Rɔmukaw 13 - ALA KA KUMA

Yɛrɛminɛcogo faamaw faan fɛ

¹ Mɔgɔ kelen kelen bɛɛ k'a yɛrɛ majigi faamaw kɔrɔ olu minw b'an kunna, bari fangatigiya bɔra Ala fɛ, faama minw siginin be yen, Ala le ye olu bɛɛ sigi.

² O la, mɔgɔ min be ban faama ta ma, o tigi fana banna Ala ka fɔta le ma, o tigi fana be jalaki ben a yɛrɛ kan.

³ Ni mɔgɔ min be koɲuman kɛ, o tigi man kan ka siran kititigɛlaw ɲa, min be kojugu kɛ, ale lo be siran. E b'a fɛ e kana siran faama ɲa wa? Banba ka koɲuman kɛ, faama bena tila k'i tɔgɔɲuman fɔ.

⁴ Bari a be yen Ala ka baara le kama janko k'i seen bila siraɲuman na, nga n'i ye kojugu kɛ i ka siran, bari a sigikun ka maramafɛn d'a ma te dɔ wɛrɛ ye, ka kojugukɛlaw jalaki. N'a b'o kɛ tuma min na, a be Ala ka baara le kɛra k'a ka dimiko yira o tigi la.

⁵ O la do, a kɛra wajibi ye mɔgɔ k'a yɛrɛ majigi faamaw kɔrɔ, o kana kɛ ko u bena i jalaki dama, nga janko i dusu kana i jalaki.

⁶ O le kama, aw be nisara di, bari mɔgɔ minw b'a minɛna, olu ye Ala ka baarakɛlaw ye.

⁷ Fɛɛn min ka kan ka di mɔgɔ min ma, aw k'o di o tigi ma, nisara, ni wusuru ka kan ka di min ma, o ka di o tigi ma. Aw ka kan ka siran mɔgɔ min ɲa, aw ka siran o tigi ɲa, min ka kan ni boɲa ye, aw k'o boɲa.

Ɲɔgɔnkanuya

⁸ Foyi kana sɔrɔ i n'i mɔgɔɲɔgɔn cɛ fɔɔ ɲɔgɔnkanuya, bari mɔgɔ min y'a mɔgɔɲɔgɔn kanu, o tigi ye sariya bɛɛ bato.

⁹ Sariya kuma minw b'a yira ko: «I kana kakalaya kɛ, i kana mɔgɔ faga, i kana soɲali kɛ, i ɲaa kana bɔ i tɔɲɔgɔn ka fɛɛn na,» ani o tɔɔ nunu bɛɛ be taga kɛ kuma kelen nin ye ko: «I k'i tɔɲɔgɔn kanu i n'a fɔ i yɛrɛ.»

¹⁰ Kanuya be mɔgɔ min dusu la, o tigi te kojugu kɛ a mɔgɔɲɔgɔn na, o la sariya be se ka bato kanuya barika la.

An ka jija yann'an Matigi be kɔsegi ka na

¹¹ An be waati min na, aw b'o lɔn. Sisan aw sinɔgɔbagatɔw, aw ye wili ka banba, an kisiwaati surunyana bii yɛrɛ ka tɛmɛ an y'an jigi la Krista kan waati min na.

¹² Dugu tilara ka ban, kɛnɛ be ɲini ka ci. O la, an ka dibidibiko dabila ka kogwɛnin kɛ.

¹³ An ka taama tilenninya la i n'a fɔ mɔgɔ be taama cogo min na tilefɛ. An kana kɛ nugubatɔw ni dɔrɔtɔw ye. An k'an yɛrɛ kɔlɔsi kakalaya sifa bɛɛ ma, an kana kɛ kɛlɛtigɛlaw ye, ani keliya kana sɔrɔ an dusu la.

¹⁴ Aw k'a to Matigi Yezu Krista ka koo ka sigi aw kɔnɔ, aw kana miiri farisogo koo la ka tɛmɛ janko nigɛjugu kana se aw kɔrɔ.