Filemɔn 1 - ALA KA KUMA

Pɔli be Filemɔn fo

¹ Ne Pɔli min kɛra kasoden ye Yezu Krista ka baara kosɔn, ne, ani an balimacɛ Timote, be bataki nin ci an tericɛɲuman, n'an baarakɛɲɔgɔn Filemɔn ma,

² ani an balimamuso Afiya ma, ni Arisipi min b'an dɛmɛ kɛlɛ la Ala ye.

³ An Faa Ala ni an Matigi Yezu Krista ka nɛɛma ni hɛrɛ kɛ aw ye.

Pɔli be barika la Ala ye

⁴ Ne ka Ala daali waatiw la ne be to ka barika la Ala ye i kosɔn

⁵ bari, i be Krista kɔmɔgɔw kanu cogo min na, ani i lanin be Matigi Yezu la cogo min na, ne y'o mɛn.

⁶ Ne be Ala daali janko balimaya min be an ni ɲɔgɔn cɛ Krista barika la, o ka se ka taga ɲa kosɔbɛ. An ka kan ka ɲumanya min bɛɛ kɛ Krista kosɔn, i k'o yira mɔgɔw la.

⁷ Ne balimacɛ, i ka kanuya ye ne nisɔn diya kosɔbɛ, ka jagwɛlɛya di ne ma, bari i ye Krista kɔmɔgɔw jigi tugu.

Onezimu ka koo

⁸ Krista barika la, ne be se k'i karaba ka koo dɔ kɛ.

⁹ Nga kanuya kosɔn, ne Pɔli b'i daali, ne min kɛra cɛkɔrɔba ye, ni kasoden ye, Yezu Krista ka baara kosɔn.

¹⁰ Ne b'i daali ne ka deen Onezimu ka koo la, ne ye min sɔrɔ Krista ye ka ne to kaso la.

¹¹ Waati tɛmɛnin, a tun te se k'i mako ɲa, nga sisan a be se k'i mako ɲa ani ka ne fana ta ɲa.

¹² Ne be kɔsegi k'a ci i ma, ale min kɛra i n'a fɔ ne yɛrɛ faan kelen.

¹³ A tun ka di ne ye k'a to ne gɛrɛfɛ, a ka to ka ne dɛmɛ i nɔɔ na kaso la, ne be min kɔnɔ kibaru diman kosɔn.

¹⁴ Nga ne t'a fɛ k'o kɛ n'i ma sɔn, waasa koɲuman nin kana kɛ i karabako ye, ne b'a fɛ i k'o kɛ ni dusudiya ye.

¹⁵ N'a sɔrɔ Onezimu tun faranna i la yanni waati dɔɔni dɔrɔn waasa i ka se k'a sɔrɔ ka to n'a ye fɔɔ tuma bɛɛ.

¹⁶ A te i n'a fɔ jɔɔn dama ye tugu, nga a tɛmɛna jɔɔn kan, balima lo min koo ka gwɛlɛ ne ma. A koo fana ka kan ka gwɛlɛya e ma ka tɛmɛ ne kan, adamadenya ani balimaya la Matigi barika la.

¹⁷ N'i be ne jati i balima ye Krista kosɔn, i k'a minɛ i n'a fɔ i be ne le minɛna.

¹⁸ N'a ye koo dɔ kɛ i la min ma daga, walima n'a ka kan ka fɛɛn dɔ kɔsegi i ma, i b'o bɛɛ to ne kunna.

¹⁹ Ne Pɔli yɛrɛ le be koo nin sɛbɛnna n yɛrɛ ma, ko ne bena juru nin sara, nga e k'a lɔn ko ne ka juru b'e fana na, o ye e yɛrɛ nii ye.

²⁰ O la, ne b'i daali sɔbɛ la ne balimacɛ, ko i ka ne wasa Matigi kosɔn koo nin na, i ka ne dusu diya i n'a fɔ i balima Krista barika la.

²¹ Ne jigi b'a la ko i kɛra mɔgɔsɔbɛ ye. O la, ne be koo nin sɛbɛn k'a ci i ma, ka l'a la ko i bena o kɛ fɔɔ ka tɛmɛ ne ka fɔta kan.

Foli laban

²² Ani ka fara o kan, i ka jigiyɔrɔ dɔ labɛn ne ye, bari ne lanin b'a la ko aw ka Aladali barika la, ne bena sira sɔrɔ ka taga aw fɛ.

²³ Epafarasi, min be kaso la ni ne ye Yezu Krista ka baara kosɔn, ale b'i fo.

²⁴ Mariki b'i fo fana, ni Arisitaraki ani Demasi ni Luka, olu minw kɛra ne baarakɛɲɔgɔnw ye.

²⁵ An Matigi Yezu Krista ka nɛɛma kɛ aw ye.