Rɔmukaw 14 - ALA KA KUMA

Barikatigiw ni barikatanw ka koo

¹ Mɔgɔ min barika ka dɔgɔ Krista ka sira la, aw k'ale minɛ ka ɲa, aw kana to a kɔrɔfɔli la.

² Ni jigi be mɔgɔ dɔ fɛ kosɔbɛ o le kosɔn a be fɛɛn bɛɛ dumu, ni mɔgɔ min barika ka dɔgɔ Krista ka sira la, n'ale te fɛɛn bɛɛ dumu fɔɔ nankɔfɛn dama,

³ mɔgɔ min be fɛɛn bɛɛ dumu, ale man kan ka dɔ nin dɔgɔya, ani min te fɛɛn bɛɛ dumu, ale fana kan'a tɔɲɔgɔn nin jalaki, bari Ala sɔnn'a ma.

⁴ E min be mɔgɔ wɛrɛ ka baaraden jalaki, e ye jɔn ye? A ye baaraɲuman kɛ wo, a m'a kɛ wo, o t'i ka sira la, o ye a tigi ka koo ye. A do bena baaraɲuman kɛ, bari see be Matigi ye k'o kɛ.

⁵ Mɔgɔ be yen min be loonw jatiminɛ, dɔ fɛ loon bɛɛ ye kelen ye. A daan ye u jigi ka to u ka miiriya kan.

⁶ Mɔgɔ min be loonw jatiminɛ, o tigi b'o kɛ Matigi le kosɔn, min fana be fɛɛn bɛɛ dumu, o tigi fana b'o kɛ Matigi le kosɔn, a fana be barika la Ala ye. Min te fɛɛn bɛɛ dumu, o tigi fana b'o kɛ Matigi le kosɔn, a fana be barika la Ala ye.

⁷ Tiɲɛ na, mɔgɔ si te to sii la a yɛrɛ kosɔn, n'a fana sara, a ma sa a yɛrɛ kosɔn.

⁸ An be sii la wo, an be yen Matigi le kosɔn, n'an sara wo, an sara Matigi le kosɔn. O la, an tora sii la wo, an sara fana wo, an ye Matigi ta ye.

⁹ Krista sara ka kunun janko a ka kɛ mɔgɔ ɲanamanw ni suuw ka Matigi ye.

¹⁰ Ele, mun na i b'i balima jalaki? Mun na i b'i balima dɔgɔya? An bɛɛ le bena lɔ Ala ka kiti tigɛyɔrɔ la.

¹¹ Bari a fɔra Ala ka kuma na ko: «Ne Matigi ɲanaman lo, mɔgɔ bɛɛ ben'a kunbiri gwan ne ɲakɔrɔ, ani mɔgɔ bɛɛ bena Ala tanu.»

¹² O cogo la, an kelen kelen bɛɛ bena lɔ n'an kunko ye Ala ɲakɔrɔ.

¹³ O la, an ka ɲɔgɔn jalakiko dabila sa. Aw k'aw yɛrɛ kɔlɔsi aw kana kɛ sababujugu ye aw balima dɔ ma.

¹⁴ Ne lanin b'a la kosɔbɛ Matigi Yezu barika la ko fɛɛn si te yen min nɔgɔnin be. Nga n'i ye min jati ko a nɔgɔnin lo, ale nɔgɔnin lo i fɛ.

¹⁵ I be dumuni min dumu, n'ale b'i balima nii tɔɔrɔ, o kɔrɔ ko i t'i ka koo kɛ kanuya la tugu. O la do, i k'i yɛrɛ kɔlɔsi, Krista sara i balima min kosɔn, i kana kɛ sababu ye k'ale kunnacɛn dumuni kama.

¹⁶ Fɛɛn min ka d'i ye, o kana kɛ sababu ye i tɔgɔ ka cɛn.

¹⁷ Bari Ala ka masaya te dumuni, walima minnifɛn koo ye, nga tilenninya ni hɛrɛ ani nisɔndiya koo lo Nii Senuman barika la.

¹⁸ Bari mɔgɔ min be baara kɛ Krista ye ten, o tigi le koo ka di Ala ye, mɔgɔw fana b'a tɔgɔɲuman fɔ.

¹⁹ O la sa, an ka banba ka to hɛrɛ la ɲɔgɔn fɛ ani ka ɲɔgɔn dɛmɛ ka barika sɔrɔ Krista ka sira la.

²⁰ Aw man kan ka Ala ka baara cɛn dumuni kama. Fɛɛn bɛɛ ka ɲi, nga fɛɛn min be kɛ kunnacɛnfɛn ye ne balima fɛ, o dumu ma ɲi.

²¹ Fɛɛn min ka fisa, i kana josɔnsogo ɲimi, i kana dɔrɔ min, fɛɛn o fɛɛn min be se ka kɛ sababu ye k'i balima kunnacɛn, i kana o kɛ.

²² Jigi min b'i fɛ o la, i k'o to i ni Ala cɛ. Mɔgɔ min te siga a ka kɛtaw la, o tigi dagamunin lo.

²³ Nga ni mɔgɔ min be sigasiga ni fɛɛn dɔ dumuko ye, n'o tigi y'o dumu, Ala b'o tigi jalaki, bari a m'o koo kɛ ni jigisɔbɛ ye. Koo min ma kɛ ni jigi lanin ye Ala kan, o bɛɛ ye hakɛ ye.