Sarakalasebagaw 11 - ALA KA KUMA

Fɛɛn saniyanin n'a nɔgɔnin

¹ Masaba y'a fɔ Musa ni Arɔn ye ko:

² «Aw k'a fɔ Isirayɛlidenw ye ko fɛɛn ɲanaman minw bɛɛ be dugukolo kan, olu cɛma, aw be se ka minw dumu, olu filɛ nin ye.

³ Sogo minw sɔnnifara ye fila ye, n'u be u ka dumuni yɛlɛma k'a ɲimi tugu, aw be se k'olu dumu.

⁴ Minw b'u ta yɛlɛma k'a ɲimi, ani sɔnnifara fila be minw fɛ, aw man kan ka minw dumu, olu filɛ: Ɲɔgɔmɛ b'a ta yɛlɛma k'a ɲimi, nga sɔnnifara fila t'a fɛ. Ale saniyanin tɛ aw fɛ.

⁵ Farawoɲinan b'a ta yɛlɛma k'a ɲimi, nga sɔnnifara fila t'a fɛ. O fana saniyanin tɛ aw fɛ.

⁶ Sonsannin b'a ta yɛlɛma k'a ɲimi, nga a sɔnnifara te fila ye. O saniyanin tɛ aw fɛ.

⁷ Lɛɛ sɔnnifara ye fila ye, nga a t'a ka dumuni yɛlɛma k'a ɲimi, o fana saniyanin tɛ aw fɛ.

⁸ Aw kana u sogo ɲimi, aw kana maga u suuw la. U saniyanin tɛ aw fɛ.

⁹ «Jilafɛnw, minw bɛɛ be kɔgɔji ni baji la, olu cɛma, gamanw ni faraw be minw fɛ, aw be se k'o dumu.

¹⁰ Nga fɛɛn ɲanaman minw bɛɛ be yaala kɔgɔji ni baji kɔnɔ, u kɛra fɛnmisɛn fɛɛn o fɛɛn ye, walima jilafɛn wɛrɛ min ɲanaman lo, ni gamanw ni faraw t'u la, olu ka kɛ aw tana ye.

¹¹ Olu ka kan ka kɛ aw tana ye minkɛ, aw man kan k'u sogo ɲimi, u suu ka kɛ aw tana ye fana.

¹² Gamanw ni faraw te jilafɛn o fɛɛn na, olu ka kan ka kɛ aw tana ye.

^13-19 «Kɔnɔw cɛma, minw ka kan ka kɛ aw tana ye, n'aw man kan k'u sogo ɲimi, bari aw tana lo, olu filɛ nunu ye: bɔɔn sifa bɛɛ, gingin sifa bɛɛ, sɛgɛn sifa bɛɛ, duba sifa bɛɛ, ni kaankaan, ni kɔnɔsogolon, ni jigɛdumukɔnɔ sifa bɛɛ, ni tonsow, ani sufɛkɔnɔ.

²⁰ «Gaman be nimanfɛn minw fɛ n'u be taama seen naani kan, olu bɛɛ ka kan ka kɛ aw tana ye.

²¹ Nga gaman be dɔw fɛ n'u be taama seen naani kan, aw be se k'o dumu. Olu filɛ: pansenw be minw fɛ.

²² Aw be se ka tɔɔn sifa bɛɛ dumu.

²³ Nga seen naani ni gamanw be minw fɛ dama, olu bɛɛ ka kan ka kɛ aw tana ye.

Fɛɛn minw be mɔgɔ nɔgɔ

²⁴ «Sogo nunu bena aw nɔgɔ. Ni mɔgɔ o mɔgɔ magara u suu la, o tigi nɔgɔnin bena to fɔɔ wulafɛ.

²⁵ Ni mɔgɔ o mɔgɔ y'u dɔ suu ta, o tigi k'a ka faniw ko. A nɔgɔnin bena to fɔɔ wulafɛ.

²⁶ Fɛɛn o fɛɛn sɔnnifara te fila te, walima n'a t'a ka dumuni yɛlɛma k'a ɲimi, olu saniyanin tɛ aw fɛ. Ni mɔgɔ o mɔgɔ magara u dɔ suu la, o tigi bena nɔgɔ.

²⁷ Seen naani fɛɛnw cɛma, minw be taama u sentigɛ kan, olu saniyanin tɛ aw fɛ. Ni mɔgɔ o mɔgɔ magara olu dɔ suu la, o tigi nɔgɔnin bena to fɔɔ wulafɛ.

²⁸ Ni mɔgɔ min y'u dɔ suu ta, ale k'a ka faniw ko, a nɔgɔnin bena to fɔɔ wulafɛ. Olu saniyanin tɛ aw fɛ.

²⁹ «Sogomisɛn minw be taama dugukolo kan, olu cɛma, minw saniyanin tɛ aw fɛ, olu filɛ nin ye: tinba, ni ɲinan, ni saakɛnɛ sifa bɛɛ,

³⁰ ani sirantɛrɛ kuun fila, ni sirantɛrɛ sifa bɛɛ, kogoro, nɔgɔsi.

³¹ Olu saniyanin tɛ aw fɛ sogomisɛnw cɛma. Ni mɔgɔ min magara u dɔ suu la, o tigi nɔgɔnin bena to fɔɔ wulafɛ.

³² Ni u dɔ sara a suu ka ben fɛɛn o fɛɛn kan, o nɔgɔra. Minan yirilaman wo, fani wo, golo wo, bɔɔrɔ wo, baarakɛminan fɛɛn o fɛɛn. U k'o ko. A nɔgɔnin bena to fɔɔ wulafɛ. O kɔ, a bena jati fɛnsaniyanin ye.

³³ N'u dɔ benna bɔgɔdaga dɔ kɔnɔ, a kɔnɔnafɛnw bɛɛ nɔgɔra. U k'o daga ci.

³⁴ N'o daga kɔnɔ jii dɔ magara dumunifɛn dɔ la, min tun be se ka dumu, o dumunifɛn nin nɔgɔra. Ni minnifɛn o minnifɛn be o daga nin kɔnɔ, o minnifɛn nɔgɔra.

³⁵ Ni o fɛɛn nunu dɔ suu benna fɛɛn o fɛɛn kan, dibi, walima gwaa kan, a ka kan ka ci, a nɔgɔra. Aw k'a jati fɛnnɔgɔnin ye.

³⁶ Ni u dɔw suu benna jii bɔyɔrɔ dɔ kɔnɔ, walima jibondo kɔnɔ, o jii te nɔgɔ. Nga mɔgɔ min y'o fɛɛn nunu suu bɔ jii kɔnɔ, o tigi le be nɔgɔ.

³⁷ N'u dɔ suu benna sumansi dɔ kan, o te nɔgɔ.

³⁸ Nga n'u ye jii kɛ sumansi kan, o kɔ, u dɔ suu ka ben a kan, aw k'o jati fɛnnɔgɔnin ye.

³⁹ «Aw be se ka sogo minw ɲimi, n'o dɔ sara, ni mɔgɔ min magara o suu la, o tigi nɔgɔnin bena to fɔɔ wulafɛ.

⁴⁰ Ni mɔgɔ o mɔgɔ y'o sogo dɔ ɲimi, o tigi k'a ka faniw ko, a nɔgɔnin be to fɔɔ wulafɛ. Ni min y'a suu ta, ale fana k'a ka faniw ko, a nɔgɔnin be to fɔɔ wulafɛ.

⁴¹ «Sogomisɛn minw be taama dugukolo kan, olu bɛɛ ka kan ka kɛ aw tana ye, aw kana o dumu.

⁴² Sogomisɛn minw be taama dugukolo kan: minw be fofo u kɔnɔbara kan wo, walima minw be taama seen naani kan, walima seen caaman, aw kana olu si dumu, u ka kan ka kɛ aw tana ye.

⁴³ Aw kana aw yɛrɛ nɔgɔ n'o fɛɛn nunu si ye. Aw kan'a to u b'aw nɔgɔ, n'o tɛ, aw be kɛ mɔgɔnɔgɔninw ye u kosɔn.

⁴⁴ Ne ye Masaba ye, aw ka Ala. Aw k'aw yɛrɛ di ne ma ka kɛ mɔgɔɲumanw ye, bari ne ka ɲi. Fɛɛn minw be taama dugukolo kan, aw kana aw yɛrɛ nɔgɔ n'u si ye.

⁴⁵ Ne ye Masaba ye, ne le y'aw bɔ Ezipiti jamana na janko ka kɛ aw ka Ala ye. O la, aw ka kɛ mɔgɔɲumanw ye, bari ne ka ɲi.»

⁴⁶ O ye sariya ye sogow, ani kɔnɔw, ni fɛɛn ɲanaman minw bɛɛ be yaalayaala jii la, ani fɛɛn o fɛɛn be taama dugukolo kan,

⁴⁷ janko fɛɛn min saniyanin lo ani min saniyanin tɛ, o ka lɔn ka bɔ ɲɔgɔn na. Fɛɛn ɲanaman min be dumu, ni min te dumu, o ka lɔn ka bɔ ɲɔgɔn na.