Piy 2nan 1 - ALA KA KUMA

Foli

¹ Ne Simɔn Piyɛri min ye Yezu Krista ka ciden, n'a ka baaraden ye, ne be bataki nin ci aw ma, aw minw ye an ka jigi ɲanaman ɲɔgɔn sɔrɔ anw ka Ala n'an kisibaga Yezu Krista ka tilenninya kosɔn.

² An ka Ala n'an Matigi Yezu lɔnko kama, u ka nɛɛma ni hɛrɛ kɛ aw ye kosɔbɛ.

Krista ka jama taamacogo

³ Tiɲɛ na, an mako be fɛɛn min na, an ka se ka taama Alaɲasiran na, Matigi y'o bɛɛ d'an ma a ka setigiya barika la, ale min y'an wele k'a ka nɔɔrɔ ni sebagaya d'an ma, waasa an ka se k'ale lɔn kosɔbɛ.

⁴ Olu kama, Ala tun y'a daa di koo minw na, n'u nafa ka bon kosɔbɛ, an sera k'o sɔrɔ. O barika la, an be jɛn ni Ala ye ka kɛ kelen ye, ani ka kisi diɲɛ n'a kɔnɔ nigɛjugu bɛɛ ma.

⁵ O kama, aw ye jija, jigi min b'aw fɛ, aw ka ɲumanya fara o kan, ka lɔnniya fara ɲumanya kan,

⁶ ka yɛrɛminɛ fara lɔnniya kan, ka muɲu fara yɛrɛminɛ kan, ka Alaɲasiran fara muɲu kan,

⁷ ka ɲɔgɔnkanuya fara Alaɲasiran kan, kanuya ka jiidi aw cɛma.

⁸ Bari, ni koo nunu b'aw dusu la kosɔbɛ, aw tena kɛ mɔgɔ farifaganinw ni nafatanw ye an Matigi Yezu Krista lɔnko la.

⁹ Nga ni koo nunu te mɔgɔ min na, o tigi kɛra i n'a fɔ fiɲɛntɔ, ka to ka kurutukurutu dibi la. Bari a ɲinɛna ko Ala y'a ka fɔlɔfɔlɔ hakɛw yafa.

¹⁰ N badenw, o la sa, aw k'aw timinadiya, Ala y'aw woloma k'aw wele min kama, o ka sabati aw bolo. N'aw tora k'a kɛ ten, aw tena ben hakɛ la abada.

¹¹ O la, aw bena se ka kunbɛn koɲuman sɔrɔ an Matigi n'an Kisibaga Yezu Krista ka masaya la min te cɛn ka ye.

Kiraw ka kuma bɔyɔrɔ

¹² N bena to k'aw hakili jigi o koo nunu la tuma bɛɛ, hali n'aw b'o koo nunu lɔn ka ban, n'aw nɔrɔnin b'o tiɲɛkuma nin na fana kosɔbɛ.

¹³ Ne y'a ye ko a bɛnnin lo, ka ne to nii na, ne ka kan ka to k'aw hakili jigi tuma bɛɛ.

¹⁴ Bari n y'a lɔn a tora dɔɔni ne be diɲɛ to, an Matigi Yezu Krista le y'o yira ne la.

¹⁵ Nga sanni o ka se, n bena banba ka kuma aw fɛ waasa n taanin kɔ, n y'aw kalan minw na, o ka to aw hakili la.

¹⁶ An ye Yezu Krista, an Matigi ka setigiya n'a ka nako min fɔ aw ye, o te siirin koo ye dɛ! Nga anw yɛrɛ ɲaa lara a ka nɔɔrɔ kan.

¹⁷ Tuma min na Faa Ala ye kunkɔrɔta ni nɔɔrɔ d'a ma, a tora a ka masaya la, k'a fɔ a ye ko: «Nin ye ne Dencɛ ye, a koo ka di ne ye haali!»

¹⁸ K'an to kulu senuman nin kan n'a ye, an ye kumakan nin mɛn ka bɔ sankolo la.

¹⁹ An bolo lanin be kiraw ka kuma fɔninw kan fana. O kuma nin kɛra i n'a fɔ fitinɛ mananin, min be yeelen bɔ sufɛ fɔɔ ka taga se dugugwɛ ma, dugugwɛdafɛ lolo ka yeelen bɔ aw ye.

²⁰ Ayiwa, aw k'a lɔn kosɔbɛ ko ka adamaden to a yɛrɛ ma, a te se ka Ala ka kuma kɔrɔ lɔn.

²¹ A ma kɛ i n'a fɔ kirayakuma bɔra mɔgɔw fɛ, nga Nii Senuman yɛrɛ le y'a don u daa la u tora ka kuma Ala tɔgɔ la.