Sarakalasebagaw 1 - ALA KA KUMA

Saraka jɛnita

¹ Ka Masaba to Ɲɔgɔnkunbɛn fanibugu kɔnɔ, a ye Musa wele k'a fɔ a ye ko:

² «A fɔ Isirayɛlidenw ye ko ni u dɔ b'a fɛ ka begɛn saraka bɔ ne Masaba ye, a be se ka na ni misi ye, walima begɛnmisɛn.

³ «N'a ka saraka kɛra misi ye min ka kan ka jɛni, a ka na ni tura ye fiɲɛ te min na. A k'a kɛ saraka ye Ɲɔgɔnkunbɛn fanibugu daa la, janko ne Masaba ka sɔn a ma.

⁴ A k'a bolo la begɛn nin kuun na, o la, a ka saraka bena minɛ, a ka kojugu be yafa.

⁵ A ka begɛn nin kaan tigɛ ne Masaba ɲakɔrɔ. Arɔn dencɛ sarakalasebagaw k'a joli ta k'a seriseri sarakabɔyɔrɔ faan bɛɛ kan Ɲɔgɔnkunbɛn fanibugu daa la.

⁶ A ka begɛn nin boso k'a tigɛtigɛ.

⁷ Sarakalasebagaw be lɔgɔ labɛn ka tasuma mana sarakabɔyɔrɔ kan,

⁸ ka sogo tigɛninw n'a kunkolo, n'a tulu fara ɲɔgɔn kan, k'o lala o kan tasuma kɔnɔ sarakabɔyɔrɔ kan.

⁹ Sarakabɔbaga ka nugu n'i seenw ko jii la. O kɔ, sarakalasebaga k'o bɛɛ jɛni sarakabɔyɔrɔ kan. Saraka jɛnita lo pewu, a kasa ka di ne Masaba ye.

¹⁰ «Ni mɔgɔ dɔ b'a fɛ ka na ni begɛnmisɛn ye k'a kɛ saraka jɛnita ye, o tigi ka kan ka na ni sagajigi ye, walima bakɔrɔnin, fiɲɛ te min na.

¹¹ A kaan be tigɛ sarakabɔyɔrɔ kɔgɔdugu ɲafan fɛ ne Masaba ɲakɔrɔ. Sarakalasebagaw k'a joli seriseri sarakabɔyɔrɔ faan bɛɛ kan.

¹² A bɔbaga k'a tigɛtigɛ, sarakalasebaga ka sogo tigɛninw n'a kunkolo n'a tulu fara ɲɔgɔn kan k'o lala lɔgɔ kan tasuma kɔnɔ sarakabɔyɔrɔ kan.

¹³ A k'a nugu n'a seenw ko jii la. Sarakalasebaga k'o bɛɛ jɛni sarakabɔyɔrɔ kan. Saraka jɛnita lo pewu, a kasa ka di ne Masaba ye.

¹⁴ «Ni mɔgɔ dɔ b'a fɛ ka na ni kɔnɔ ye k'a kɛ saraka jɛnita ye, o tigi ka na ni tuganin ye, walima jɛnɛtuba.

¹⁵ Sarakalasebaga k'a minɛ ka na sarakabɔyɔrɔ ɲafɛ k'a kunkolo tigɛ k'a joli bɔn sarakabɔyɔrɔ gɛrɛn na. O kɔ, a b'a jɛni sarakabɔyɔrɔ kan.

¹⁶ A k'a fɔlon n'o kɔnɔnafɛn bɔ a la k'a fili sarakabɔyɔrɔ gɛrɛfɛ a kɔrɔn ɲafan fɛ bugurigwɛ bɔnyɔrɔ la.

¹⁷ A k'a faran a gamanw furancɛ la, nga a kan'a tigɛ ka bɔ ɲɔgɔn na. O kɔ, a k'a la lɔgɔ kan tasuma la k'a jɛni sarakabɔyɔrɔ kan. Saraka jɛnita lo pewu, a kasa ka di ne Masaba ye.