Sam 2nan 6 - ALA KA KUMA

Ala ka layidu taamasiɲɛ kɛsu

¹ Dawuda ye Isirayɛliden cɛfariw bɛɛ lajɛn tugu. U tun sera mɔgɔ waa bi saba (30 000) ma.

² Dawuda n'a ka mɔgɔw bɛɛ wilila ka bɔ Baala, Zuda mara la, janko ka Ala ka layidu taamasiɲɛ kɛsu ta ka na n'a ye, Masaba, Setigi tɔgɔ welela min kan. Ale min siginin be *serubɛnw cɛma, kɛsu nin sanfɛ.

³ U ye Ala ka layidu taamasiɲɛ kɛsu ta Abinadabu ka soo kɔnɔ kulu kan, k'a sigi wotorokura kan ka taga n'a ye. Abinadabu deenw Uza ni Ayo le tun be wotoro nin bolila.

⁴ U bɔra ni wotoro nin ye Abinadabu ka soo, kulu kan, ni kɛsu b'a kan, Ayo tun b'a ɲafɛ.

⁵ Dawuda ni Isirayɛlidenw bɛɛ tun be nisɔndiyara kosɔbɛ Masaba ɲakɔrɔ, ka sipɛrɛyiri fɔlikɛminan sifa bɛɛ fɔ, ni gɔniw ani kolonjow ni dundunw ni lonkanw ani nigɛ gositaw.

⁶ U tagara se Nakɔn ka sumangosikɛnɛ na tuma min na, misiw tɛrɛndɛra minkɛ, kɛsu nin jɛngɛna. Uza y'a minɛ n'a bolo ye.

⁷ Masa Ala dimina kosɔbɛ Uza kɔrɔ, k'a faga o yɔrɔ la kɛsu nin gɛrɛfɛ a ka fili nin kama.

⁸ Dawuda dimina bari Masaba ye Uza faga. U b'o yɔrɔ nin wele Perɛtiwuza halibi.

⁹ O loon na, Dawuda siranna Masaba ɲa. O la, a y'a fɔ ko Masaba ka kɛsu nin be se ka se ale fɛ cogo di.

¹⁰ A tun t'a fɛ kɛsu nin be don a fɛ a ka ciin kɔnɔ. O la, u tagara n'a ye Gatika Obɛdi Edɔmu ka soo.

¹¹ A tora ale ka soo kɔnɔ kalo saba. Masaba y'a ta ɲa, n'a ka somɔgɔw bɛɛ.

Taamasiɲɛ kɛsu be se Zeruzalɛmu

¹² O kɔ, u nan'a fɔ masacɛ Dawuda ye ko Masaba ye Obɛdi Edɔmu ka soo ɲa, n'a bololafɛn bɛɛ, Ala ka layidu taamasiɲɛ kɛsu kosɔn. O la, Dawuda wilila ka taga kɛsu nin ta Obɛdi Edɔmu ka soo ka na n'a ye fɔɔ a ka ciin na ni nisɔndiya ye.

¹³ Kɛsu nin tabagaw ye senlako ɲaa wɔɔrɔ kɛ tuma min na, a ye tura, ni misiden tulɔnin faga, k'o kɛ saraka ye.

¹⁴ Dawuda tun be dɔɔn kɛ n'a barika bɛɛ ye Masaba ɲakɔrɔ. A tun y'a yɛrɛ cɛɛ dama siri ni faniɲuman dɔ ye.

¹⁵ Dawuda ni Isirayɛlidenw taatɔ ni kɛsu nin ye, u bɛɛ tun be pɛrɛnna nisɔndiya la, ani ka to ka buruw fiyɛ.

¹⁶ U dontɔ ni Masaba ka layidu taamasiɲɛ kɛsu ye Dawuda ka ciin kɔnɔ, Sayuli denmuso Mikali ye filɛli kɛ ni fenɛtiri ye. A ye masacɛ Dawuda panpantɔ, n'a dɔnkɛtɔ ye Masaba ɲakɔrɔ. A koo goyar'a ye.

¹⁷ Dawuda tun ye fanibugu min lɔ kɛsu nin kosɔn, u nan'a bila ale kɔnɔ. O kɔ, Dawuda ye saraka jɛnitaw ni jɛnɲɔgɔnya taw bɔ Masaba ɲakɔrɔ.

¹⁸ Dawuda ye saraka nunu bɔ ka ban tuma min na, a ye duba kɛ jama ye ni Masaba, Setigi tɔgɔ ye.

¹⁹ O kɔ, a ye burukun kelen kelen, ni tamaro ŋɔmi, ani *ɛrɛzɛn janin ŋɔmi kelen kelen di mɔgɔ bɛɛ ma, Isirayɛli jama bɛɛ, muso fara cɛɛw kan. O kɔ, u kelen kelen bɛɛ kɔsegira ka taga u ka soo.

²⁰ Dawuda kɔsegira soo. A ko a be duba kɛ a ka somɔgɔw ye tuma min na, Sayuli denmuso Mikali bɔra k'a kunbɛn k'a fɔ ko: «Isirayɛlidenw ka masacɛ do ye boɲa sɔrɔ bii dɛ, fɔɔ k'a yɛrɛ walaka a ka baaradenw ka jɔnmusow ɲana, i n'a fɔ fatɔ!»

²¹ Dawuda y'a fɔ a ye ko: «Ne y'o kɛ Masaba le ɲakɔrɔ, ale min ye ne woloma ka ne kɛ a ka jama Isirayɛli ka masacɛ ye, k'i facɛ n'a ka soo to yen.

²² Ne bena n yɛrɛ majigi tugu ka tɛmɛ nin kan, n tena n yɛrɛ jati foyi ye. Nga i be jɔnmuso minw koo fɔra, ne bena boɲa sɔrɔ olu fɛ.»

²³ O la Sayuli denmuso Mikali ma deen si sɔrɔ a sii bɛɛ la.