Rɔmukaw 2 - ALA KA KUMA

Ala ka kiti

¹ E kɛra mɔgɔ o mɔgɔ ye, tiɲɛ t'i fɛ k'i tɔɲɔgɔn jalaki, bari e b'i tɔɲɔgɔn jalaki koo minw na, e yɛrɛ b'o ɲɔgɔn kɛ. O la, e b'e yɛrɛ jalakila.

² Minw b'o ɲɔgɔn kɛ, an y'a lɔn ko Ala b'o tigi kiti ka kɛɲɛ ni tiɲɛ ye.

³ E min b'o koow kɛbaga nunu jalaki, k'a sɔrɔ ele fana b'o koow ɲɔgɔn kɛ, e be miiri ko i bena kisi Ala ka kiti ma wa?

⁴ Walima e te Ala ka ɲumanya dafanin n'a ka muɲuli, n'a ka timinadiyali jati foyi ye wa? K'a sɔrɔ a b'i dɛmɛ a ka ɲumanya barika la ka nimisa ka faran i ka kojugu la.

⁵ E ka dusugwɛlɛya n'i ka murutili kosɔn, e be dɔ fara Ala ka dimi kan, sanni o dimi nin kiti tilennin loon ka se.

⁶ Ale lo bena mɔgɔ kelen kelen bɛɛ sara ka kɛɲɛ n'u ka kɛtaw ye.

⁷ Mɔgɔ minw jijanin lo ka baaraɲuman kɛ n'u be boɲa, ni kunkɔrɔta ani nii banbali le ɲinina, a bena nii banbali di olu ma.

⁸ Nga minw be sɔsɔli kɛ ka muruti tiɲɛ ma ka to tilenbaliya la, a ben'a ka dusubɔ n'a ka dimi yira olu la.

⁹ Mɔgɔ minw be kojugu kɛ, k'a ta zuwifu ma fɔlɔ, o kɔ siya tɔw, tɔɔrɔ ni dusukasi bena kɛ olu bɛɛ ta ye.

¹⁰ Minw be koɲuman kɛ, k'a ta zuwifu ma fɔlɔ, o kɔ siya tɔw, olu bɛɛ bena boɲa ni kunkɔrɔta ani hɛrɛ sɔrɔ.

¹¹ Bari Ala te mɔgɔ bɔ mɔgɔ la.

¹² Mɔgɔ o mɔgɔ ye hakɛ kɛ ni u te Musa ka sariya lɔn, olu bena halaki ni sariya niin t'o la. A be minw fɛ, n'u ye hakɛ kɛ, olu fana bena kiti ka kɛɲɛ ni sariya ye.

¹³ A ma kɛ ko mɔgɔ minw be sariya kuma lamɛn, k'olu le ye mɔgɔtilenninw ye Ala fɛ, mɔgɔ minw b'a sira taama, olu le bena jati mɔgɔtilenninw ye.

¹⁴ Ala ka sariya te siya wɛrɛ minw fɛ, olu be sariya sira taama u ka cogo la, k'a sɔrɔ u te Ala ka sariya lɔn. U kɛra u yɛrɛ ka sariya ye.

¹⁵ O b'a yira ko u ka kan ka min kɛ, u b'o lɔn. N'u be u yɛrɛ jalaki, ani ka tiɲɛ di u yɛrɛ ma, u b'a yira ten ko sariya koo b'u hakili la.

¹⁶ Ka kɛɲɛ ni ne ka kibaru diman ye, o le bena ye loon min na Ala bena mɔgɔw kiti u ka koo dogoninw kama, Yezu Krista barika la.

Zuwifu ni sariya koo

¹⁷ E min b'i yɛrɛ wele ko zuwifu, k'i jigi la sariya kan, ani ka to k'i yɛrɛ boɲa i ka Ala koo la,

¹⁸ e min be Ala sago lɔn, ani e min be koɲuman lɔn sariya barika la,

¹⁹ e min y'a fɔ ko e ye fiɲɛntɔw ka bere minɛbaga ye, ko mɔgɔ minw be dibi la, e be olu dɛmɛ k'u ɲaa yɛlɛ,

²⁰ ko i ye nalomanw ni kolɔnbaliw ka karamɔgɔ ye, bari lɔnniyasɔbɛ ni tiɲɛ yɛrɛyɛrɛ be sɔrɔ sariya barika la.

²¹ Ayiwa, e min be mɔgɔ wɛrɛw kalan, e t'i yɛrɛ kalan! E b'a fɔ k'u kana soɲali kɛ, e do b'a kɛra.

²² E min b'a fɔ k'u kana kakalaya kɛ, k'a sɔrɔ e yɛrɛ b'a kɛ! I ko joko man d'i ye fewu, e do be jobon kɔnɔfɛnw soɲa.

²³ E min b'i yɛrɛ boɲa sariya kosɔn, e be Ala tɔgɔ cɛn i ka sariya batobaliya sababu la.

²⁴ Bari a fɔra Ala ka kuma na ko: «Ala tɔgɔ cɛnna aw sababu la siya wɛrɛw cɛma.»

²⁵ Kɛnɛkɛnɛko ka ɲi n'i be sariya bato, nga n'i te sariya bato, i ka kɛnɛkɛnɛko te jati tugu, i be jati kɛnɛkɛnɛbali ye.

²⁶ Ni kɛnɛkɛnɛbali be sariya sira taama, a tena jati mɔgɔkɛnɛkɛnɛnin ye wa?

²⁷ E min be sariya cɛn, kɛnɛkɛnɛbali min be sariya bato, ale bena i jalaki. K'a sɔrɔ a sɛbɛ b'i bolo, i kɛnɛkɛnɛni lo fana.

²⁸ Ka kɛ zuwifu ye, o te siyako dama ye, kɛnɛkɛnɛko fana ma kɛ farisogo yɔrɔ dɔ tigɛko dama ye.

²⁹ Nga zuwifuya yɛrɛ yɛrɛ ye kɔnɔnako ye, kɛnɛkɛnɛkoɲuman ye dusulako ye Nii Senuman barika la, o te sariyako ye. O zuwifu ɲɔgɔn ka boɲako te bɔ mɔgɔ fɛ, nga Ala fɛ.