Sam 2nan 9 - ALA KA KUMA

Dawuda be koɲuman kɛ Mefibosɛti ye

¹ Loon dɔ, Dawuda y'a fɔ ko mɔgɔ dɔ tora yen Sayuli kɔmɔgɔw la n'ale be se ka koɲuman kɛ o tigi ye Zonatan kosɔn wa.

² O y'a sɔrɔ Sayuli kɔmɔgɔw ka baaraden dɔ tun be yen, a tɔgɔ ko Siba. U y'ale wele ko a ka na Dawuda fɛ. Masacɛ y'a ɲininga ko ale lo ye Siba ye wa. A y'a jaabi ko: «Ɔnhɔn, ne matigi.»

³ Masacɛ y'a ɲininga tugu ko mɔgɔ si te yen Sayuli kɔmɔgɔw la ale be se ka Ala ka koɲuman kɛ min ye wa? Siba y'a jaabi ko Zonatan deen dɔ be yen, ko muruku lo.

⁴ Masacɛ y'a ɲininga ko a be min? A y'a fɔ ko a be Amiyɛli dencɛ Makiri ka soo, Lodebari.

⁵ Masacɛ Dawuda y'a ci ko a ka ta'a minɛ Amiyɛli dencɛ Makiri ka soo, Lodebari.

⁶ Sayuli deen Zonatan dencɛ Mefibosɛti sera Dawuda ɲakɔrɔ tuma min na, a y'a ɲaa biri duguma ka Dawuda boɲa. Dawuda y'a fɔ ko: «Mefibosɛti!» A y'a jaabi ko: «Naamu, ne matigi.»

⁷ Dawuda y'a fɔ a ye ko: «Kana siran, bari ne b'a fɛ ka koɲuman le kɛ i ye i facɛ Zonatan kama. Ne bena i mamacɛ Sayuli ka forow bɛɛ segi i ma, an'i bena to ka na dumuni kɛ ne fɛ loon bɛɛ.»

⁸ A y'a kunbiri gwan k'a fɔ ko: «Ne, i ka baaraden ye mun ye, janko ne min be i n'a fɔ wulusu, i be janto ne la?»

⁹ O kɔ, masacɛ ye Sayuli ka baaraden Siba wele k'a fɔ a ye ko: «Fɛɛn minw bɛɛ ye Sayuli n'a ka soo ta ye, ne b'o kɔsegi i kuntigi mamaden ma.

¹⁰ I bena to ka foro nunu sɛnɛ a ye, e n'i deenw n'i ka baaradenw. I bena na ni suman ye janko i kuntigi mamaden ka se ka dumuni sɔrɔ. I kuntigi mamaden Mefibosɛti bena to ka dumuni kɛ ne fɛ loon bɛɛ.» O y'a sɔrɔ dencɛ tan ni duuru ni baaraden mɔgɔ mugan tun be Siba fɛ.

¹¹ A y'a fɔ masacɛ ye ko masacɛ, ale matigi ye fɛɛn min bɛɛ ɲini a ka baaraden fɛ, ko ale bena o bɛɛ kɛ. O la, Mefibosɛti tun be to ka dumuni kɛ ni Dawuda ye, i n'a fɔ masacɛ deen dɔ.

¹² Deen kanbelennin dɔ tun be Mefibosɛti fɛ, a tɔgɔ ko Mika. Siba ka somɔgɔw bɛɛ tun ye Mefibosɛti ka baaradenw ye.

¹³ Mefibosɛti tun tora Zeruzalɛmu, bari a tun be to ka dumuni kɛ masacɛ fɛ loon bɛɛ. Muruku tun lo.