ.

³ Aw k'aw ka forow sɛnɛ saan wɔɔrɔ kɔnɔ, k'aw ka *ɛrɛzɛnsunw bolomisɛnw tigɛ k'u suman ladon saan wɔɔrɔ kɔnɔ.

⁴ Nga saan wolonwulanan bena bila ne Masaba ye, o ka kɛ dugukolo ka lafiɲɛsan ye. Aw kana sɛnɛ kɛ, aw kana aw ka ɛrɛzɛnsunw bolomisɛnw tigɛ o saan kɔnɔ.

⁵ Aw kana suman mananw ladon, aw kana ɛrɛzɛnw tigɛ aw ka ɛrɛzɛnsunw na, aw ma janto minw na. O saan ka kɛ dugukolo ka lafiɲɛsan ye.

⁶ Suman manan bena kɛ aw ka dumuni ye dugukolo ka lafiɲɛsan na. Aw yɛrɛw, n'aw ka jɔncɛw, n'aw ka jɔnmusow, n'aw ka baaradenw, ni lonan minw b'aw cɛma.

⁷ Aw ka begɛnw, ni kongosogo minw be aw ka jamana kɔnɔ, olu bena balo ni suman manan nunu bɛɛ ye.

Saan bi duurunan ɲanagwɛ

⁸ «Aw ka saan wolonwula jati fɔɔ siɲɛ wolonwula. O saan wolonwula sigiyɔrɔman wolonwula be bɛn saan bi naani ni kɔnɔntɔn ma.

⁹ Aw k'a to u be buru fiyɛ belebele faan bɛɛ la saan kalo wolonwulanan tile tannan loon. Hakɛ yafalon na, aw ka buru fiyɛ aw ka jamana yɔrɔ bɛɛ la.

¹⁰ Aw ka saan bi duurunan bila ne Ala ye ka hɔrɔnyali wango la jamana yɔrɔ bɛɛ la a kɔnɔ mɔgɔw bɛɛ ye. Aw ka saan nin wele ko saan bi duurunan ɲanagwɛ. Aw kelen kelen bɛɛ bena segi ka taga aw ka fadenyabolo la, k'aw ka dugukolow tigiya kɛ tugu.

¹¹ O saan bi duurunan bena kɛ ɲanagwɛ saan ye aw fɛ, aw kana danni kɛ, aw kana suman manan tigɛ, aw kana *ɛrɛzɛnw tigɛ ɛrɛzɛnsunw na, aw ma janto minw na.

¹² Saan nin ye ɲanagwɛ saan ye, a ka kɛ saan ye min bilara ne ye aw fɛ. Aw ka suman manan dama le dumu.

¹³ «Ɲanagwɛ saan nin na, aw kelen kelen bɛɛ ka segi ka taga aw ka dugukolow tigiya kɛ tugu.

¹⁴ Ni aw ye dugukolo dɔ feere aw balima dɔ ma, walima ka dɔ san a fɛ, aw kana ɲɔgɔn tɔɲɔ.

¹⁵ I be min san i balima fɛ, saan minw tɛmɛna ɲanagwɛ saan kɔ, olu kana jati a sɔngɔ la. Ale min b'a feere i ma fana, o sɔngɔ ka kɛɲɛ ni sɛnɛkɛsan tɔw daa ye.

¹⁶ N'o saan tɔw ka ca, i k'a sɔngɔ caya ka kɛɲɛ n'o ye. N'u ka dɔgɔ, i k'a sɔngɔ dɔgɔya ka kɛɲɛ n'o ye. Bari a b'a feere ka kɛɲɛ ni sumantigɛwaatiw daa ye.

¹⁷ Aw kana ɲɔgɔn tɔɲɔ, aw ka siran aw ka Ala ɲa. Ne le ye Masaba aw ka Ala ye.

¹⁸ «Aw ka ne ka sariyaw bato, ne ye kuma minw fɔ, aw ka banba ka olu kɛ. N'o kɛra, aw bena sigi hɛrɛ la jamana nin kɔnɔ.

¹⁹ Sɛnɛ bena ɲa, aw bena dumuni kɛ ka fa, ani ka sigi hɛrɛ la jamana nin kɔnɔ.

²⁰ «N'a b'aw kɔnɔ ko: ‹Anw bena mun dumu saan wolonwulanan nin kɔnɔ, ni anw ma danni kɛ ka se ka suman tigɛ?›

²¹ Ayiwa, ne bena aw ta ɲa saan wɔɔrɔnan na fɔɔ suman nin tena ban aw fɛ saan saba kɔnɔ.

²² A saan seeginan na, aw bena sɛnɛ kɛ, nga aw bena sumankɔrɔ dumu fɔɔ sumankura ka se, a saan kɔnɔntɔnnan na.

Yɔrɔ segiko a tigi ma

²³ «Dugukolo man kan ka feere ka to a sanbaga bolo kudayi, bari dugukolo ye ne ta ye. Aw ye lonanw ni sigibagaw dama ye ne ka yɔrɔ la.

²⁴ Aw bena jamana min tigiya kɛ, ni mɔgɔ ye dugukolo san o kɔnɔ yɔrɔ o yɔrɔ, o tigi k'a lɔn ko sira dinin be dugukolo feerebaga ma ka dugukolo nin san a fɛ tugu.

²⁵ «N'i balima dɔ dɛsɛra fɔɔ a y'a ka dugukolo dɔ feere, a balima min ka surun a la kosɔbɛ, ale ka na ka dugukolo nin sɔngɔ kɔsegi a sanbaga ma k'a minɛ.

²⁶ Ni mɔgɔ ma sɔrɔ, n'a yɛrɛ ye cogoya sɔrɔ tuma min na, n'a be se ka segi k'a san tugu,

²⁷ saan minw tɛmɛn'a feerenin kɔ, a k'olu jati. Saan tɔɔ minw tora, a k'o sɔngɔ kɔsegi a sanbaga ma. O kɔ, a be se ka segi ka kɛ a ka yɔrɔ tigi ye.

²⁸ N'a ma cogo sɔrɔ ka se k'o tigi ta d'a ma, a ye yɔrɔ min feere, o bena to a sanbaga bolo fɔɔ saan bi duurunan ka se. N'o saan sera, a bena segi a ma, o tuma na, a bena se ka segi ka kɛ a tigi ye.

²⁹ «Dugu min laminina ni kogo ye, ni dɔ y'a ka soo feere o kɔnɔ, a be se ka segi k'a minɛ tugu a sanbaga fɛ k'a ka wari segi a ma. O daan ye saan kelen ye.

³⁰ Soo min be dugu kɔnɔ min lamininin be ni kogo ye, n'a tigi ma se ka segi k'a minɛ saan kelen dafanin kɔ, a bena kɛ a sanbaga n'a kɔmɔgɔw ta ye, kudayi. A te segi ka di a tigikɔrɔ ma saan bi duurunan na.

³¹ Dugu minw lamininin tɛ ni kogo ye, o duguw kɔnɔ soow bena jati i n'a fɔ forow. Soo nunu feerebagaw be se ka segi k'u san tugu, u bena segi ka di u tigiw ma saan bi duurunan na.

³² «Sira dinin be Levi kɔmɔgɔw ma waati bɛɛ ka segi k'u ka soow san tugu u ka duguw kɔnɔ.

³³ Hali ni soo nin sanbaga ye Levi kɔmɔgɔ ye fana, ni saan bi duurunan sera, a tigi be bɔ soo nin kɔnɔ k'a to a tigikɔrɔ ye, bari Levi kɔmɔgɔw ka soo minw be u ka duguw kɔnɔ, olu le ye u niyɔrɔ ye Isirayɛlidenw cɛma.

³⁴ Foro minw be Levi kɔmɔgɔw ka duguw lamini na, olu te se ka feere, bari olu ye u ta ye kudayi.

Juruko

³⁵ «N'i balima dɔ kɛra fantan ye, n'a dɛsɛra, i k'a dɛmɛ janko a ka se ka to aw cɛma, hali ni lonan lo min be aw fɛ, walima tɛmɛbaga.

³⁶ I kana tɔnɔ ɲini a fɛ cogo si la, nga i ka siran i ka Ala ɲa, janko i balima ka se ka to aw cɛma.

³⁷ Kana wari juru don a la tɔnɔ kama. Kana dumuni dɔndɔ a ma fana tɔnɔ kama.

³⁸ Ne le ye Masaba aw ka Ala ye, min y'aw bɔ Ezipiti jamana na ka Kanaan jamana di aw ma, ani ka kɛ aw ka Ala ye.

Jɔɔnw hɔrɔnyako

³⁹ «N'i balima dɔ kɛra fantan ye, n'a y'a yɛrɛ feere i ma, i kan'a minɛ i n'a fɔ jɔɔn.

⁴⁰ I k'a minɛ i ko baaraden, walima tɛmɛbaga, aw cɛma. A ka baara kɛ i fɛ fɔɔ saan bi duurunan ɲanagwɛ ka se.

⁴¹ O saan na, i ka sira d'a ma, a n'a deenw ka segi ka ta'a ka fadenyabolo la, k'a faaw ka dugukolo tigiya kɛ tugu.

⁴² Isirayɛlidenw ye ne ka baarakɛlaw ye, ne y'u bɔ Ezipiti jamana na. O la, u man kan ka feere i n'a fɔ jɔɔnw.

⁴³ Kana kuntigiya digi u kan, nga i ka siran i ka Ala ɲa.

⁴⁴ «Aw bena jɔncɛ ni jɔnmuso minw san, olu ka kan ka bɔ siya wɛrɛw la, minw be aw lamini na.

⁴⁵ Lonan minw be aw fɛ, aw be se ka olu san k'u kɛ jɔɔnw ye fana. U ye deen minw sɔrɔ k'u to aw ka jamana na, aw be se k'olu fana san ka kɛ aw ta ye.

⁴⁶ U ka kɛ aw deenw cɛɛn ye aw kɔ. Aw be se k'u kɛ jɔɔnw ye kudayi, nga aw man kan ka kuntigiya digi aw balima Isirayɛlidenw kan.

⁴⁷ «Lonan min be aw fɛ, walima min tɛmɛtɔ lo, n'u dɔ kɛra fɛntigi ye, i balimaw dɔ ka kɛ fantan ye, fɔɔ a y'a yɛrɛ feere lonan nin ma, min siginin be aw cɛma, walima lonan nin ka fadenyabolo mɔgɔ dɔ ma,

⁴⁸ a feerenin kɔ, a be se ka hɔrɔnya tugu ni wari ye. A balimaw dɔ be se k'o kɛ.

⁴⁹ A facɛfitini walima ale dencɛ, walima a facɛkɔrɔba, walima ale dencɛ be se k'a hɔrɔnya. A ka fadenyabolo mɔgɔ wɛrɛ, min ka surun a la balimaya la, o fana be se k'o kɛ. Ni ale yɛrɛ ye fɛɛn sɔrɔ, a be se k'o wari di k'a yɛrɛ hɔrɔnya.

⁵⁰ A n'a sanbaga ka jatiminɛ kɛ ɲɔgɔn fɛ, k'a daminɛ a feeresan na ka ta'a bila saan bi duurunan na. A ka hɔrɔnya sɔngɔ ka kɛɲɛ n'o saanw daa ye. O saanw be sara ka kɛɲɛ ni baaraden saracogo ye.

⁵¹ N'o saan tɔw ka ca, a hɔrɔnya sɔngɔ ka kan ka kɛɲɛ n'o ye.

⁵² Saan tɔɔ minw tora sanni saan bi duurunan ka se, ni olu man ca, a ka jatiminɛ kɛ k'a hɔrɔnya sɔngɔ kɛɲɛ n'o ye.

⁵³ U k'a minɛ i n'a fɔ baaraden min be sara saan o saan. Aw kan'a to a kuntigi k'a ka fanga digi a kan.

⁵⁴ Hali n'a ma se ka hɔrɔnya o cogo nunu si la, ni saan bi duurunan sera, a n'a deenw be labila o kɔnɔ.

Ne ye Masaba aw ka Ala ye

⁵⁵ «Ɔnhɔn, Isirayɛlidenw ye ne ka jɔɔnw ye! Ne ka baarakɛlaw lo, ne ye minw bɔ Ezipiti jamana na. Ne le ye Masaba, aw ka Ala ye.