Rɔmukaw 15 - ALA KA KUMA

¹ Fanga b'an minw na, an ka kan ka barikatanw dɛmɛ, an kana an diyanakow dama kɛ.

² An kelen kelen bɛɛ k'an tɔɲɔgɔn diyanakow kɛ a ka ɲa kama, janko ka se k'a dɛmɛ a ka taga ɲa.

³ Fɛɛn min tun ka di Krista ye, a m'o kɛ, i ko a fɔra Ala ka kuma na cogo min na ko: «I nɛnibagaw ka nɛnili le sera ne ma.»

⁴ Koo minw bɛɛ tun fɔra Ala ka kuma na kabini fɔlɔfɔlɔ, o fɔra ka hakili d'an ma, janko an jaa ka gwɛlɛya ani ka muɲu, ka jigi sɔrɔ o barika la.

⁵ Ala min be muɲuli di mɔgɔ ma ani k'a jigi tugu, ale k'aw ka miiriya kɛ kelen ye i n'a fɔ Yezu Krista b'a ɲini cogo min na,

⁶ janko aw kɔnɔ ka kɛ kelen ye, ka jɛn ka Ala tanu ale min ye an Matigi Yezu Krista Faa ye.

Ka ɲɔgɔn minɛ badenya la

⁷ Aw ka ɲɔgɔn minɛ kosɔbɛ i n'a fɔ Krista y'aw minɛ cogo min na, janko boɲa ka la Ala tɔgɔ kan.

⁸ Ne b'a fɔ tiɲɛ na ko Ala ka kantigiya kosɔn, Krista ye baara kɛ zuwifuw ye, janko Ala tun y'a daa di koo minw na an faaw ye, o ka kɛ.

⁹ A nakun fana ye nin ye: janko siya wɛrɛw ka Ala boɲa a ka makari kosɔn, ka kɛɲɛ ni Ala ka kuma ye min fɔra ko: «O le y'a to ne bena i tanu siya wɛrɛw cɛma. Ne bena dɔnkili la k'i tɔgɔ boɲa.»

¹⁰ Ani a fɔra tugu ko: «Siya wɛrɛw, aw ye nisɔndiya n'a ka jama ye.»

¹¹ A fɔra tugu ko: «Siya wɛrɛw bɛɛ, aw ka Matigi tanu. Jama bɛɛ, aw k'a boɲa.»

¹² Kira Ezayi fana y'a fɔ ko: «Zese kɔmɔgɔ dɔ bena wili, ale bena sigi siyaw kunna. Siyaw bena u jigi la ale kan.»

¹³ Ala min be mɔgɔ jigi tugu, ale k'a kɛ aw be nisɔndiya kosɔbɛ, ka hɛrɛ kɛ aw ye aw ka lanaya kosɔn, janko aw ka jigisɔbɛ sɔrɔ Nii Senuman barika la.

Pɔli ye baara min kɛ siya wɛrɛw cɛma

¹⁴ N balimaw, aw yɛrɛ ta faan fɛ kɔni, ne jigi b'a la ko aw ye mɔgɔɲumanw ye, lɔnniyadafanin b'aw la, aw be se ka ɲɔgɔn ladi.

¹⁵ Ne be sɛbɛ min cira aw ma, ne ye o yɔrɔ dɔw sɛbɛn ni jagwɛlɛya ye koo dɔw kama, janko ka se k'aw hakili jigi kotɛmɛnin na Ala ka nɛɛma barika la,

¹⁶ a ye min kɛ ne ye ka ne kɛ Yezu Krista ka baarakɛla ye siya wɛrɛw cɛma. Ne be Ala ka kibaru diman fɔ u ye, janko olu fana ka kɛ saraka diman ye Ala fɛ, min saniyanin be Nii Senuman barika la.

¹⁷ O la, ne be se ka ne yɛrɛ boɲa Yezu Krista barika la, Ala ka baara kosɔn.

¹⁸ Krista ye ne dɛmɛ ka baara min kɛ ka siya wɛrɛw dɛmɛ ka mɛnni kɛ Ala fɛ, ne te foyi fɔ n'o tɛ. Ne y'u dɛmɛ ni kuma ni kɛwali ye,

¹⁹ ani kabako sifa caaman ye Nii Senuman barika la. A kɛra ten, k'a ta Zeruzalɛmu fɔɔ ka taga se Iliri mara la, ne ye Krista ka kibaru bɛɛ fɔ o yɔrɔw la.

²⁰ Nga ne ka ŋaniya tun ye ka kibaru diman fɔ yɔrɔ la, Krista tɔgɔ tun ma fɔ yɔrɔ min na fɔlɔ, janko ne kana ne ka baara kɛ k'a la mɔgɔ dɔ ka baarakɔrɔ kan.

²¹ A kɛra ten, ne ka baara bɛnna Ala ka kuma ma min b'a fɔ ko: «A koo ma fɔ mɔgɔ minw ye, olu ben'a ye. Mɔgɔ minw m'a koo mɛn ka ye, olu ben'a ka koo faamu.»

Pɔli be koo dɔ latigɛ

²² O le ye ne bali tuma caaman ka taga aw fɛ.

²³ Nga a saan damani filɛ nin ye, ne tun b'a fɛ ka se aw fɛ. Sisan ne ka baara nɔgɔyara o mara nunu na.

²⁴ Ni ne be taga Ɛsipaɲɛ tuma min na, ne b'a fɛ ka lɔ aw fɛ o tuma na k'aw filɛ ka waati dɔɔni kɛ n'aw ye, ne taatɔ aw ka ne dɛmɛ.

²⁵ Nga sisan ne be taga Zeruzalɛmu ka dɛmɛ kɛ Ala ka mɔgɔw ye.

²⁶ Bari Krista kɔmɔgɔ minw be Maseduwani mara ni Akayi mara la, olu b'a fɛ ka Ala ka mɔgɔw dɛmɛ Zeruzalɛmu, bari u dɛsɛnin be.

²⁷ U y'o latigɛ, u fana tun ka kan k'o kɛ. Bari ni olu siya tɔw ye niyɔrɔ sɔrɔ u ka Ala koo la, olu fana ka kan k'u dɛmɛ ni u bololafɛnw ye.

²⁸ O la, ni ne nana tila o koo la tuma min na, ni n tagara o dɛmɛ nin di ka ban, ne bena tɛmɛ aw fɛ ka taga Ɛsipanyɛ jamana na.

²⁹ Ne lanin b'a la ko ne bena se aw fɛ tuma min na, n bena se ni Krista ka duba ye aw fɛ.

³⁰ Ne b'aw daali n balimaw, an Matigi Yezu Krista kosɔn ni Nii Senuman ka kanuya kosɔn, ko aw ka ne dɛmɛ kɛlɛ nin na, n'aw ka Aladali ye aw be minw kɛ ne ye,

³¹ janko ne ka se ka kisi Zude mara Alaɲasiranbaliw ma, ani ne be taga ni dɛmɛ min ye Zeruzalɛmu, o koo ka se ka diya Ala ka mɔgɔw ye o yɔrɔ la.

³² O cogo la, ne bena se aw fɛ ni nisɔndiya ye, Ala sago la, ani ka se ka lafiɲɛ dɔɔni aw fɛ.

³³ Hɛrɛtigi Ala ka to aw bɛɛ fɛ! Amiina.