Rɔmukaw 12 - ALA KA KUMA

Batoli ɲanaman

¹ N balimaw, ne b'aw daali Ala ka makari kosɔn ko aw k'aw yɛrɛ kɛ saraka ɲanaman ye, min saniyanin lo, n'a ka di Ala ye: o le bena kɛ aw ka batoli ɲanaman ye.

² Aw kana aw yɛrɛ kɛɲɛ ni bii diɲɛ ye, nga aw ye hakilikura min sɔrɔ, aw jogo ka yɛlɛma ka kɛɲɛ n'o ye, janko aw ka se ka Ala sago lɔn, o min ye koɲuman ye, min ka di Ala ye, n'a dafanin be.

Jɛnɲɔgɔnyakura

³ Ala ye nɛɛma min kɛ ne ye, o kosɔn, ne b'a fɔ aw bɛɛ ye ko aw kana aw yɛrɛ boɲa k'a dama tɛmɛ, aw k'aw yɛrɛ majigi ka kɛɲɛ ni jigi ye, Ala ye min di aw ma.

⁴ Yɔrɔ caaman b'an farisogo la, u bɛɛ ka baara te kelen ye fana.

⁵ O cogo la, an minw lara Krista la, an n'an ka caya bɛɛ, an jɛnna ka kɛ farisogo kelen ye.

⁶ Ala ye nɛɛma kɛ an ye ka seko minw d'an ma, an bɛɛ ta te kelen ye. Kiraya le dira dɔ ma wa? O tigi k'o kɛ ka kɛɲɛ n'a ka lanaya ye.

⁷ Baara kɛ see le dira dɔ ma wa? O tigi ka banba k'o kɛ. Mɔgɔ kalan see le dira dɔ ma wa? O tigi ka banba ka mɔgɔw kalan.

⁸ Mɔgɔ ladi see dira min ma, o tigi k'o kɛ. Ka mɔgɔw sɔn fɛɛn na, o see dira mɔgɔ min ma, o tigi k'o kɛ, a kana sigasiga. Ka kɛ ɲamɔgɔ ye, o see dira min ma, o tigi ka banba k'o kɛ. Mɔgɔ min be makari, o tigi k'o kɛ ni nisɔndiya ye.

⁹ Kanuyasɔbɛ ka sɔrɔ aw dusu la. Aw ka kojugu dabila, ka koɲuman kɛ kosɔbɛ.

¹⁰ Kanuya min be badenya la, o sababu la, aw ka ɲɔgɔn minɛ, k'aw tɔɲɔgɔnw jati k'u ka fisa n'aw ye.

¹¹ Aw ye jija, aw kana kɛ salabagatɔw ye, aw ka banba ka baara kɛ Matigi ye.

¹² Jigi min b'aw la, aw ka nisɔndiya o kosɔn, tɔɔrɔ tuma, aw ka muɲu, aw ye jija ka Ala daali.

¹³ Aw ye banba ka Ala ka mɔgɔw dɛmɛ u dɛsɛyɔrɔ la, ka mɔgɔ wɛrɛw ladon.

¹⁴ Mɔgɔ minw b'aw tɔɔrɔ, aw ka duba kɛ o tigiw ye, aw ka duba kɛ dɔrɔn, aw kana dangali kɛ.

¹⁵ Mɔgɔ minw be nisɔndiya la, aw ye nisɔndiya ni olu ye, minw be kasi, aw ye kasi ni olu ye fana.

¹⁶ Bɛɛn ka sɔrɔ aw ni ɲɔgɔn cɛ. Aw kana aw yɛrɛ boɲa, k'aw yɛrɛ jati kolɔnbagaw ye, aw k'aw yɛrɛ majigi.

¹⁷ Aw kana kojugu juru sara, aw ye jija ka koɲuman kɛ mɔgɔw bɛɛ ye.

¹⁸ Aw k'aw seko bɛɛ kɛ ka to hɛrɛ la ni mɔgɔ bɛɛ ye, n'o be se ka kɛ.

¹⁹ Ne teriw, aw kana aw mɔnɛ bɔ, aw k'o to Ala ma, bari a fɔra Ala ka kuma na ko: «Mɔnɛbɔko ye ne ta ye, ne le be juru sara.» Matigi ko ten.

²⁰ Nga: «Ni kɔngɔ b'i jugu la, dumuni d'a ma. Ni minnɔgɔ b'a la, jii d'a ma. N'i y'o kɛ, a bena kɛ i ko i be takami le bon a kunna.»

²¹ I kan'a to kojugu ka se i kɔrɔ, nga i ka see kojugu kɔrɔ koɲuman barika la.